မတ်မလီု၊ မေ ၁၆။
အပ္ဍဲတွဵုရးမန် ဝိုၚ်ဝေၚ်ဂွံလဝ်အခေါၚ် နူဂကောံအလဵုအသဳပၞာန်သီအဝဵုဂှ် သွက်ဂွံကၟာတ်ထောံ ညးစၞးအမာတ်စၠတ်ထဝ် ဒးဒုၚ်ရုဲစှ်လဝ်တံ ဟွံဂံၚ်ဟီုဂှ်ရ ညးဒေသတံတင်ဒုဟ်ပါ်ပါဲကၠုၚ်ရ။
ဂကောံသီအဝဵုပၞာန်ဝွံ စပ္တံနူသၞာံ ၂၀၂၄ တေံတုဲ အပ္ဍဲတွဵုရးမန် နကဵုပါမေတ်လုပ်သၞောဝ် ကဵုလဝ်အခေါၚ်ပံက်ဝိုၚ်ဝေၚ် အပ္ဍဲဇၟာပ်ပ် ပွိုၚ်ဍုၚ်တံရောၚ်။
ဟိုတ်နူဝိုၚ်ဝေၚ်တံတုဲ အပ္ဍဲဒေသပရေၚ်ကၠတ်ဂၠံက်ပၠံၚ်ၜးကီု ပရေၚ်ပိုန်ဒြပ်ဂကောံသ္ၚိကၟိန် အိန်ထံၚ်တံလီုလာ်အာကီု၊ ဒဂေတ်ပဋိပတ် သၟတ်ပ္ဍဲဒေသတံလေဝ် ယုတ်ဒေက်သဝ်စှ်ေအာ ဇၞော်ကဵုဇြဟတ် မဒှ်ရ။
ဆဂး နူကဵုပေါဲရုဲမာဲဂကောံသီအဝဵုသ္ကိုပ်သ္ကဏံ ညးဒှ်ကၠုၚ် အမာတ်စၠတ်ထဝ်တံဂှ်တှ်ေ စဵုကဵုအခိၚ်လၟုဟ် ဆေၚ်စပ်ကဵု ပရေၚ်ဝိုၚ်ဝေၚ်တံတုဲ မုလေဝ်ဟွံသၟာန်လဝ် တင်သၟာန်ဟၟဲဏီပုဟ်။
သွက်ဂွံကၟာတ်ထောံဝိုၚ်ဝေၚ် အမာတ်ဟွံဂံၚ်ဟီုတံဂှ်တှ်ေ ဒှ်ညးဖေက်မံၚ်အလဵုအသဳပၞာန်တုဲ ဒှ်မံၚ်ဆၜိုတ် အမာတ်ရုပ်စက္ခူဓဝ်ရရောၚ် ညးဒေသမန်ပိတၠ ဟီုဂးပါ်ပါဲလဝ်ရ။
အတိုၚ်ဌာန်ပရိုၚ်သြၚ်လောန်တိုၚ်မ် ကံက်ဂွံလဝ်တၚ်နၚ်တံမ္ဂး ညးဒေသမန် ၁၀ တၠမ္ဂး ၉ တၠဂှ်တှ်ေ ဆန္ဒနွံပၟိက်မံၚ် မိက်ဂွံကဵုကၟာတ်ထောံ ဝိုၚ်ဝေၚ်တံ မဒှ်ရ။
ဟိုတ်ဂှ်ရ ညးဍုၚ်ကွာန်ဗွဲမဂၠိုၚ်တံဂှ်တှ်ေ ပ္ဍဲကဵုကောံဓရီုလၟေၚ်ဍာံ အလန်ဒုတိယ စၠတ်ထဝ်တွဵုရးမန်တတိယဝါ ဂတဏံမ္ဂး နူကဵုညးစၞးအမာတ်စၠတ်ထဝ်တံ ညံၚ်ဂွံသၟာန်သၟုက်ကဵု ဟွံသေၚ်မ္ဂး ညံၚ်ဂွံပတိုန်ကဵုဂလာန် သွက်ဂွံကၟာတ်ထောံဝိုၚ်ဝေၚ်တံဂှ် နွံပၟိက်တုဲ စၟဳစမံၚ်အိုတ်ရ။
စပ်ကဵုပရိုၚ်ဏံတုဲ နူကဵုဌာန်ပရိုၚ်သြၚ်လောန်တိုၚ်မ် ဆက်စၠောံသၟာန်အာ အမာတ်ဒးဒုၚ်ရုဲစှ် ၅ တၠကီုလေဝ် အမာတ်ပိတၠဂှ် ဟိုတ်နူကမၠောန်ဂၠိုၚ်ဟွံသၠးတုဲ ဟွံသှ်ကဵုဂှ်ကီု၊ ညးစၞးအမာတ်မွဲဂှ် ကၟာတ်လဝ်ဖုၚ်၊ ညးစၞးအမာတ်မွဲတၠပၠန်ဂှ်လေဝ် ၜိုန်ရကော်ဏာဖုၚ် စှ်ဝါပြၚ်ကီုလေဝ် ညိလေဝ်ဟွံဒုၚ်တဲဖုၚ်ပုဟ်။
အပ္ဍဲနိဂီုဍုၚ်ဂှ်တှ်ေ ကဵုလဝ်အခေါၚ်ပံက်ဝိုၚ်ဝေၚ်လုပ်သၞောဝ် တွဵုရးမန်ဏံဂှ် ဒးဒုၚ်ကော်ခဴစမံၚ် “တွဵုရးဝိုၚ်ဝေၚ်” နကဵုယၟု ပရေအ်ပရေအ် ဒယှ်တှ်မံၚ်ရ။
နူကဵုပေါဲရုဲမာဲဂကောံသီအဝဵု အပ္ဍဲစၠတ်ထဝ်တွဵုရးမန် မံက်ဂတဝ်တိုန်လဝ်ဏံ ဗော်ပျဳခိုၚ်ဖျိုဝ် ၁၁ ဒၞာဲ၊ ညးစၞးအမာတ်ဒပ်ပၞာန် ၈ ဒၞာဲ ကေုာံ ဗော်ညဳသၟဟ်မန် (MUP) ၇ ဒၞာဲ ဂွံလဝ်အမာတ်ညးစၞးတံရ။
တုဲပၠန် ဗော်တစည၊ ဗော်ဖောအ်ဗြဳတောတက်ကောန်ဂကူပအိုဝ်၊ ဗော်ညးဍုၚ်ကွာန်၊ ဗော်ပၠတရဴညးဍုၚ်ကွာန် ကေုာံ ဗော်ဖောအ်ဗြေဝ်တဴတက် ကောန်ဂကူတံလေဝ် ဂွံလဝ်ညးစၞး မွဲမွဲဒၞာဲအိုတ်ရ။
ပရိုၚ် – သြၚ်လောန်တိုၚ်မ်
Photo – CJ