ဇြပ်ဗု၊ မေ ၁၅။
အပ္ဍဲတွဵုရးမန် ပွိုၚ်ဍုၚ်ဇြပ်ဗု သ္ကုတ်ဗဒါဲကွာန် သခါန်ဂျဳ ဇိုၚ်ဂၠံၚ်ကွဳစက် ရေဝ်-ဇြပ်ဗုဂှ် ရဲဗက်လံက်ကၠေၚ်တိ မၞိဟ်တြုံပိတၠ ဒးဒုၚ်ရပ်ကၠေၚ်လဝ်ကဵုဇုက်တုဲ ပန်ဂစိုတ်လဝ်ဂှ် ကလေၚ် ဆဵုညာတ်လဝ်ရုပ်ဇွတံရောၚ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်မ်ရ။
အပ္ဍဲဂိတုမေ ၁၄ အခိၚ်နူဂယးၜိုတ် ၈ နာရဳကဝက်ဂှ် ရုပ်ဇွ ရဲဗက်လံက်ကၠေၚ်တိ မၞိဟ်တြုံပိတၠတံ ဒးဒုၚ်ဂစိုတ်လဝ်ဂှ် ရဲအာတရဴတံဆဵုညာတ်လဝ် ပ္ဍဲသ္ကုတ်ကွာန်သခါန်ဂျဳ ဇိုၚ်ဂၠံၚ်ကွဳစက် ရေဝ်-ဇြပ်ဗု အကြာကျာ်မယှိခဏ ကဵု ဂတမုက်ကၠအ်ရာဘာ ဥူမာန် မဒှ်ရ။
ညးဒးဒုၚ်ဂစိုတ်ပိတၠတံဂှ် နူကဵုရးဗဂေါ ပွိုၚ်ဍုၚ်ဒိုက်ဥူ ကေုာံ ပွိုၚ်ဍုၚ် ပျောန်တာန်သာတံတုဲ ကၠုၚ်ကၠောန်မံၚ် ကမၠောန်လံက်ကၠေၚ်တိ အပ္ဍဲပွိုၚ်ဍုၚ်ဇြပ်ဗုတုဲ ပ္ဍဲဂိတုမေ ၁၃ အခိၚ်နူဂယးဂှ် တိတ်အာ နူဒၞာဲဇူဒီုဂှ်တုဲမှ ဒးဒုၚ်ဂစိုတ်လဝ် မဒှ်ရ။
ညးမဒးဒုၚ်ဂစိုတ်တံဂှ် ကိုဌေအံၚ် အာယုက် ၃၇ သၞာံ၊ ကိုယေဝ်ထက်အံၚ် အာယုက် ၂၈ သၞာံ ကေုာံ ကိုအံၚ်ပျေအ်ဇြုၚ် အာယုက် ၂၄ သၞာံ ညးတံပိတၠဂှ် ဒးဒုၚ်ရပ်ကၠေၚ်ကဵုဇုက်တုဲ ဒးလဝ်ဝပ် မကမ်ဖံက်လုပ်အာလဝ် ပ္ဍဲပဠက်ကဴ ကေုာံ က္ဍိုပ်တံတုဲ ချိုတ်အာလဝ်ရ။
စပ်ကဵုပရူကိစ္စ ရဲဗက်လံက်ကၠေၚ်တိ မၞိဟ်တြုံပိတၠ ဒးဒုၚ်ရပ်ကၠေၚ်ကဵုဇုက် ဒးဒုၚ်ပန်ဂစိုတ်လဝ်ဏံဂှ် အပ္ဍဲရုၚ်ဗၠာဲသၟိၚ် ဍုၚ်ဇြပ်ဗု စောဲလဝ်အမှု နကဵုဥပဒေဗတိုက်သရိုဟ် ပရေၚ်ပလီုပကီုပရာတ် ၝောံပိုဒ် ၅၄ ဂှ် ဂွံတီကေတ်ရ။
အပ္ဍဲကဵုပွိုၚ်ဍုၚ်ဇြပ်ဗု ကွာန်သခါန်ဂျဳ ဒၞာဲရဲဗက်လံက်ကၠေၚ်တိပိတၠ ဒးဒုၚ်ဂစိုတ်လဝ်ဏံဂှ် ဒှ်ဒေသ ဂကောံဗ္တိုက်သရိုဟ် သၞောတ်တၠအဝဵုပၞာန် ဗော်ဍုၚ်မန်တၟိ (NMSP-AD) တံ အဓိက ချဳဓရာၚ်မံၚ်တုဲ ဒပ်ပၞာန်ဗမာတံကီု ဂကောံဒပ်ပၠန်ဂတးတံကီု အာကၠုၚ်မံၚ်နွံရ။
ပရိုၚ် – သြၚ်လောန်တိုၚ်မ်
ဗီုရုပ်- CJ