တနၚ်သဳ၊ မေ ၁၄။
အပ္ဍဲရးတနၚ်သဳ ပွိုၚ်ဍုၚ်တနၚ်သဳ ဘာတန်သၠုၚ် ကွာန်တကူဂှ် ဒပ်ကဝ်မယှေန်ပၞာန် ကြဳဗုမ်နူၜၚ်ကျာတုဲ ခဒမ်ဘာဗွဲမဂၠိုၚ် လီုလာ်အာနွံရဂှ် ညးဒေသတံ ဟီုကဵုဌာန်ပရိုၚ်သြၚ်လောန်တိုၚ်မ်ရ။
ပ္ဍဲဂိတုမေ ၁၃ အခိၚ်ဂယးၜိုတ်၁၀ နာရဳဂှ် ဒၞာဲဘာတန်သၠုၚ် ကွာန်တကူ ပေါဲဗတိုက်ဟၟဲမွဲသာ် နူကဵုဒပ်ကဝ်မယှေန်ပၞာန် ကၠုၚ်ကြဳဖျေံဗုမ်ၜါမ နကဵုၜၚ်ကျာ ဂျက်ဖိုက်တာတုဲ သီုကဵုပန်ဏာကဵု ရံက်ကိတ်တံကီုရ။
ဟိုတ်နူ ဒပ်ကဝ်မယှေန်ပၞာန် ကြဳဏာဗုမ်တုဲ ပ္ဍဲဘာတန်သၠုၚ် အကြာဘာၜါထပ် အဒေါဝ်စမြိုၚ်ၜါဒၞာဲ ဗုမ်ဒတုံစှ်ေခတိုဟ်အာဂှ် ခဒမ်ဘာၜါမ လီုလာ်အာကီု ခဒမ်ဘာနွံဗဒါဲတံလေဝ် ဒးအာတုဲ လီုလာ်အာကီုရောၚ် ညးတြုံဒေသမွဲတၠ ဟီုကဵုဌာန် ပရိုၚ်သြၚ်လောန်တိုၚ်မ်ရ။
အခိၚ်လၟုဟ်ဏံ ဟိုတ်နူဒှ်မံၚ်အခိၚ်ရာသဳကၟာတ်ဘာတုဲ ညးဍုၚ်ကွာန်တံ ဒးဘဲဝပ်ဟၟဲကီုလေဝ် ယဝ်ရ ဒှ်အခိၚ်ဘာပံက်မ္ဂး သွက်မိမတံဂှ်တှ်ေ ဒှ်အရာကိစ္စသြိုဟ်ဒးကဝ် ဗွဲမဂၠိုၚ်မာန်ရောၚ် သ္ဂးရ။
အတိုၚ်ဗီုဏံ ဒပ်ကဝ်မယှေန်ပၞာန် ကြဳဗုၚ်နူၜၚ်ကျာဂှ်တှ်ေ စွံပွန်ကဵု ဒၞာဲညးဍုၚ်ကွာန်တံတုဲ ပရေၚ်ဗတိုက်မံၚ် ဘာဗတောန်လိက် ကောန်ၚာ် ဒှ်လျးအရံၚ်အနာဂတ်တံမ္ဂး ဒှ်ပွမ ကမၠောန်ယုတ်မာ ပပ်ပဳဗွဲမလောန်ရောၚ် ညးဒေသတံ ပါ်ပါဲမံၚ်ရ။
အပ္ဍဲဂိတုအေဗရာ ၁၉ လောန်ကၠုၚ်တေံလေဝ် ပ္ဍဲကဵုကွာန်တိုက်ကာန် ဂအုံကွာန်တကူဂှ် ၜိုန်ရ ပေါဲဗတိုက်ဟွံမွဲကီုလေဝ် နူကဵုဒပ်ကဝ်မယှေန်ပၞာန် ကြဳဗုၚ်နူၜၚ်ကျာတုဲ သ္ၚိညးဍုၚ်ကွာန် ၜါမ ဒးအာတုဲ လီုလာ်အာနွံ ဂွံတီကေတ်ရ။
ပရိုၚ် – သြၚ်လောန်တိုၚ်မ်
Photo – CJ