တယိတ်ချံၚ်၊ မေ ၁၅။
အပ္ဍဲရးတနၚ်သဳ ပွိုၚ်ဍုၚ်တယိတ်ချံၚ် အကြာပေါဲဗတိုက်ၜါလပါ် ညးဒေသ သ္ၚိဌာန်လီုလာ်အာလဝ်တံဂှ် နွံမံၚ်ပၟိက်ကဵု ပရေၚ်အရီုဗၚ်ရောၚ် ဂွံတီကေတ် နူဂကောံရီုဗၚ်ဟံၚ်ပြာ် ကရောၚ်ပၞာန်ဒံၚ်ညဳနံၚ် ပွိုၚ်ဍုၚ်တယိတ်ချံၚ်ရ။
အပ္ဍဲဂိတုမာတ်လောန်ကၠုၚ်ဏံ ပ္ဍဲပွိုၚ်ဍုၚ်တယိတ်ချံၚ် ဒၞာဲကဝ်မယှေန်ပၞာန် ဖျေံလဝ်ဒပ် ဗ္ဒိုပ်ဝေန်ဝဂှ် ဒပ်ပၞာန်ဗၠးၜး ကောန်ဂကူကရေၚ် KNLA က္ဍိုက်ပ် ဂကောံဇြဟတ်ဒပ်ပၠန်ဂတးတံ လုပ်ဗတိုက်သီကေတ်ဗ္ဒိုပ်တုဲ ပေါဲဗတိုက်အကြာၜါလပါ် က္တဵုဒှ်ကၠုၚ်ဇၞော်ကဵုဇြဟတ်ရောၚ်။
အပ္ဍဲပေါဲဗတိုက်ဏံဂှ် ဒပ်ကဝ်မယှေန်ပၞာန် ဟိုတ်နူပန်လွဟ်ဇၞော်ကီု သီုဗတိုက်လဝ်ကဵုၜၚ်ကျာကီုတုဲ သ္ၚိဌာန်ညးဒေသ လၟိဟ်ကဵုကၠံတံ လီုလာ်အာလဝ် မဒှ်ရ။
ဒှ်လဝ်ပေါဲဗတိုက်ကဵု ဒပ်ကဝ်မယှေန်ပၞာန်တုဲ သ္ၚိဌာန်နူကွာန်မေန်ဒါတ် ၄၂ မ၊ ကွာန်သၞေဟ်ဟနိ ကဵု ကွာန်ဂၠံၚ်ဗတဳဂှ် သ္ၚိ ၅၇ မ၊ ကွာန်သဳဒဝ် သ္ၚိ ၁၅ မ၊ ကွာန်ပျေၚ်ဖျူတာ သ္ၚိ ၄ မ လီုလာ်အာလဝ်ရ။
ညးဒေသ ရဲသ္ၚိဌာန်လီုလာ်အာတံဏံ လၟုဟ်ဟိုတ်နူ စိုပ်ကၠုၚ်အခိၚ်ဥတုဗြဲတုဲ သွက်ဂွံသိုၚ်ခၞံ တာဲယာယဳတံဂှ်တှ်ေ နွံမံၚ်ပၟိက်ကဵု ပရေၚ်အရီုဗၚ် ဂယျိုၚ်တိုင်ဆု၊ ဒုန် ကဵု သၠကၞိတံရောၚ် ညးရီုဗၚ်မံၚ် ကိစ္စရဲဂြိပ်ပါဲဘဲပၞာန်မွဲတၠ ဟီုရ။
ပြဟ်ဟ်ဏံ ညးဒေသ ရဲသ္ၚိဌာန်လီုလာ်အာလဝ်တံဂှ် အပ္ဍဲဒၞာဲကြပ်ကဵုညးတံမ္ဂး ဗီုပြေပြံၚ် ဒးမံၚ်စံၚ်အာတုဲ မၚ်စၟဳစမံၚ် ညးကၠုၚ်ကဵုအရီုဗၚ်တံရောၚ် သ္ဂးရ။
အပ္ဍဲပေါဲဗတိုက် သီဗ္ဒိုပ်ဝေန်ဝဂှ် ဟိုတ်နူဒပ်ကဝ်မယှေန်ပၞာန် ပန်လဝ်တုဲ ညးဍုၚ်ကွာန် ၃၀ ပြၚ် ဒးဝပ်ချိုတ်အာနွံတုဲ ညးဒေသ လၟိဟ်ကဵုလက်တံလေဝ် ထောံဌာန်ဒၞာဲဝါဲတုဲ ဒးဂြိပ်ပါဲဓလေတ်မံၚ် အိုတ်ရ။
ပရိုၚ် – သြၚ်လောန်တိုၚ်မ်
ဗီုရုပ်- ကရောၚ်ပၞာန်ဒံၚ်ညဳနံၚ်