ဝါယှေန်တန်၊ မေ ၁၉။
နကဵုအဳရာန် သွက်ဂွံကေတ်ထောံ တၚ်တုပ်စိုတ်ပရေၚ်ၜိုဟ်လလံမွဲ ဗွဲမပြဟ်ဂှ် ဒးကၠောန်အာတုဲ ဟွံသေၚ်မ္ဂး သွက်ဍေံတံ မုလေဝ်သၟေဟ်သှ်ေဇးအာဟွံမာန်ပုဟ် ပ္ဍဲဂိတုမေ ၁၇ ဂှ် သမ္မတအမေရိကာန် ဒဝ်နယ်ထရ ထပ်ကဵုလဝ်သတိရ။
သ္ပပ္တံစနူကဵု အမေရိကာန် ကေုာံ အေတ်သရေတံ ဗတိုက်လဝ်အဳရာန် ပ္ဍဲဂိတုဖေဖဝ်ဝါရဳ ၂၈ တေံတုဲ အကြာအမေရိကာန် ကေုာံ အဳရာန်တံ ပဋိပက္ခ ဆက်တုဲ ကတဵုဒှ်မံၚ်ရ။
သွက်ဂွံတတ်ကၠောံအာ အကာဲအရာပရေၚ်ဒေါအ်ဒေၚ်ဒၟံၚ်တံဏံ နူကဵုအမေရိကာန် ဂစာန်မံၚ်ကီုလေဝ် သွက်ပေါဲပၞာန်ဂွံတုဲဒှ်အာဂှ်တှ်ေ ပရေၚ်တောတက်မွဲမွဲသာ် မုလေဝ်ဟွံဆဵုကေတ်ဏီပုဟ်။
ဟိုတ်နူပေါဲပၞာန်အဳရာန်ဂှ် အလုံဒေသလပါ်ဗၟံက်အဒေါဝ် ဒးဆဵုဂဗမံၚ်ပြသၞာတုဲ ၚုဟ်မးဇြဟတ်ဓါတ်တံလေဝ် သၠုၚ်တိုန်မံၚ်ရ။
“သွက်အဳရာန်တှ်ေ အခိၚ်အိုတ်မံၚ်ယျ၊ ဍေံတံယဝ်ရချဳဓရာၚ်ပြဟ်ဟ်မ္ဂး ခိုဟ်အိုတ်ရ၊ ဗီုဏံဟွံသေၚ်မ္ဂး သွက်ဍေံတံတှ်ေ မုလေဝ်သှ်ေဇးမာန်ဟွံသေၚ်ပုဟ်” သာ်ဝွံ သမ္မတ ထရ ချူလဝ် အပ္ဍဲမဳဒဳယာပရေၚ်မၞိဟ်ရ။
ဟိုတ်နူပေါဲပၞာန်တုဲ ပ္ၚံက်ၜဳဟဝ်မုဇ် မဒှ်ဒၞာဲကိစ္စဇၞော် သွက်ကၠေၚ်ဍေၚ်ဂၠးကဝ်တံ ကၟာတ်အာတုဲ ဟိုတ်နူအေတ်သရေ ဗတိုက်မံၚ်ဍုၚ်သၟာၚ်လေဗနွန်ဂှ်တုဲ အကာဲအရာတံလေဝ် ယှုက်ထုဲမံၚ်ရ။
ဂကောံဟေတ်ဇ်ဗိုလာ နွံသၟဝ်တဲ ပရေၚ်အထံက်ပၚ် အလဵုအသဳအဳရာန်ဂှ် သွက်ဂွံဂွံပရေၚ်ဒေါအ်ပန်ပှ်ောတန်တဴဍာ်ဇမၠိၚ် အပ္ဍဲလေဗနွန်မာန်ဂှ် အာတ်မိက်လဝ်ရ။
နူကဵုအဳရာန် တးပါဲမံၚ် သွက်ဂွံဒုၚ်တဲ တၚ်စၟတ်ပိုၚ်ခြာညးတေံတုဲ အေၚ်ဒုၚ်ဟွံမာန်ရောၚ် ထရ ဟီုလဝ်ရ။
ၜိုန်ရတုပ်လဝ်စိုတ် သွက်ဂွံဇမၠိၚ်အာယုက်ပရေၚ် ဒေါအ်ပန်ပှော်ပွိုၚ် ၄၅ တ္ၚဲကီုလေဝ် နူဂကောံဟေတ်ဇ်ဗိုလာ ဗတိုက်လဝ်အေတ်သရေ နကဵုကမ်သၠောဝ် ၂၀၀ မနွံမံၚ်ရောၚ် ပ္ဍဲဂိတုမေ ၁၇ ဂှ် ညးတာလျိုၚ်အေတ်သရေတံ ဟီုရ။
ဟိုတ်နူအေတ်သရေဗတိုက် ဒေသလပါ်သၠုၚ်ကျာဍုၚ်တုဲ ကောန်ၚာ်ၜါတၠပါလုပ် သီုမၞိဟ် ၅ တၠ ချိုတ်အာလဝ်ရောၚ် ဌာနဝန်ဇၞော်ပရေၚ်ထတ်ယုက်လေဗနွန် ဟီုရ။
ပ္ဍဲဂိတုအေဗရာ ၈ ဂှ် ဝါယှေန်တန် ကေုာံ တဳဟဳရာန်တံ ၜိုန်ရကေတ်ဂွံလဝ် တုပ်စိုတ်ဒေါအ်ပန်ပှ်ောကီုလေဝ် အရာပ္ညဳပ္ညပ်တံ ဒေါအ်ဒၟံၚ်တုဲ ပရေၚ်ပေါဲဗတိုက်တံ မွဲဏှမွဲဏှ က္တဵုဒှ်မံၚ်ရ။
သွက်ပေါဲပၞာန်ဂွံတုဲဒှ်အာ လတူဂလာန်အဳရာန်တံပတိုန်လဝ် အမေရိကာန်ကလေၚ်ခၠေဝ်လဝ်ဂှ်တှ်ေ ပရေၚ်ယှအ်ဗက်လဝ်ကဵု မုလေဝ်ဟၟဲပုဟ် ပ္ဍဲဂိတုမေ ၁၇ ဂှ် မဳဒဳယာအဳရာန် ဗၟံက်ထ္ၜးချူလဝ်ရ။
နူအမေရိကာန် ဂစာန်မံၚ် သွက်ဂွံသီကေတ် ယူရေနဳယာမ် မတောမ်သ္အးလဝ်အိုတ်သီု နူကဵုအဳရာန်တုဲ ဗက်ပြိုၚ်ပကာန်မံၚ် ပရေၚ်အာတ်မိက်တံအိုတ်ရ။
Source: AFP/nh