တနၚ်သဳ၊ မေ ၁၆။
အပ္ဍဲကဵုရးတနၚ်သဳ ပွိုၚ်ဍုၚ်တနၚ်သဳ ပေါဲဗတိုက်ပန်တ္ၚဲဆက်ဒှ်မံၚ် ဗဒါဲကွာန် ၆ တိုၚ်ဂှ် ကောန်ဒပ်ကဝ်မယှေန်ပၞာန် ၅ တၠ ချိုတ်အာနွံရဂှ် တမ်ရိုဟ်ကၞက်ပရိုၚ်ပၞာန်ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်မ်ရ။
စပ္တံနူဂိတုမေ ၁၀ စဵုကဵုစိုပ်မေ ၁၄ အဃောဒပ်ကဝ်မယှေန်ပၞာန် ကၠုၚ်ဗပေၚ်ဇြဟတ် လပါ်ကွာန် ၆ တိုၚ်၊ ၅ တိုၚ် ကေုာံ ကွာန်ဗာန်လဝ်တံဂှ် ဒှ်လဝ်ပေါဲဗတိုက်ကဵု ဒပ်ပံၚ်တောဲစဵုဒၞာ ညးဍုၚ်ကွာန်တံတုဲ အကြာၜါလပါ် ပေါဲဗတိုက်ဇၞော်ကဵုဇြဟတ် ဒှ်လဝ် ပွိုၚ်ပန်တ္ၚဲ အဆက်က်ရောၚ်။
အပ္ဍဲဂိတုမေ ၁၄ ဂှ်လေဝ် ဒပ်ကဝ်မယှေန်ပၞာန် ကၠုၚ်ဗပေၚ်ဇြဟတ် နကဵုကွဳစက်ပၞာန် ၜါဖ္ဍိုက်၊ ကွဳစက်ဖဝ် (Faw) ၜါဖ္ဍိုက်တံဂှ် နူကဵုဒပ်ပံၚ်တောဲစဵုဒၞာညးဍုၚ်ကွာန်တံ တံၚ်မိုၚ်ဗတိုက်လဝ် ကရပ်ဗဒါဲကွာန် ၆ တိုၚ်တုဲ ဒှ်ကၠုၚ်ပေါဲဗတိုက်ရ။
အပ္ဍဲကဵု တံၚ်မိုၚ်ဗတိုက်လဝ်ဂှ် ကွဳစက်ပၞာန်မွဲဖ္ဍိုက် ဒးအာအပ္ဍဲက္ဍိုပ် ကွဳစက်ဂှ်တုဲ ကောန်ဒပ်ကဝ်မယှေန်ပၞာန် ပါကၠုၚ်လတူကွဳစက် ၅ တၠ ချိုတ်အာနွံ ရိုဟ်ကၞက်ပရိုၚ်ပၞာန်မွဲတၠ ဟီုကဵု ဌာန်ပရိုၚ်သြၚ်လောန်တိုၚ်မ်ရ။
မွဲလပါ်ပၠန် ဟိုတ်နူဒပ်ကဝ်မယှေန်ပၞာန် ဖျေံလဝ်သ္ဇိုၚ်ဒပ် ဒၞာဲသ္ၚိဌာန်ကောန်ဍုၚ်ကွာန်တံတုဲ ညးဒေသနူကွာန် ၆ တိုၚ်တံ ဒးဂြိပ်ပါဲလဝ်ဂှ်တှ်ေ စဵုကဵုအခိၚ်လၟုဟ် ကလေၚ်စိုပ်ဌာန်ဒၞာဲဝါဲ ဟွံမာန်ဏီကီု ညးဒေသ ကွာန် ၅ တိုၚ်ကေုာံ ကွာန်ဗာန်လဝ်တံလေဝ် ဟိုတ်နူပေါဲဗတိုက်ဒှ်တုဲ ဒးဂြိပ်ပါဲဓလေတ်မံၚ် သီုအလုံမွဲကွာန် မဒှ်ရ။
စၟတ်တ္ရဲ ၄ ဂိတုမာတ်ဂှ်လေဝ် ဒပ်ကဝ်မယှေန်ပၞာန်ဖျေံလဝ်ဒပ် အပ္ဍဲကဵုဘာလကျာ်ကွာန် ၆ တိုၚ်ဂှ် ဒးဒုၚ်လုပ်ပန်လဝ်တုဲ နူလပါ် ဒပ်ကဝ်မယှေန်ပၞာန် သီုကဵုညးတာလျိုၚ်မွဲတၠ အပံၚ်ဖအိုတ် ၄ တၠ ချိုတ်အာလဝ်နွံမံၚ် ဂွံတီကေတ်ရ။
ပရိုၚ် – သြၚ်လောန်တိုၚ်မ်
Photo – PDF