နေပျဳဒဝ်၊ ဂိတုမေ ၂၁
အလဵုအသဳပၞာန် စိုတ်ဆန္ဒမိက်ဂွံသဳကၠဳကဵု ဂကောံဇြဟတ်ရဲဒစဵုဒစးတံ လ္တူခုၚ်ယျဂှ် ထ္ၜးကၠုၚ်မံၚ်လစွံစိုတ်ရောၚ် ဝန်ဇၞော် ပရေၚ်ဍုၚ် သ္အာၚ်မလေယှာ ဒါတောတ်သရဳ မိုဟာမက်ဟာသာန် အခိၚ်ကၠုၚ်နေပျဳဒဝ်ဂှ် ဟီုလဴရ။
ပ္ဍဲဂိတုမေ ၁၉ ဂှ် ဝန်ဇၞော်ဍုၚ်သအာၚ်အလဵုအသဳပၞာန် ဥူတေန်မာၚ်သွိုယ် ကဵု ဝန်ဇၞော်ဍုၚ်သအာၚ်မလေယှာတံ ဆဵုဂဗတုဲ ကာလ ညးကလေၚ်စဴစိုပ်အာ နိဂီုဍုၚ်ညးဂှ် ကဵုဏာသမ္တီ ဟီုလဴလဝ်ကဵုအစာပရိုၚ်တံရောၚ်။
သွက်ဂွံဆဵုဂဗသဳကၠဳအာ လ္တူခုၚ်ဝိုၚ်သဳကၠဳ အကြာဂကောံဒစဵုဒစး ကေုာံ ဂကောံပၞာန်တံဂှ် နူမလေယှာ မၚ်ကဵုမံၚ်ပရေၚ်အရီုဗၚ်တုဲ ညံၚ်ဟွံဂွံဒှ်ဗီုပြၚ် ကဵုဇြဟတ်ဟရိုဟ်ဂှ်လေဝ် ဒးစွံအာသတိရောၚ် ဝန်ဇၞော်ပရေၚ်ဍုၚ်သအာၚ်မလေယှာ သ္ဂးရ။
ပ္ဍဲကာလသီအဝဵု ဒုဟ်အမှုရာဇာဝတ်ပၞာန် ကၠောန်လဝ်တံဂှ်ကီု ပွမ ပန်ဂစိုတ်လဝ်ညးဍုၚ်ကွာန်တံဂှ်ကီု မေန်အံၚ်လှိုၚ် ဒှ်မံၚ်ညးတာလျိုၚ် အဓိကမွဲတုဲ မုအရေဝ်ဂလာန်မှ သွက်ဂွံဟီုအာပရူပရာဟၟဲပုဟ် ညးလလောၚ်တြးပရိုၚ် NUG ဥူနေဖုၚ်လာတ် ကလေၚ်ခၠေဝ်လဝ်ရ။
တင်ပတဝ်က္ဍိုပ်ပရေၚ်ဍုၚ်ကွာန် ၆ တင် ဂကောံပၠန်ဂတးတံပတိတ်လဝ်ဂှ် ယဝ်ရ မၞိဟ်ဒပ်ပၞာန်တံ ဒုင်အာတာလျိုၚ်မာန်မ္ဂး အကာဲအရာပြံၚ်သၠာဲအာမာန်ရောၚ် ညးဟီုလဴကဵု ဌာန်ပရိုင်သြၚ်လောန်တိုၚ်မ်ရ။
“မေန်အံၚ်လှိုၚ်ဟွံသေၚ် တင်ပတဝ်က္ဍိုပ်ပရေၚ်ဍုၚ်ကွာန် ၆ တင် ဂကောံပၠန်ဂတးတံ ပတိတ်လဝ်ဂှ် ညးနွံအပ္ဍဲဒပ်ပၞာန်တံ ဒုၚ်တဲရ ၊ ယဝ်ရဒုၚ်ကဵုလျိုၚ်မ္ဂး အကာဲအရာပြံၚ်သၠာဲအာမာန် နွံညိရ။ ယဝ်ရသာ်ဂှ် ဟွံသေၚ်မ္ဂး ဗီုလဵုလေဝ် ဒှ်ဟွံမာန်ပုဟ်။ ဗီုဂှ်ဟွံသေၚ်မ္ဂး ဗီုလဵုလေဝ် သွက်ဂွံဒှ်အာဟွံမွဲပုဟ်။ ပရေၚ်ဏံဂှ်လေဝ် နူကဵုပွဳဗွိုၚ်ဂၠးကဝ်ကီု သီုဂကောံပၠန်ဂတးပိုဲတံကီု လလောၚ်တြးလဝ် ဗွဲမလုပ်သၞောဝ်တုဲဒှ်မံၚ်ယျ” သာ်ဝွံ သ္ဂးရ။
အပ္ဍဲဂိတုမာတ် တုဲကၠုၚ်တေံဂှ် အလဵုအသဳညဳသၟဟ်ကောန်ဂကူ NUG၊ CRPH သီုကဵု KIO၊ KNU၊ KNPP ကေုာံ CNF တံ ဒက်ပတန်လဝ် ကံၚ်သဳပၠတရဴ ဖိတ်ဒရေဝ် (SCEF) တုဲ တင်ပတဝ်က္ဍိုပ် ပရေၚ်ဍုၚ်ကွာန် ၆ တင်ဂှ် နဒဒှ် ပရေၚ်ဒတူလိုၚ်တင်တုပ်စိုတ်ဘုံ ထပ်သ္ပဒတန်ရောၚ်။
အပ္ဍဲတင်တံဂှ်မ္ဂး သွက်ဂွံပလီုထောံ သၞောတ်တၠအဝဵုပၞာန်ကေုာံ အရာဒပ်ပၞာန်ပါလုပ်မံၚ် အပ္ဍဲပရေၚ်ဍုၚ်ကွာန်ဂှ် ဒးဖအိုတ်အာတုဲ သီုကဵုသွက်ဂွံပလီုထောံ သ္ဇိုၚ်သၞောဝ်ဥပဒေ ၂၀၀၈ ကေုာံ သၞောဝ်ဥပဒေနာနာ အရာဂစာန် ကလေၚ်ပၠုပ်မံၚ်လမျီုတံဂှ်လေဝ် ဒးဗတိုက်ပလီုအာသီုဖအိုတ်ရောၚ် ပါလုပ်ကီုရ။
တုဲပၠန် ညးဆေၚ်စပ်တံသီုဖအိုတ် သွက်ဂွံချူခၞံအာ သ္ဇိုၚ်သၞောဝ်ဥပဒေ ဒုၚ်သ္ဇိုၚ်ကဵုသၞောတ်ဖိတ်ဒရေဝ် ကေုာံ ဒဳမဝ်ကရေဇြဳ သီုအလုံဖအိုတ်ဒုၚ်တဲမာန်တုဲ နူကဵုဥပဒေဏံဂှ် သွက်ဂွံဒက်ပတန်အာ နိဂီုကၟိန်ဍုၚ်ပံၚ်ကောံ ဖိတ်ဒရေဝ်ဒဳမဝ်ကရေဇြဳတၟိ မဒှ်ရ။
ပ္ဍဲဂိတုအေဗရာတုဲကၠုၚ်ဏံ နူဂကောံအလဵုအသဳ ဥူမေန်အံၚ်လှိုၚ်က္ဍိုက်ပ်တံ အပ္ဍဲပွိုၚ် ၁၀၀ တ္ၚဲဏံ သွက်ဂွံဆဵုဂဗသဳကၠဳအာကဵု ဂကောံရပ်လွဟ်ကောန်ဍုၚ်အရၚ် EAO ဒေါအ်လဝ်ပန်ပှော်တံကီု သီုကဵုဂကောံ ဟွံထ္ပက်လဝ်စၟတ်တဲဒေါအ်ပန်ပှော်တံကီု ကော်ဘိက်လဝ်ရ။
အကြာဂှ် ဂကောံထ္ပက်လဝ် NCA ကီုလေဝ် မုလေဝ်ပရေၚ်ဆဵုဂဗ သဳကၠဳလဝ်ဟၟဲ အပ္ဍဲပွိုၚ် ၅ သၞာံသီလဝ်အဝဵုဏံ ကုဗော်သွး ကောန်ဂကူကရေၚ် KNU၊ ဗော်ပၠတရဴကောန်ဂကူချေၚ် CNF ကေုာံ ဒပ်ပၞာန်ကွးဘာ ABSDF တံဂှ် စုတ်ယၟုတုဲ ကော်ဘိက်လဝ်ကီုရောၚ်။
ပ္ဍဲအကာဲအရာဏံ နူကဵုဝန်ဇၞော် ဍုၚ်သအာၚ်မလေယှာမွဲအဆံၚ် လ္တူအလဵုအသဳပၞာန် လစွံစိုတ်နွံမံၚ် မိက်ဂွံသဳကၠဳကဵု လပါ်ရဲဒစဵုဒစးတံ ဟီုဂှ် ယဝ်ရ ဒက်ပတန်ဂလာန်ပတှ်ေဟွံမာန်မ္ဂး မုလေဝ်ကၠောန်ဟွံဂွံပုဟ် ညးအခေါင်ဟီုဂးနွံ KNU ပဒိုသဝ်တဝ်နဳ သ္ဂးလဝ်ရ။
“ဟီုမံၚ်ဗီုဏံဂှ် လံမံၚ်ယျ။ ယဝ်ရ ထ္ၜးနတဲနဇိုၚ်မာန်ကီု ယဝ်ရဒက်ပတန်ဓဝ်ပတှ်ေဇေတ်တ်ဟွံမာန်မ္ဂး နူလပါ်ပိုဲတံလေဝ် မုဟွံမိက်ဟီုဂၠိုၚ်ၚ်ပုဟ်။ အဓိကမိက်ဂွံဟီုဂှ်တှ်ေ ယဝ်ရဒက်ပတန်ဂလာန်ပတှ်ေဟွံမာန်မ္ဂး မုလေဝ်ကၠောန်ဟွံဂွံပုဟ်ဂှ် မိက်ဂွံဟီုရအဴ” သာ်ဝွံ သ္ဂးရ။
တရဴနေပျဳဒဝ် ဝန်ဇၞော် ပရေၚ်ဍုၚ်သအာၚ်မလေယှာဝွံ ကြဴနူသဘၚ်ကောံဓရီုအာသဳယာန် က္ဍိုပ်သ္ကိုပ်အဆံၚ်သၠုၚ် ကၠောန်လဝ်အပ္ဍဲဍုၚ်ဖိလေတ်ပိုၚ်တုဲ သွက်ဂွံလ္ၚတ်အကာဲအရာ ပရေၚ်ဍုၚ်ဗၟာလၟုဟ် အာလဝ်စိုပ်လဝ်မဒှ်ရောၚ်။
ဝန်ဇၞော်ဍုၚ်သအာၚ်ၜါဍုၚ်တံ သဳကၠဳမံၚ် သွက်ဂွံသၠုၚ်ပတိုန် ပရေၚ်ပံၚ်တောဲဆက်ဆောံကၠောန်အာ အကြာမလေယှာကဵု ဗၟာ သီုကဵုကိစ္စ ပရေၚ်အာသဳယာန်တံရောၚ် အပ္ဍဲလိက်ပရိုၚ်တြးဝါဒ အလဵုအသဳတံ နူလပါ်အလဵုအသဳပၞာန် လလောၚ်တြးလဝ်ရ။
မွဲလပါ်ပၠန် သွက်ဂွံကလေၚ်ထိၚ်ချုက် ဒေသ ဒးဗလးလဝ်တဲ တံမာန်ဂှ် စကာသုၚ်စောဲ နကဵုဇြဟတ်ပၞာန် ဇၞော်ကဵုဇြဟတ်တုဲ ထပက်မံၚ်ကရောၚ်ပၞာန်ကီု၊ ရဲ PDF လၟိဟ်ကၠံပြၚ် ဖျေံလွဟ် လုပ်ကၠုၚ် ဗွိုၚ်ဥပဒေနွံမံၚ်ရောၚ် သ္ဂးရ။
ဒေသ KNU ကဵု ဂကောံပံၚ်တောဲတံ သီထိၚ်ချုက်ဂွံလဝ် ဒၞာဲဍုၚ်ကူသာန်ဗၞိက် ဒေသပယျဵု သေံ-ဗၟာ ရးတနၚ်္သာရဳ ဍုၚ်မဝ်တံၚ်ဂှ် ပ္ဍဲဂိတုမေ ၁၉ ဏံ ဒပ်ပၞာန်ကလေၚ်ထိၚ်ချုက်ဂွံတုဲယျ လိက်ပရိုၚ်အလဵုအသဳတံ ချူလဝ်ရ။
တုဲပၠန် ရဲဂကောံ PDF ပတေဟ်ဒုၚ်တဲ ပရေၚ်ၜိုဟ်လလမ်ဒပ်ပၞာန်တံ မၞိဟ်တြုံ ၂၇၇ တၠ ကေုာံ မၞိဟ်ဗြဴ ၃၅ တၠတံ သီုကဵုလွဟ်ကဵုလွဟ်မကမ်တံ ထပ်လုပ်ကၠုၚ်ဗွိုၚ်ဥပဒေပၠန်ရဂှ် အလဵုအသဳပၞာန် တြးလဝ်ဝါဒရောၚ်။
အပ္ဍဲကိုန်အစဳဇန်ပွိုၚ် ၁၀၀ တ္ၚဲ အလဵုအသဳပၞာန်ဂှ် ကော်ဘိက်လဝ် PDF တံ ညံၚ်ဂွံလုပ်ဖျေံလွဟ်ကီုလေဝ် သွက်ဂွံထပိုတ်ရိုဟ်ကၞက် သၞောတ်တၠအဝဵုပၞာန်ဂှ် နူလပါ်ဂကောံပၠန်ဂတးတံ ဆက်ဗတိုက်အာရောၚ် ကဵုလဝ်သမ္တီရ။
ပရိုၚ် – သြင်လောန်တိုၚ်မ်
Photo – MOI