ဝါယှေန်တန်၊ မေ ၁၇။
နကဵုအဳရာန် ထေက်ကဵုဒးကေတ် တၚ်တုပ်စိုတ်မွဲတုဲ လတူအဳရာန်ဂှ် အလဵုဇကုစိုတ်အေင်ဒုၚ် အိုတ်ကၠုၚ်ယျရောၚ် သမ္မတအမေရိကာန် ဒဝ်နယ် ထရ ဟီုရ။
နူကဵုတဳဟဳရာန် ဒးကလေၚ်ပံက်ကဵု ပ္ၚံက်ၜဳဟဝ်မုဇ်ရောၚ်ဟီုဂှ် သမ္မတကြုက် ယှဳကျေအ်ဖျေၚ် တုပ်စိုတ်ရောၚ် သမ္မတအမေရိကာန် ဒဝ်နယ် ထရ ဟီုကီုလေဝ် နူလပါ်ကြုက်တှ်ေ အယောၚ်အလာ သွက်ဂွံလုပ်ပါဂှ် လကျှ်မွဲမှလေဝ် ဟွံဗၟံက်ထ္ၜးပုဟ်။
ကြဴနူသဳကၠဳကဵု ယှဳ ပွိုၚ်ၜါတ္ၚဲတုဲ အခိၚ်ကလေၚ်နူဗေကျေန် ပ္ဍဲမေ ၁၅ ဂှ်တှ်ေ လတူကာမ္မဏဳကၠေၚ်ဍေၚ်ကြုက် မရာန်မံၚ်ကၠေၚ် နူအဳရာန်တံဂှ် ပရေၚ်ဖျေံဒဏ်ကၟာတ်ဆိုအ် အမေရိကာန်တံဂှ် ထေက်ကဵုဒးကလေၚ်ပလီုကဵုဟာ ဟွံပလီုဟာဟီုဂှ် ချပ်ဒၟံၚ်ရောၚ် ထရ ဟီုရ။
“ယဝ်ရအာတ်အရီုအဗၚ်မ္ဂး ဇကုလေဝ်ဒးကလေၚ်ကဵုမံၚ်အရီုအဗၚ်ဖိုဟ်တုဲ အဲဟွံအာတ်အရီုအဗၚ်ပုဟ်” သာ်ဝွံ ထရ ဟီုလဝ် လတူၜၚ်ကျာ Air Force One သွက်ဂွံသှ်ခၠေဝ်ကဵု သၟာပရိုၚ်မွဲတၠ မသၟာန်လဝ်ဂှ်တှ်ေ ညံၚ်ဂွံကလေၚ်ပံက်ပ္ၚံက်ၜဳဟဝ်မုဇ်ဂှ် သွက်ဂွံကဵုဇြဟတ်ဟရိုဟ်လတူအဳရာန် ယှဳကျေအ်ဖျေၚ် ကဵုလဝ်ကတိဗိုန်န်ဗတ်တ်နွံဟာ ကဵုလဝ်သွဟ်ရ။
စပ်ကဵုအဳရာန် အရာသဳကၠဳကဵု ထရ ဂှ်တှ်ေ သမ္မတ ယှဳ ပရေၚ်ကဵုစၟတ်သမ္တီ ဟၟဲပုဟ်။
စပ်ကဵုပေါဲပၞာန်အဳရာန်တုဲ စိုတ်လီုမံၚ်ရောၚ် ဌာနဝန်ဇၞော်ဍုၚ်သ္အာၚ်ကြုက် ဟီုတုဲ ပေါဲပၞာန်ဏံဝွံ ညိလေဝ်စဒှ်ဟွံထေက်ကီု သွက်ဂွံဆက်ဗတိုက်အာဟှ် ဟိုတ်ပရူပရာဟၟဲပုဟ် ပ္ဍဲလိက်လလောၚ်တြး ဗၟံက်ထ္ၜးချူလဝ်ရ။
ကၠာအမေရိကာန် ကေုာံ အေတ်သရေတံ ဟွံဂွံဗတိုက်အဳရာန် ပ္ဍဲဂိတုဖေဖဝ်ဝါရဳ ၂၈ တေံဏီဂှ် ပ္ၚံက်ၜဳဟဝ်မုဇ် ဒှ်ဒၞာဲသၟုဟ်ဓါတ်သဘာဝဂၠးကဝ် ၂၀ က္ဍိုပ်ကၠံ တတ်ကၠောံမံၚ်ဂှ် နူအဳရာန် ကၟာတ်ဆိုအ်လဝ်ရ။
ဟိုတ်နူၜၚ်ဖ္ဍိုက်ကၠေၚ်တံ တတ်ကၠောံဟွံမာန်တုဲ ပ္ဍဲရာဇဝၚ်မ္ဂး ဒှ်ကၠုၚ်ပြသၞာပရေၚ်ကဵုအထံက်ပၚ်ကၠေၚ်ဍေၚ် ဇၞော်အိုတ်တုဲ ၚုဟ်မးကၠေၚ်ဍေၚ်တံလေဝ် သၠုၚ်တိုန်အာစဵုကဵုစိုပ်က္ဍိုပ်ရ။
အပ္ဍဲပရေၚ်ဗတိုက်ဗလးကျာ အမေရိကာန် ကေုာံ အေတ်သရေတံဂှ် ကောန်ဍုၚ်အဳရာန် လၟိဟ်ကဵုလ္ၚီ ဒးချိုတ်အာလဝ်တုဲ ဟိုတ်နူအေတ်သရေဗတိုက် ဂကောံဟေတ်ဇ်ဗိုလာ ပ္ဍဲလေဗနွန် နွံသၟဝ်အထံက်ပၚ်အဳရာန်ဂှ်လေဝ် မၞိဟ်လၟိဟ်ကဵုလ္ၚီ ဒးချိုတ်အာလဝ်ကီုရ။
နူအမေရိကာန် ပ္ဍဲဂိတုလောန်ကၠုၚ်တေံ ၜိုန်ရဒေါအ်လဝ်ပရေၚ်ပေါဲဗတိုက်တံကီုလေဝ် သၞေဟ်ၜၚ်အဳရာန်တံဂှ်တှ်ေ စပ္တံကၟာတ်ဆိုအ်လဝ်ရ။
ပရေၚ်ကၟာတ်ဆိုအ်အမေရိကာန်တံ တုဲဒှ်အာအိုတ်မှလေဝ် သွက်ဂွံကလေၚ်ပံက်ကဵု ပ္ၚံက်ၜဳဟဝ်မုဇ်ရောၚ် နူတဳဟဳရာန် ဟီုလဝ်ရ။
နကဵုအဳရာန် ယဝ်ရဟွံကေတ် တၚ်တုပ်စိုတ်မွဲမွဲမ္ဂး ပရေၚ်ပေါဲဗတိုက်တံ သွက်ဂွံကလေၚ်စဒှ်ပၠန်ရောၚ် ထရ ဘပဠလဝ်ရ။
“ပိုဲတံဟွံမိက်ကဵုဍေံတံက္လိဂွံ လွဟ်နျူကလဳယာပုဟ်။ ပိုဲတံမိက်ဂွံ ကဵုကလေၚ်ပံက်ပ္ၚံက်ၜဳရ” သာ်ဝွံ ထရ ဂ္ဇအ်ဒၟံၚ်ဗဒါဲသမ္မတ ယှဳ ပ္ဍဲဗေကျေန်တုဲ ဟီုလဝ်ရ။
ပရူမဂစာန်ပတိတ်လွဟ်နျူကလဳယာဂှ် အဳရာန် တးပါဲကၠုၚ်လအ်ယျတုဲ သွက်ဂွံဒေါအ်ထောံ ကမၠောန်သုတေသန နျူကလဳယာဍေံတံဂှ်လေဝ် တးပါဲလဝ်တုဲ သွက်ဂွံပအပ်ကဵု ယူရေနဳယာမ် မတောမ်သ္အးလဝ်ပၞုက်လဝ်တံဂှ် သီုကဵုတးပါဲလဝ်တုဲ ထရ စိုတ်လီုအာညိရ။
နူအမေရိကာန် မိက်ဂွံဆက်သဳကၠဳအာရောၚ်ဟီုဂှ် တင်နၚ်ပရိုၚ်တံ က္လိဂွံလဝ်ရောၚ် ဝန်ဇၞော်ဍုၚ်သအာင်အဳရာန် အဗတ်သ် အာရက်ချဳ ဟီုဂးလဝ်ရ။
Source: Reuters