ဂျကာတာ၊ မေ ၁၅။
ဟိုတ်နူရပ်ဂွံမံၚ် ကောန်ဍုၚ်သအာၚ်ဗွဲမဂၠိုၚ် ဒးဒုၚ်စောဲစပ်လဝ်ကဵု ကမၠောန်ဝေၚ်ဇျှၚ်ဟွံလုပ်သၞောဝ် ကေုာံ ကမၠောန်လီသြန်အန်လာၚ် (ကျာဖျ) တံ ဂၠိုၚ်ကဵုအလန်တုဲ မူဝါဒအလဵုအသဳအေန်ဒဝ်နဳယှာ ကဵုလဝ်အခေါၚ်လုပ်ဍုၚ် ဟွံဒးကေတ်ဗဳသာ သွက်ကောန်ဍုၚ်အာယှဒေသအဂၞဲတံဂှ် ကလေၚ်သ္ၚဳဂၠိပ်အာရောၚ် ညးတာလျိုၚ်အဆံၚ်သၠုၚ် ဌာနလဝကမွဲတၠ ဟီုလဝ် ပ္ဍဲဂိတုမေ ၁၃ ရ။
ပ္ဍဲသတ္တဟလောန်ကၠုၚ်ဏံ အခိၚ်လုပ်ရပ်စပ်သီဂိုၚ်လဝ် ဂကောံဝေၚ်ဇျှၚ်အန်လာၚ် အပ္ဍဲဍုၚ်ဇၞော်ဂျကာတာ ကေုာံ ဂကောံလီသြန်အန်လာၚ် ပါတာန်တံ အပ္ဍဲဒၞာဲၜါဏံဂှ် ညးတာလျိုၚ်တံ ရပ်ဂွံလဝ် မၞိဟ် ၅၀၀ တၠပြၚ်ရ။
အပ္ဍဲကဵု ရပ်ဂွံလဝ် ကောန်ဍုၚ်သအာၚ်တံဂှ် ကောန်ဍုၚ်ဗဳယက်နာမ်၊ ခမေန်၊ မလေဝ်ယှာ၊ လဴ ကေုာံ ကောန်ဍုၚ်ဗၟာတံ ပါလုပ်မံၚ်တုဲ မၞိတ်သီုဖအိုတ်တံဂှ် ဒှ်ညးဂွံလဝ်အခေါၚ်မံၚ်စံၚ် အပ္ဍဲအေန်ဒဝ်နဳယှာ ၜိုတ်ပွိုၚ် ၃၀ တ္ၚဲ ဟၟဲကဵုဗဳသာတံရ။
အပ္ဍဲမၞိဟ် ညးတာလျိုၚ်အေန်ဒဝ်နဳယှာတံ ရပ်ဂွံလဝ်ဏံဂှ် ကောန်ဍုၚ်ကြုက် ဟွံပါလုပ် အစဳဇန်ဗၠးၜး ပရေၚ်ဗဳသာတံလေဝ် ပါလုပ်မံၚ်ကီုရ။
ဟိုတ်နူပရေၚ်ကမၠောန် ဟွံလုပ်သၞောဝ်တံဏံတုဲ စိုတ်အရာဒှ်ဒွိၚ် ဇၞော်ကဵုဇြဟတ်ဒှ်မံၚ်ရောၚ် ညးတာလျိုၚ်လဝကအေန်ဒဝ်နဳယှာ ဟန်ဒါသာမ် မာရန်တိုကို ဟီုရ။
ဟိုတ်နူ ကောန်ဍုၚ်သအာၚ် ကၠုၚ်နူဍုၚ်နွံအခေါၚ်ဗၠးၜးဗဳသာတံ ပါလုပ်မံၚ် အပ္ဍဲကမၠောန်ဟွံလုပ်သၞောဝ်တံတုဲ ထေက်ကဵုဒးကလေၚ်သ္ၚဳဂၠိပ်အာ မူဝါဒတံရောၚ် ညးတံသ္ဂးရ။
ညးမပါလုပ်ဒၟံၚ် အပ္ဍဲကမၠောန်ဝေၚ်ဇျှၚ်ဟွံလုပ်သၞောဝ် ဍုၚ်ဂျကာတာတံဂှ် လုပ်ကၠုၚ် ဇရေၚ်အေန်ဒဝ်နဳယှာ နကဵုအစဳဇန်ဗၠးၜးဗဳသာ ကေုာံ ကြဴနူစိုပ်ဍုၚ်တုဲ ညးအာတ်မိက်ပါမေတ်တံ ပါလုပ်မံၚ်ရောၚ် ညးစၟဳစၟတ်တံ ဂၠိုက်ဂၠာဲဆဵုညာတ်လဝ်ရ။
ပ္ဍဲသတ္တဟအကြာဏံ အရာမပလံၚ်ကလေၚ်ဖျဴလဝ်မၞိဟ် ၂၀၀၀ တၠပြၚ်တံ၊ ပွမတးပါဲပလီုထောံ ပါမေတ်မံၚ်စံၚ်တံ သီုကဵုကမၠောန် ဆေၚ်စပ်ကဵုပရေၚ်အုပ်ဓုပ် ၆၇၀၀ ပြၚ် ရေၚ်တၠုၚ်လဝကီုရောၚ် ဟန်ဒါသာန် ဟီုရ။
ကြဴနူမရပ်ဂွံ ပ္ဍဲဂျကာတာ ကေုာံ ဘာတမ်တုဲ ဒၞာဲဍုၚ်အေန်ဒဝ်နဳယှာဏံ ဒှ်ကၠုၚ်ဒၞာဲပကောံမၞိဟ် သွက်ဂိုဏ်ဂကောံဒုစရိုတ် တတ်ကၠောံဍုၚ်တံမာန်ရောၚ် ကဵုလဝ်သတိရ။
ပ္ဍဲအရာမဗက်ဗတိုက်သရိုဟ် ကမၠောန်ဝေၚ်ဇျှၚ်အန်လာၚ် ကၟာတ်ဒၞာလဝ်တံဂှ် ဒပ်ဗၠာဲသၟိၚ်အေန်ဒဝ်နဳယှာ ရပ်ဂွံလဝ် ကောန်ဍုၚ်သအာၚ် ၃၂၁ တၠရ။
အပ္ဍဲအကြာအခိၚ်ဏံ အလဵုအသဳသေံလေဝ် ကလေၚ်သ္ၚဳဂၠိပ်မံၚ် မူဝါဒဗဳသာတံကီုတုဲ ကောန်ဍုၚ်သအာၚ်တံ ပတောအ်လဝ်ဗီုပြၚ် ညံၚ်ရဴရဲအာတရဴဂၠးကဝ်တုဲ ကၠုၚ်ကၠောန်ကမၠောန်ဟွံလုပ်သၞောဝ်တံဂှ် ဒှ်မံၚ်ဒွိၚ် မဒှ်ရ။
နိဿဲ – AFP