နေပျဳဒဝ်၊ မေ ၁၅။
ဆေၚ်စပ်ကဵု ပရေၚ်ဗတိုက်သရိုဟ် လီလာန်သြန်အန်လာၚ်တုဲ သၞောဝ်ဥပဒေအပြောံ စဵုကဵုဖျေံဒုဟ်ဒဏ်ဂစိုတ်မာန်ဂှ် အလဵုအသဳပၞာန်သီအဝဵု လလောၚ်တြးပတိတ်ဏာ နူကဵုလိက်ပရိုၚ်တြးဝါဒ ပ္ဍဲဂိတုမေ ၁၄ ဂှ်ရ။
သွက်ညးဍုၚ်ကွာန်တံ ဂွံတီဂွံလ္ၚတ် ဂွံကဵုအာကသပ်မာန်ဂှ် ကဵုဏာသမ္တီလလောၚ်တြးလဝ်တုဲ လိက်ကဵုကသပ်တံဂှ်လေဝ် ဇရေၚ်ရုၚ်စၠတ်ထဝ်ကၟိန်ဍုၚ်ဂှ် ပလံၚ်ဗစိုပ်မာန်ရောၚ် သ္ဂးရ။
ပရေၚ်လီလာန်သြန်အန်လာၚ်တံ ညံၚ်ဟွံဂွံဖျေံသ္ဇိုၚ်အပ္ဍဲဍုၚ်တုဲ ဂကောံဇြဟတ်အပ္ဍဲဍုၚ်သၟးဟွံက သီုကဵု အလဵုအသဳဍုၚ်သအာၚ်တံကီု သွက်ဂွံပ္ညဳပ္ညပ် ပံၚ်တောဲကၠောန်အာမာန် ကေုာံ ဟိုတ်နူပရေၚ်လီသြန် အန်လာၚ်တုဲ ညးဍုၚ်ကွာန်တံ ညံၚ်ဟွံဂွံ ဒးဆောံလေၚ်ဂှ် သွက်ဂွံစဵုဒၞာအာ ရန်တၟအ်လဝ်ရောၚ်။
တုဲပၠန် နူကဵုဒေသပယျဵုတံမွဲအဆံၚ် လုပ်ကၠုၚ်အပ္ဍဲဍုၚ်ဟၟဲကဵုသၞောဝ်တုဲ ဖံက်ပကဝ်ကၠောန်ဗဒှ်ဒုဟ်ဒဏ် ဆေၚ်စပ်ကဵု ပရေၚ်လီလာန်သြန်အန်လာၚ်ဂှ် အဝဵုအာဏာစၟတ်ပိုၚ်ခြာနိဂီုဍုၚ် ကေုာံ ပရေၚ်ညိၚ်ဝပ်တံလေဝ် ညံၚ်ဟွံဂွံယုတ်ဒေက်စှ်ေအာတံ ပါလုပ်ရ။
မွဲလပါ်ပၠန် ပရေၚ်ဗာန်ကဵု ဂကောံဆေၚ်စပ်ကဵုပရေၚ်သြန်တံ၊ ကမၠောန်ရေၚ်တၠုၚ် ပရေၚ်ဆက်စၠောံတံကဵု အကြာဌာနအလဵုအသဳ ဆေၚ်စပ်တံ ညံၚ်ဂွံဒက်ပ္တန်အာ သၞောတ်လှာဲဂတးတၚ်နၚ်ပရိုၚ်မာန်ကီု ရန်တၟအ်တၞဟ်ဟ်တံလေဝ် ထပ်ဗပေၚ်စုတ်လဝ်ကီုရောၚ်။
စပ်ကဵုသၞောဝ်ဥပဒေအပြောံ ဗတိုက်သရိုဟ်ပရေၚ်လီလာန် သြန်အန်လာၚ်ဏံတုဲ အတိုၚ်ပရေၚ်သ္ၚဳဂၠိပ် နူကဵုပရဝ်ဂျက် အေန်တာနိတ်ဗၟာ နကဵုသွာၚ်လပါ် အခေါၚ်အရာဒဳဂျေတ်တေလ်မ္ဂး လတူ ရဲသုၚ်စောဲအေန်တာနိတ်တံဂှ် ပဵုတုဲကရေပ်ဓရတ် သွက်ဂွံထိၚ်ချုက်မၚ်ရံၚ်အာမာန် ခၞံစုတ်လဝ် တင်အရာ သွက်ဂွံဒှ်ဒွိၚ်တံဂှ် ဆဵုညာတ်ဒၟံၚ်ရောၚ် ပ္ဍဲဂိတုမေ ၁၄ ဂှ် ကဵုလဝ်သမ္တီရ။
အပ္ဍဲသၞောဝ်ဥပဒေအပြောံဂှ်တှ်ေ ခၞံစုတ်လဝ် တၚ်ကၟာတ်ဒၞာတာဗွဲမဂၠိုၚ်တံနွံတုဲ ယဝ်ရဖံက်ပကဝ် တၚ်ဒၞာတာလဝ်တုဲ ဒုဟ်ဒဏ်နွံမ္ဂး အောန်အိုတ်နူထံၚ် ၁ သၞာံ စဵုကဵုဒဏ်ဂစိုတ်ဖျေံမာန်ဟွံက ဒဏ်သြန်လဝ်ဒးမာန်ရောၚ် ချူဗၟံက်ထ္ၜးလဝ်ရ။
အပ္ဍဲကဵုတင်နၚ်တံမ္ဂး ယြဴပူဂဵုလဵုမှ သြန်ဂွံနၚ် နူပရေၚ်ဖံက်သၞောဝ်တံဏံ တီကီုလဝ် ဟွံတီကီုလဝ် ဒဒှ်ရ ပရေၚ်ဂွံပတေဟ်စ နွံကီုလေဝ် နူကဵုစရၚ်သြန်ဗာန်ဇကု ပွမသၠောဝ်ပြံၚ်ကဵုလဝ် ပွမသီဒေပ်စွံလဝ် ဟွံသေၚ်မ္ဂး ပရေၚ်သ္အးသြန်တံ ကၠောန်ဟွံဂွံပုဟ်ဂှ် တာဒၞာလဝ်ရောၚ်။
တုဲပၠန် ယြဴပူဂဵုလဵုမှ သေမ်ကာဒ် စၟတ်သမ္တီလဝ်နကဵုယၟုဇကုဂှ် သွက်ဂွံကၠောန် ပရေၚ်လီသြန်အန်လာၚ်တုဲ ပွမကဵုသုၚ်စောဲလဝ်၊ ပွမသွံလဝ်ကဵု၊ ပွမဂၠေံကဵုလဝ်တံ ကၠောန်ဟွံဂွံ။ ဗီုဂှ်ကီု စရင်သြန်ဗာန်ဇကု မဝ်ဗိုင်ဝဝ်လက်ဇကုဂှ် သွံကီု ဂၠေံကဵုကီု ကၠောန်ဟွံဂွံပုဟ်။
ယဝ်ရ ဖံက်ပကဝ်လဝ် ပရေၚ်တာဒၞာလဝ်ဏံတုဲ ဒးဒုၚ်ဖျေံဒုဟ်ဒဏ်မ္ဂး မၞိဟ်ဏံဂှ် ဒဏ်ထံၚ်နူ ၃ သၞာံ စဵုကဵု ၇ သၞာံ ဒးဒုၚ်တုဲ ဒဏ်သြန် အောန်အိုတ် ၅၀၀ ကိုတ် စဵုကဵုစိုပ် ၁၀၀၀ ကိုတ်လေဝ် ဒးဒုၚ်ဖျေံမာန်ရောၚ် ဗၟံက်ထ္ၜးချူလဝ်ရ။
မွဲလပါ်ပၠန် ယြဴပုဂဵုလဵုမှ သွက်ဂွံကၠောန်ပရေၚ်လီသြန်အန်လာၚ်တုဲ ကၠောန်ပရေၚ်ပကီုပရာတ် လတူမၞိဟ်မွဲမွဲ၊ ပွမပျဲပျာံ၊ ပွမရပ်ခြိုၚ် ဟၟဲကဵုသၞောဝ်၊ ပွမဆက်ဆောံဓဇန်ကြာန်န်တံဂှ် ကၠောန်ဟွံဂွံပုဟ် ဒၞာတာလဝ်ဏီရ။
ယဝ်ရ ဖံက်ပကဝ်ဏာ တၚ်ဒၞာတာလဝ်ဏံမ္ဂး ဒဏ်ထံၚ် ၁၀ သၞာံ စဵုကဵုစိုပ် ထံၚ်မွဲအာယုက် ဟွံသေၚ်မ္ဂး ဒဏ်ဂစိုတ်ဖျေံမာန်တုဲ ပါဲနူဂှ် ဒဏ်သြန်လေဝ်နွံတုဲ ပ္ဍဲအခိၚ်ကလိကၠောန်ဗဒှ်လဝ်ဒုဟ်ဂှ် ယဝ်ရ မၞိဟ်မွဲမွဲချိုတ်အာမ္ဂး ဒးဖျေံဒုဟ်ဂစိုတ်ဟေၚ် မဒှ်ရ။
အတိုၚ်သၞောဝ်ဥပဒေအပြောံဏံမ္ဂး နူကဵုဂကောံအလဵုအသဳကၟိန်ဍုၚ်ဂှ် သွက်ဂွံဒက်ပ္တန်ကမ္မတဳဗဟဵု မၚ်စၟဳစၟတ်ဗတိုက်သရိုဟ် ပရေၚ်လီသြန်အန်လာၚ် နကဵုကောန်ဂကောံ ၁၉ တၠတံနွံတုဲ ဝန်ဇၞော်ကာအပ္ဍဲဍုၚ်ဂှ် ဒှ်ဥက္ကဋ္ဌ၊ ဂဥုပ်ဗၠာဲသၟိၚ်ဂှ် ဒှ်ညးအုပ်ကာတုဲ ဥက္ကဋ္ဌဗာန်ဗဟဵု၊ ဝန်ဇၞော်ပရေၚ်ဍုၚ်သ္အာၚ် ကေုာံ ဝန်ဇၞော်လဝကတံ ပါလုပ်ရ။
တုဲပၠန် သ္ကိုပ်ဝန်ဇၞော်ရးဒေသဇၞော် ကေုာံ တွဵုရးတံ၊ သ္ကိုပ်ရးပၞာန် ဒေသဆေၚ်စပ်တံ သီုကဵု ဒု-ဝန်ဇၞော်၊ နူကဵုဌာန ဖောအ်ဗြဳတောတက် ဒဳဂျေတ်တေလ်၊ ပရေၚ်ဆက်စၠောံ၊ ပရေၚ်ပလံၚ်ဗစိုပ်၊ ပရေၚ်စဵုဒၞာ၊ ပရေၚ်ဒေသပယျဵု စနူတံဏံဂှ်လေဝ် စုတ်လဝ်ကောန်ဂကောံကီု ဂွံဆဵုရ။
နူကဵုကမ္မတဳဗဟဵုဂှ်တှ်ေ သီုကဵုဒေသရးကၟိန်ဍုၚ်၊ ရးဒေသဇၞော်ကေုာံ တွဵုရးတံ ဒးဒက်ပ္တန်စှ်ေအာကဆံၚ်ၚ် ကမ္မတဳဗတိုက်သရိုဟ် ပရေၚ်လီသြန်အန်လာၚ် နကဵုကောန်ဂကောံ ၁၀ တၠတံတုဲ သီုကဵု ဌာနဗဟဵုဗတိုက်သရိုဟ် ပရေၚ်လီသြန်အန်လာၚ်ဂှ်လေဝ် ဒးဒက်ပ္တန်အာရောၚ်။
အပ္ဍဲကဵုဌာနဗဟဵု ဗတိုက်သရိုဟ် ပရေၚ်လီသြန်အန်လာၚ်ဂှ်တှ်ေ သ္ကိုပ်ဒပ်ဗၠာဲသၟိၚ် အမှုရာဇာဝတ်ဂှ် ဒးကေတ်တာလျိုၚ် သ္ကိုပ်ဂကောံတုဲ ဌာနဝန်ဖောအ်ဗြဳတောတက်ဒဳဂျေတ်တေလ် ကေုာံ ပရေၚ်ဆက်စၠောံ၊ ကေၚ်ကာအပ္ဍဲဍုၚ်၊ လဝက၊ ဌာနစပိမတံ ကောန်ဂကောံ ၁၁ တၠတံ ပါလုပ်အာရောၚ် မဒှ်ရ။
နူကဵုဌာနဗဟဵုဂှ် သွက်ဂွံစဵုဒၞာအာ ပရေၚ်လီသြန်အန်လာၚ်ဂှ် နူကဵုဇာဖိုၚ်ပရေၚ်ဆက်စၠောံတံမွဲအဆံၚ် ပွမ သွံစရင်သြန်ဗာန်တံကီု၊ တံၚ်ဂြဲကေတ် မၞိဟ်ပိုန်အောန်တံတုဲ လိၚ်ကဵုကၠောန် စရင်သြန်ဗာန်ကီု၊ ပွမပံက်စရင်သြန်ဗာန်၊ ပံက်စရၚ်သြန်မဝ်ဗိုင်ဖုၚ် နကဵုကာတ်စၟတ်သမ္တီပတောအ်တံ ညံၚ်ဟွံဂွံကၠောန်ဂှ် ဒးစၟဳစၟတ် ထိၚ်ဒဝ်အာရောၚ်။
သွက်ဂွံကၟာတ်ဒၞာတာ ဗတိုက်သရိုဟ်အာ အမှုဒုဟ်ရာဇာဝတ် ဆေၚ်စပ်ကဵုပရေၚ်လီသြန်အန်လာၚ်ဂှ်တှ်ေ ဌာနဗါန်တံကီု ဂကောံဆေၚ်စပ်ကဵုသြန်၊ ညးရေၚ်တၠုၚ်သြန်အဳလက်ထရဝ်နေတ်၊ အဝ်ပရေတာပရေၚ်ဆက်စၠောံ ကေုာံ ညးရေၚ်တၠုၚ်ကဵု ပရေၚ်အေန်တာနိတ်တံ ဒးလှာဲဂတးအာ တၚ်နၚ်ပရိုၚ်တံဏံရောၚ် သ္ဂးရ။
ယဝ်ရ ဆဵုညာတ် အကံက်ထေက်ကဵုဒးသၠေဟ်ပၟာ၊ စရင်သြန်တံကီု၊ အသိၚ်သၠောဲပြံၚ်သြန် ပရေၚ်ပလံၚ်ဗစိုပ်သြန်တံမ္ဂး ဒးပလံၚ်ပရိုၚ် ဇရေၚ်ဌာနဗဟဵုတုဲ တၚ်နၚ်စၟတ်သမ္တီလဝ်သေမ်ကာဒ်ကီု၊ ဒၞာဲဝါဲ ညးသုၚ်စောဲလဝ်ကေုာံ စရင်ကော်လဝ်ဖုၚ်တံဂှ်လေဝ် ဒးထိၚ်ဒေပ် စွံလဝ် ဗွဲမနွံသၞောတ် မဒှ်ရ။
သွက်အရာဏံ တင်နၚ်ပရိုၚ် လှာဲဂတးလဝ်တံဂှ်တှ်ေ ဒးသုၚ်စောဲအာ သွက်အရာဂွံကၟာတ်ဗဒေါအ်တာဒၞာ ဗတိုက်သရိုဟ် ပရေၚ် ဒုဟ်ရာဇာဝတ် လီသြန်အန်လာၚ်ဟေၚ်တုဲ ဒးထိၚ်ဒေပ်စွံအာလဝ် အတိုၚ်ဍာ်ဒကေဝ် သၞောတ်ဗ္ၜတ် ဆေၚ်စပ်ကဵုအရာဂီုကၠီု ပရေၚ်စဵုဒၞာတၚ်နၚ်ပူဂဵုတံရောၚ်။
နူကဵုပရဝ်ဂျက် ကမၠောန်အေန်တာနိတ်ဗၟာဂှ်တှ်ေ အပ္ဍဲဍုၚ်ဗၟာ သွက်ရဲသုၚ်စောဲအေန်တာနိတ် သၞောဝ်ဥပဒေစဵုဒၞာ တၚ်နၚ်ပူဂဵုခိုဟ်ဟ်တံ ညံၚ်ဂွံစဵုဒၞာကဵုဟၟဲမံၚ်ဂှ် ဒးစွံသတိတုဲ အပ္ဍဲဥပဒေ (နိုင်လွတ်လုံ) ၝောံပိုဒ် ၈ စဵုကဵုလၟုဟ် ဒးဒုၚ်ဗဒေါအ်လဝ်ဖိုဟ်ဂှ်တှ်ေ ဒှ်သက်သဳ ခိုၚ်ကၠိုက်မွဲရောၚ် ထံက်ထ္ၜးလဝ်ရ။
ပရိုၚ် – သြၚ်လောန်တိုၚ်မ်
ဗီုရုပ်-Social Media