ဗြဝတဳ ၊ မေ ၂၂
အပ္ဍဲတွဵုရးကရေၚ် လ္တူဍုၚ်ဗြဝတဳ သွက်ဂွံယိုက်ဝန်ပၞာန်ကေတ်ကောန်ပၞာန်တၟိဂှ် နူဒပ်ပၞာန်ဗၟာတံၚ်ပဝ်တာကီု ဂကောံရပ်လွဟ်ဒေါအ်ပန်ပှော် ဒပ်ပၞာန်ကရေၚ်ပတုဲဖဵုဒဳမဝ်ကရေဇြဳ DKBA လေဝ် ရပ်ကော်ဏာသၟတ်လ္ၚဵုတံတုဲ ပကောံမံၚ်ကောန်ပၞာန်တၟိရောၚ် ညးဍုၚ်ကွာန်တံ ဟီုလဴကဵု ဌာန်ပရိုင်သြၚ်လောန်တိုၚ်မ်ရ။
အပ္ဍဲဍုၚ်ဗြဝတဳ ဒှ်ပယျဵု သေံ-ဗၟာဂှ် ကြဴနူဒပ်ပၞာန်ဗၟာ ကလေၚ်ထိၚ်ချုက်လဝ်ဂှ် ပရေၚ်တံၚ်ပဝ်တာရပ်ချုက်တံ ကၠောန်ကၠုၚ်မံၚ်အဆက်က်တုဲ ဗွဲတၟေၚ် ရဲကၠုၚ်ကၠောန်စ နူဒေသဌာန်သ္ၚောဲ စိုပ်ကၠုၚ်လ္တူဍုၚ်ဗြဝတဳကဵု ကွာန်ပွဳဗွိုၚ်တံဂှ် သ္ပလဝ်ပွန်ကဵု သၟာကမၠောန်ဆုဲပြံၚ်တံရောၚ်။
ဟိုတ်နူဒပ်ကဝ်မယှေန်ပၞာန် တံၚ်ပဝ်တာရပ်မံၚ်ဂှ်ရ ရဲကၠောန်စ နူဒေသဌာန်သ္ၚောဲ စိုပ်မံၚ်ဍုၚ်ဗြဝတဳ သၟာကမၠောန်ဆုဲပြံၚ်ဗွဲမဂၠိုၚ်တံ ဒးဒုၚ်ရပ်ဏာ သွက်ဂွံယိုက်ဝန်ပၞာန်တုဲ လ္ၚဵုဂှ်နုက်ကဵုသြန်တုဲ ကလေၚ်ဗၠးကၠုၚ်နွံကီုလေဝ်၊ လ္ၚဵုဂှ် နုက်ကေတ်လေဝ်ဟွံဂွံ ဒှ်မံၚ်ရောၚ် ညးဍုၚ်ကွာန်တံသ္ဂးရ။
တုဲပၠန် ဗွဲကြဴဏံလေဝ် ဂကောံရပ်လွဟ်ကရေၚ် ဒေါအ်ပန်ပှော် ဒပ်ပၞာန်ကရေၚ်ပတုဲဖဵု ဒဳမဝ်ကရေဇြဳ DKBA ရပ်ဏာ ရဲကၠုၚ်ကၠောန်စလ္ၚဵု နူဒေသဌာန်သ္ၚောဲ စိုပ်မံၚ်လ္တူဍုၚ်ဗြဝတဳတံဂှ် ယဝ်ရ မိက်ဂွံကဵုဗလးမ္ဂး ဒးနုက်ကဵုမံၚ်သြန်ရောၚ် ညးဒေသဗြဝတဳတံ ဟီုရ။
ရဲသၟာကမၠောန်ဆုဲပြံၚ်လ္ၚဵု ဒပ် DKBA ရပ်ဏာတံဂှ် ဗလံၚ်ဏာ ဒေသကျံက်ခက် ဒၞာဲဒေသ ဒုသ္ကိုပ်ပၞာန် သဝ်ကျဝ်လှ ထိၚ်ချုက်လဝ်ဂှ်တုဲ ကဵုတန်ဗတောန်ကွတ်ပၞာန်သ္ဇိုၚ် ပကောံကေတ်မံၚ် သွက်ကောန်ပၞာန် DKBA တၟိတၟိတံကီု ပ္ဍဲကဵုဘာတန်ဗတောန်ကွတ်ပၞာန်ဒပ် DKBA ဂှ်တှ်ေ သၟတ်အာယုက်ဟွံပေၚ်တံပါလုပ်မံၚ် ဗွဲမဂၠိုၚ်ရောၚ် ဂွံတီနူရိုဟ်ကၞက်ပရိုၚ်အပ္ဍဲဒေသဂှ်ရ။
အပ္ဍဲဍုၚ်ဒေသပယျဵု ဗြဝတဳ အဓိကဒပ်ကဝ်မယှေန်ပၞာန် ထိၚ်ချုက်လဝ်တုဲ ဂကောံရပ်လွဟ်ကရေၚ် ဗွဲမဂၠိုၚ်ကီု ဒပ်မၚ်ပယျဵု ကရေၚ် BGF၊ ကံၚ်သဳပရေၚ်ၜိုဟ်လလမ်ကရေၚ် KNU/KNLA PC၊ ဒပ်ပၞာန်ကရေၚ်ပတုဲဖဵု ဒဳမဝ်ကရေဇြဳ DKBA၊ ဒပ်ပၞာန်ကောန်ဂကူ ကရေၚ် KNA တံကဵု ဒပ်မၚ်ကွာန်ဒေသ သၟဝ်တဲ ကဝ်မယှေန်ပၞာန် တံလေဝ် ချဳဒရာၚ်မံၚ်ကီုရ။
ပရိုၚ် – သြင်လောန်တိုၚ်မ်
Photo – DKBA