ဗေကျေန်၊ မေ ၁၆။
အခိၚ်သဳကၠဳလဝ်ကဵု သမ္မတကြုက် ယှဳကျေန်ဖျေန် ပ္ဍဲဂိတုမေ ၁၅ ဂှ်တုဲ ဟိုတ်နူလၟေၚ်တရဴအာကြုက်ဂှ် က္လိဂွံပရေၚ်အံၚ်ဇၞး ပရေၚ်ပိုန်ဒြပ်ရောၚ် သမ္မတအမေရိကာန် ဒဝ်နယ် ထရ ဟီုလဝ်ရ။
ဟိုတ်နူလၟေၚ်တရဴအာလဝ်ဍုၚ်ကြုက်တုဲ ပရေၚ်အံၚ်ဇၞးပရေၚ်ပိုန်ဒြပ်နွံမံၚ် ညးတေံဟီုကီုလေဝ် တၚ်နၚ်ဗွဲတြးဂှ်တှ်ေ ဟီုပတိတ်လဝ် ဟွံဆဵုပုဟ်။
လတူကိစ္စထာဲဝါန်ဂှ် ရပ်စပ်ညံၚ်ဟွံဂွံဗၠေတ်ၚ်အာ နူကဵုဗေကျေန် ကဵုလဝ်သတိကု ဝါယှေန်တန်တုဲ ပေါဲပၞာန်အဳရာန်ဂှ် နူအစတေံ ဒှ်ဟွံထေက်ပုဟ် ဟီုလဝ်ရ။ ထရ အာလဝ် အလန်လက်ကြဴအိုတ် ကၞောတ်သၞာံ ၂၀၁၇ တေံတုဲ သမ္မတအမေရိကာန်မွဲတၠ စိုပ်ဍုၚ်ကြုက်ဂှ် နဒဒှ် မဟာဗျူဟာအဓိကအမေရိကာန် ကေုာံ ပရေၚ်ပြိုၚ်ပကာန်လပါ်ပရေၚ်ပိုန်ဒြပ် ပထမအလန် အာစိုပ်လဝ် မဒှ်ရ။
ပိုဲတံကေတ်လဝ်တၚ်တုပ်စိုတ် ပရေၚ်ကူသာန်ဗၞိက်လ္ၚဵုတံ ခိုဟ်တဴဗွဲမလောန်ရ။ ခိုဟ်သွက်သီုၜါဍုၚ်ရ သာ်ဝွံ ထရ ဂ္ဇအ်ဒၟံၚ်ဗဒါဲ ယှဳကျေန်ဖျေန်တုဲ ဟီုလဝ်ရ။
ပ္ဍဲအခိၚ်က္ဍိုပ်သ္ကိုပ်ၜါတၠ သဳကၠဳမံၚ်အပ္ဍဲဥဒျာန်ကၠအ်ပ္ကဴဂှ် ထရ ဟီုမံၚ်ပရူပ္ကဴကၠေၚ်လ္တိုပ်တံကျေဝ်မံၚ်တုဲ ယှဳကျေန်ဖျေန် ကဵုလဝ်ကတိ သွက်ဂွံပလံၚ်ကဵုပရၚ်တဲ ပ္ကဴတံ ဇရေၚ်ညးတေံရောၚ်။
စပုၚ်ဒေါဝ်တ္ၚဲတုဲ အခိၚ်သုၚ်ဍာ်လက်ဖက်ဂှ် ဝန်ဇၞော်ပရေၚ်ဍုၚ်သ္အာၚ်ကြုက် ဟီုလဝ် ဒဒှ်ရစိုတ်လီုမံၚ် လတူပေါဲပၞာန်အဳရာန်တံရ။
ပေါဲပၞာန်ဟွံထေက်ကဵုက္တဵုဒှ်လဝ်ဏံ သွက်ဂွံဆက်ဗတိုက်အာ ဟိုတ်ပရူပရာဍေံဟၟဲရောၚ် ဝန်ဇၞော်ဍုၚ်သ္အာၚ် ဝမ်ယဳ သ္ဂးရ။
ဟိုတ်နူပေါဲပၞာန်အဳရာန်တုဲ ပရေၚ်ကဵုအထံက်ပၚ်ဇြဟတ်ဓါတ် ကေုာံ ပရေၚ်ပိုန်ဒြပ်ဂၠးကဝ်တံ ဇီုကပိုက်ယုတ်ဒေက်အာလဝ် ဇၞော်ကဵုဇြဟတ်ရောၚ် ဝန်ဇၞော် ဝမ်ယဳ ဟီုရ။
က္ဍိုပ်သ္ကိုပ်ပိုဲၜါတၠ သဳကၠဳလဝ်ပရူပေါဲပၞာန်အဳရာန်ဂှ် ပရေၚ်ဒုၚ်စသိုၚ်တုပ်သၟဟ်မံၚ်ရောၚ် ထရ ဟီုကီုလေဝ် ယှဳကျေန်ဖျေန်ဂှ်တှ်ေ မုလေဝ်ဟွံဟီုပုဟ်။
ပေါဲပၞာန်ဂွံတုဲဒှ်အာ ညံၚ်ဂွံဘိုၚ်ဖျေံကဵုကတောဝ်အဳရာန်ဂှ် ထရ ဗ္တိုက်ဖ္အောဝ်ကြုက်ရောၚ် စၟဳစလဝ်ကီုလေဝ် ကၠာလၟေၚ်တရဴဟွံအာကြုက်ဏီဂှ် သွက်ပေါဲပၞာန်ဂွံတုဲဒှ်အာမ္ဂး ဟွံဒးကေတ် အရီုအဗၚ်ယှဳကျေန်ဖျေန်ပုဟ် ထရ ဟီုလဝ်ရောၚ်။
ပရူကိစ္စထာဲဝါန် တိဍာ်ကြုက်ပိုၚ်ပြဳလဝ်ဂှ် ယဝ်ရဟွံရပ်စပ်အာချိုတ်တ်ပၠိုတ်တ်မ္ဂး အကြာအမေရိကာန် ကဵု ကြုက် ပဋိပက္ခ က္တဵုဒှ်ကၠုၚ်မာန်ရောၚ် နူကြုက် ကဵုလဝ်သတိကီုလေဝ် ဆေၚ်စပ်ကဵုပရေၚ်ထာဲဝါန်ဂှ် လစွံစိုတ်ညးတံ ဟွံပြံၚ်လှာဲဏီပုဟ် ဝန်ဇၞော်ဍုၚ်သ္အာၚ်အမေရိကာန် မာကို ရူဘဳယဵု ဟီုရ။
ပရူတၠကမၠောန်မဳဒဳယာ ဂျေန်မဳလာၚ် ဒးဒုၚ်ရပ်လဝ် ပ္ဍဲဟံၚ်ကံၚ်ဂှ်လေဝ် ဒှ်ဒွိၚ်မံၚ်ရောၚ် ထရ ဟီုလဝ်ကဵု ယှဳကီု ဂွံတီကေတ်ရ။
စပ်ကဵုကိစ္စဏံတုဲ ပ္ဍဲအခိၚ်သၟာန်လဝ်ပရူဟံၚ်ကံၚ်ဂှ် နူကဵုဌာနဝန်ဇၞော်ဍုၚ်သ္အာၚ်ကြုက် ဟီုခၠေဝ်လဝ် ဒှ်ပရေၚ်အပ္ဍဲဍုၚ်ပိုဲရောၚ် သ္ဂးရ။
Ref:Reuters