ရေဝ်၊ မေ ၁၄။
အပ္ဍဲကောံဓရီုသ္ကိုပ်ဒပ် ဒပ်ပၠန်ဂတးဍုၚ်မန် (MSRF) ကၠောန်ဗဒှ်လဝ် ပွိုၚ်ပိတ္ၚဲဂှ် သ္ပဒတန်ဖျေံသ္ဂုတ်သွာတ်ဏာ ပရေၚ်ကမၠောန် သွက်ဂွံအုပ်ဓလီုတိဍာ် ကေုာံ ပရေၚ်စဵုဒၞာညးဍုၚ်ကွာန်တံရောၚ် နူ MSRF လလောၚ်တြးလဝ်ပရိုၚ်ရ။
ကောံဓရီုသ္ကိုပ်ဒပ် ဒပ်ပၠန်ဂတးဍုၚ်မန် (MSRF) ဂှ် ကၠောန်ဗဒှ်လဝ် ဒၞာဲဌာန်ဂအုပ်တမ်ဒပ် စနူဂိတုမေ ၉ စဵုကဵုစိုပ် ၁၁ အပ္ဍဲပွိုၚ်ပိတ္ၚဲရ။
အပ္ဍဲကောံဓရီု သ္ပဒတန်ဖျေံဏာသ္ဂုတ်သွာတ်မာန်ဂှ်ကီု တိုၚ်ပ္ကဴရန်တၟအ် ပရေၚ်ပၞာန် ဒပ်ပၠန်ဂတးဍုၚ်မန် (MSRF) သွက်ဂွံဆက်ထမံက်အာရုပ်ရဴ အဓါန်ဂတကီု၊ ပရေၚ်ကမၠောန် သွက်ဂွံအုပ်ဓလီုတိဍာ် ကေုာံ ပရေၚ်ကမၠောန်စဵုဒၞာ ညးဍုၚ်ကွာန် တံရ။
အကြာဂကောံဒပ်မဟာမိတ်တံ ညံၚ်ဂွံချဳဓရာၚ်အာပရေၚ်ပၞာန် ဂွံကၟောန်ဓရောန် ဇြဟတ်ဂွံခိုဟ်တိုန်အာ ကေုာံ နကဵုဒပ်ပၠန်ဂတး ဒဂေတ်ဗက်မၚ်မွဲထိၚ်ဒဝ်အာ ဒဂေတ်ပဋိပတ်ပရေၚ်ပၞာန် ချိုတ်တ်ပၠိုတ်တ်တုဲ သွက်ဂွံဆက်လုပ်အာပေါဲဗတိုက်ရောၚ်ဂှ် သဳကၠဳသ္ဂုတ်သွာတ်လဝ် အပ္ဍဲကောံဓရီုဏံရ။
တုဲပၠန် နဒဒှ်ဒပ်ပၠန်ဂတး ညးဍုၚ်ကွာန်မန်တံပတေဟ်စဂွံ သွက်ဂွံစဵုဒၞာမၚ်မွဲ ညးဍုၚ်ကွာန် ဒပ်ကၠောန်ပတုဲဖိုလ် သွက်ညးဍုၚ်ကွာန် ညံၚ်ဂွံဒှ် ဒပ်ညးဍုၚ်ကွာန်မန်တံ ဗဓါန်စမာန် သွက်ဂွံဆက်လုပ်အာ ပေါဲဗတိုက်ဂှ် သဳကၠဳလဝ် ဗွဲမလှဲလး ရောၚ် လလောၚ်တြးလဝ်ရ။
အပ္ဍဲကောံဓရီုသ္ကိုပ်ဒပ် MSRF ဂှ်တှ်ေ ဥက္ကဋ္ဌ ကမ္မတဳပရေၚ်အုပ်ဓုပ် ကံၚ်သဳဖိတ်ဒရေဝ်ဍုၚ်မန် (MSFC)၊ ဒု-ဥက္ကဋ္ဌ၊ သ္ကိုပ်ဌာနစဵုဒၞာ၊ သ္ကိုပ်ဌာနကေၚ်ကာအပ္ဍဲဍုၚ်၊ သ္ကိုပ်တမ်ဒပ် MSRF၊ ဒု-သ္ကိုပ်တမ်ဒပ် ကေုာံ ညးတာလျိုၚ်တမ်ဒပ်တံ တိုန်စိုပ်လဝ်ကီုရ။
ဒပ်ပၠန်ဂတးဍုၚ်မန် (MSRF) ဂှ် ဒှ်ဂကောံဒပ်ပၠန်ဂတး သ္ပစၞးဂကူမန် မံက်ဂတဝ်တိုန်လဝ် ကြဴနူပၞာန်သီအဝဵုတုဲ ပ္ဍဲအခိၚ်လၟုဟ်လေဝ် ပံၚ်တောဲကဵု ဂကောံမဟာမိတ်ပၠန်ဂတးတံတုဲ ပ္ဍဲဂၠံၚ်ကၟိန်ဍုၚ်လၟိဟ် ၈ အကြာရေဝ်-ထဝါဲဂှ် ထိၚ်ဒဝ်အုပ်ဓလီုလဝ် ဒၞာဲဗွဲမဂၠိုၚ်ရ။
မွဲလပါ်ပၠန် ဒပ်ပၠန်ဂတးဍုၚ်မန် ကေုာံ ဂကောံဒပ်မဟာမိတ်ပၠ န်ဂတးတံ ထိၚ်ချုက်ဂွံလဝ် ပ္ဍဲကဵုဒေသလ္ၚဵုတံဂှ် ဂကောံပၞာန်သီအဝဵု တံလေဝ် ထပက်မံၚ်ကရောၚ်ပၞာန် မွဲဏှမွဲဏှကီုရောၚ်။
ပရိုၚ် – သြၚ်လောန်တိုၚ်မ်
Photo – MSRF