လန်ဒန်၊ မေ ၁၄။
သွက်အစဳဇန်ပံၚ်တောဲ ပရေၚ်ဂီုကၠီုဂၠံၚ်တရဴၜၚ် အပ္ဍဲပ္ၚံက်ၜဳဟဝ်မုဇ်ဂှ် ပလံၚ်ဗစိုပ်ကဵု ၜၚ်ကျာဗတိုက်၊ ဒရုၚ် ကေုာံ ၜၚ်ပၞာန်တံရောၚ် ဗြိတိၚ် ဟီုရ။
အပ္ဍဲကဵုကောံဓရီုက္ဍိုပ်သ္ကိုပ်သၠုၚ်အိုတ် ဝန်ဇၞော်ပရေၚ်စဵုဒၞာတံ ကၠောန်ဗဒှ်လဝ် နကဵုအာန်လာၚ် ပ္ဍဲဂိတုမေ ၁၂ ဂှ် ဝန်ဇၞော်စဵုဒၞာ ဂျောန် ဟာလေ လလောၚ်တြးလဝ် အစဳဇန်ဏံ မဒှ်ရ။
အပ္ဍဲကဵုအစဳဇန်ဂှ်တှ်ေ သၞောတ်အလဵုလဵုဍေံ သွက်ဂွံဂၠိုက်ဂၠာဲပသောၚ်အာမါၚ်ဍာ် ကေုာံ ၜၚ်ဟၟဲကဵုသ္ကိုပ်ယာန်တံသၟးဟွံက ၜၚ်ကျာတာၚ်ဖွန်း သွက်ဂွံမၚ်ကၚ်ဗလးကျာတံလေဝ် ပါလုပ်ရောၚ်။
အပ္ဍဲအစဳဇန်ဏံဂှ် သီုဍုၚ်တၞဟ်သ္အာၚ် အပံၚ်ဖအိုတ် ၄၀ ပြၚ် ပါလုပ်မံၚ်တုဲ အခိၚ်အကာဲအရာကဵုမ္ဂး သွက်ဂွံစကၠောန်အာရောၚ် ဝန်ဇၞော်ဟာလေ ဟီုရ။
နဒဒှ်အရာမကလေၚ်ပလန်တဲ လတူပရေၚ်ပေါဲပၞာန် အမေရိကာန်၊ အေတ်သရေဝ်တံ ဗတိုက်ကၠုၚ်တုဲ ပ္ၚံက်ၜဳဟဝ်မုဇ် မဒှ်ဂၠံၚ်တရဴၜၚ်ဖ္ဍိုက်ကၠေၚ် အရာကိစ္စဇၞော်အိုတ်ပ္ဍဲဂၠးကဝ်မွဲဂှ် လအ်ကၠုၚ်ဂၠိုၚ်ကဵုဂိတု အဳရာန် ထိၚ်ချုက်လဝ်ယျ။
နူကဵုအမေရိကာန် ကၟာတ်လဝ် သၞေဟ်ၜၚ်အဳရာန်တံတုဲ လတူပရေၚ်အာတ်မိက်လဝ်တံ ညံၚ်ဂွံတုပ်စိုတ်ဂှ် ကဵုမံၚ်ဇြဟတ်ဟရိုဟ် လတူအဳရာန်ရ။
ဟိုတ်နူ ပွကမၠောန်အမေရိကာန်ဂှ် အဳရာန်ဒေါသတိတ်မံၚ်တုဲ ၜိုန်ရအာတ်မိက်ကလေၚ်ပလန်နွံကီုလေဝ် သမ္မတ ဒဝ်နယ်ထရ ညိလေဝ်ဒုၚ်တဲဟွံမာန် ဟီုလဝ်ပေၚ်ၚ်ရ။
သွက်ပၟိက်အရၚ်ဂၠးတိ ကၠေၚ်ဍေၚ် ကေုာံ ဍာ်သၟုဟ်ဓါတ်သဘာဝ ၜိုတ် ၂၀ က္ဍိုပ်ကၠံဂှ် ဖ္ဍိုက်ဏာဒၟံၚ်နူပ္ၚံက်ၜဳဂှ်တုဲ ဟိုတ်နူအဳရာန်ကၟာတ်ဆိုအ်လဝ်ဂှ် ၚုဟ်မးသၠုၚ်တိုန်အာမံၚ် အလုံမွဲဂၠးကဝ်ရ။
စနူဂိတုအေဗရာတေံ အကြာအမေရိကာန် ကေုာံ အဳရာန် ၜိုန်ရဒေါအ်လဝ် ပန်ပှ်ောလဝ်ကီုလေဝ် ပရေၚ်ပေါဲဗတိုက်လ္ၚဵုတံ ဆက်နွံမံၚ်ဖိုဟ် မဒှ်ရ။
ဇရေၚ်ဒေသဏံ ဖျေံစွံလဝ်ကောန်ပၞာန်ဗြိတိၚ် ၁၀၀၀ ပြၚ်တုဲ သွက်လၟေၚ်ကမၠောန်ပရေၚ်စဵုဒၞာတံ ရန်တၟအ်လဝ် မဒှ်ရ။
အပ္ဍဲဂိတုလောန်ကၠုၚ်တေံ ဗြိတိၚ် ကေုာံ ပြင်သေတ်တံ လလောၚ်တြးလဝ် အစဳဇန်ဍုၚ်ဂမၠိုၚ်တံဂှ် ဒှ်သွက်ပရေၚ်စဵုဒၞာတၞဟ်ခြာတုဲ သွက်ၜၚ်ဖ္ဍိုက်ကပေါတ် အပ္ဍဲပ္ၚံက်ၜဳဟဝ်မုဇ်တံ နကဵုဂလာန်ပတေဟ် ပရေၚ်ဖျေံစိုတ်နွံနွံ ဂွံကလေၚ်အာကၠုၚ်မာန် ရန်တၟအ်လဝ်ရောၚ် ဌာနဝန်ဇၞော်ပရေၚ်စဵုဒၞာဗြိတိၚ် ဟီုရ။
သွက်နဲကဲ ဒရုၚ်ဂၠာဲမါၚ် ကေုာံ သၞောတ်ပလီုပလာ်ဒရုၚ်တံဂှ် နကဵုသြန်ဂအုံတၟိ ပံၚ် ၁၁၅ ပြကောတိကိုတ် နူကဵုဗြိတိၚ် ပလေဝ်ပလေတ်လဝ် သွက်ဂွံကဵုအာပရေၚ်ရီုဗၚ် ဗီုဏံရ။
“ကမၠောန်မေတ်ယှေန် ဍုၚ်ဂမၠိုၚ်တံပါလုပ် သီုကဵု ဂကောံမဟာမိတ်ပိုဲတံဏံဂှ် သွက်အရာပရေၚ်စဵုဒၞာ၊ အခေါၚ်သၠးၜး ကေုာံ ပရေၚ်ပတေဟ်ဖျေံစိုတ်တံ ဒှ်ကၠုၚ်ရောၚ်” ဝန်ဇၞော်ဟာလေ ဗၟံက်ထ္ၜးလဝ် အပ္ဍဲလိက်လလောၚ်တြးမွဲရ။
ကြဴနူ ထရ အာတ်မိက်လဝ် ဍုၚ်နာနာ ညံၚ်ဂွံဗိုၚ်ရီုဗၚ်စဵုဒၞာအာ ပ္ၚံက်ၜဳဟဝ်မုဇ်တုဲ အစဳဇန်ဏံ မံက်ဂတဝ်တိုန်ကၠုၚ် မဒှ်ရ။
ပ္ၚံက်ၜဳဟဝ်မုဇ်ဂှ် ဒှ်ဒၞာဲညးတံပိုင်ပြဳလဝ်ရောၚ် ညံၚ်ဍုၚ်နာနာတံ သွက်ဂွံသ္ပစၟတ်သမ္တီဂှ် နူအဳရာန် အာတ်မိက်လဝ်ရ။
နိဿဲ – BBC