ရေဝ်၊ မေ ၁၄။
အပ္ဍဲတွဵုရးမန် ပွိုၚ်ဍုၚ်ရေဝ် လတူဍုၚ်လၟိုၚ် ဒု-သ္ကိုပ်တမ်ဒပ် နူတမ်ဒပ် ခလရ ၁၀၆ သ္ကိုပ်ဗိုလ် ထောန်ယျာကျဝ် ဒးဒုၚ်ပန်ဂစိုတ်တုဲဂှ် ပရေၚ်စၟဳစၟတ် ကြီုမံၚ်ရောၚ် ညးဍုၚ်ကွာန်လတူဍုၚ်တံ ဟီုကဵု ဌာန်ပရိုၚ်သြၚ်လောန်တိုၚ်မ်ရ။
အပ္ဍဲဂိတုမေ ၁၁ လောန်ကၠုၚ်တေံ ဒု-သ္ကိုပ်တမ်ဒပ် သ္ကိုပ်ဗိုလ် ထောန်ယျာကျဝ် သီုကဵုကောန်ရဲညး အဃောကၠုၚ်ရာန်စကဝေက် လတူဍုၚ်လၟိုၚ်ဂှ် နူကဵုဂကောံလကိုဟ်ရေဝ်တံ ပန်ဂစိုတ်လဝ်ကဵု သေနာတ် ဒၞာဲကြပ်ပ် မဒှ်ရ။ ကြဴနူဒု-သ္ကိုပ်တမ်ဒပ် ဒးဒုၚ်ပန်ဂစိုတ်တုဲ သ္ပပ္တံနူဂိတုမေ ၁၂ ဂှ်တုဲ ဒၞာဲဂၠံၚ်လုပ်တိတ်ဍုၚ်လၟိုၚ်ကီု ဂၠံၚ်စှ်ေကွာန်ကအ်ဍောတ်ကီု ဒၞာဲအပ္ဍဲဍုၚ်ကီု ဒပ်ကဝ်မယှေန်ပၞာန်တံ ကၟာတ်ဆိုအ် စၟဳစၟတ်မံၚ် ဆက်က်ရ။
ရဲကွာ်အာလ္တူဂၠံၚ်၊ ရဲဍိုက်အာကွဳစက်၊ ကွဳလိုန်ဓါတ် အာကၠုၚ်မံၚ်တံဂှ် စၟဳစၟတ်လဝ်ချိုတ်တ်ပၠိုတ်တ်တုဲ စနူကဵုဒၞာဲအာကၠုၚ်တံလေဝ် ဒပ်ကဝ်မယှေန်ပၞာန်တံ သၟာန်သၟုက်မံၚ်ရောၚ် ညးဒးဒုၚ်စၟဳစၟတ် လဝ်တံ ဟီုလဴလဝ်ရ။
ဟိုတ်နူ ပရေၚ်ကၟာတ်ဆိုအ်စၟဳစၟတ် ဒပ်ကဝ်မယှေန်ပၞာန်ဂှ်ရ ညးဒေသတံ ဒးဆဵုဂဗမံၚ်ကဵုအခက်အခုဲ ပရေၚ်အာကၠုၚ်တုဲ သၟတ်ဗွဲမဂၠိုၚ်လေဝ် စိုတ်ဒှ်မံၚ်ဒွိၚ် ဖေက်ဒးဒုၚ်ရပ်ပဝ်တာ ပရေၚ်ယိုက်ဝန်ပၞာန်တံကီုရ။
သ္ကိုပ်ဗိုလ် ထောန်ရာကျဝ် ဒးဒုၚ်ပန်ဂစိုတ်လဝ်ဏံဂှ် ဂွံသၠုၚ်ပတိုန်လဝ် အဆံၚ်တာလျိုၚ်ကု ဒု-သ္ကိုပ်ဗိုလ်ဇၞော်တုဲ ပ္ဍဲဂိတုမေ ၁၅ မ္ဂး နူဍုၚ်ရေဝ်ဂှ် သွက်ဂွံပြံၚ်အာဍုၚ်တာချဳလုက် နဒဒှ် သ္ကိုပ်တမ်ဒပ်ရောၚ် ဂွံတီလဝ် နူရိုဟ်ကၞက်ပရိုၚ် အပ္ဍဲဒပ်ပၞာန်ရ။
ပရေၚ်ပန်ဂစိုတ်လဝ် သ္ကိုပ်ဗိုလ် ထောန်ယျာကျဝ်ဂှ် အပ္ဍဲကာလပၞာန် သီအဝဵုဏံမ္ဂး ညးတာလျိုၚ်နွံကဆံၚ် ဒု-သ္ကိုပ်တမ်ဒပ်မွဲတၠ ဒးဒုၚ်ဂစိုတ်လဝ် အပ္ဍဲပွိုၚ်ဍုၚ်ရေဝ်ဂှ်တှ်ေ ဒှ်အလန်ပထမ ကိုပ်ကၠာအိုတ်ရောၚ်။
ပရိုၚ် – သြၚ်လောန်တိုၚ်မ်
Photo – CJ