ဇြပ်ဗု၊ မေ ၂၁
အပ္ဍဲကဵုသ္ကုတ်ဂၠံၚ်ပွိုၚ်ဍုၚ်ဇြပ်ဗု တွဵုရးမန်ဂှ် ပ္ဍဲအကြာတ္ၚဲတံဏံ ပရူပရာဂစိုတ်မၞိဟ် ကၠဟ်ထောံလဝ်ဇွတံ ဆက်က်ဒှ်မံၚ်တုဲ လ္တူပရေၚ်ဂီုကၠီုညးဍုၚ်ကွာန်ဒေသတံဂှ် ဒှ်မံၚ်ပရေၚ်ဘပဠ ဇၞော်ကဵုဇြဟတ်ရ။
ဂိတုမေ ၁၄ တုဲကၠုၚ်တေံ ဒကဲသ္ကုတ်ဂၠံၚ် ရေဝ်-ဇြပ်ဗု ကွာန်သခါန်ဂျဳ ပွိုၚ်ဍုၚ်ဇြပ်ဗုဂှ် မၞိဟ်တြုံ ၃ တၠ ဗက်လိၚ်လံက်ကၠေၚ်တိတံဂှ် ဒးဒုၚ်ကၠေၚ်ဒက်လဝ်ကဵုဇုက် ပန်ဂစိုတ်လဝ်ကဵုသေနတ်တုဲ ကၠဟ်ထောံ စွံလဝ်ဇွတံဂှ်ရောၚ်။
တုပ်သာ်ဂှ်ကီု ဂိတုမေ ၂၀ ဂှ်လေဝ် ပ္ဍဲသ္ကုတ်ဂၠံၚ်ကွာန်ပြဳ ပွိုၚ်ဍုၚ် ဇြပ်ဗုဂှ် နူဌာနကမၠောန် ပရေၚ်ဆက်စၠောံဗၟာ သၞာဲဒါ MPT ၂ တၠ ကၠုၚ်ဗပေၚ်ကၠေၚ် တိုၚ်တာဝါဖုၚ်တံဂှ်လေဝ် ကၠေၚ်ဒက်လဝ်ကဵု ဇုက်တုဲ ဂစိုတ်မၞိဟ် ကၠဟ်ထောံလဝ်ဇွ ထပ်ဒှ်လဝ် မွဲဝါပၠန်ရ။
မၞိဟ်ဒးဒုၚ်ရပ်ဂစိုတ်လဝ်တံဏံဂှ် ကြဴနူဒးဒုၚ် ၜုၚ်တက်ပျဲပျာံ ဓဇန်တုဲမ္ဂး ပ္ဍဲကဵုက္ဍိုပ်၊ ပဠက်ကဴ၊ ကအ် ကေုာံ သြိုဟ်တံဂှ် နကဵု တင်ရန်တၟံနွံနွံ ပန်ဂစိုတ်လဝ်ကဵု သေနတ် မဒှ်ရ။
ပ္ဍဲသ္ကုတ်ဂၠံၚ်ဇြပ်ဗုဂှ် ၜိုန်ရဂၠာဲဆဵုဇွ ဒးဒုၚ်ဂစိုတ်လဝ်သာ်ဏံကီုလေဝ် ညးကလိကၠောန်လဝ်ဒုဟ်တံဂှ် ထမံက်ပတိတ်ဟွံမာန်၊ ပရေၚ်အုပ်လဒမ်သၞောဝ်ဓဝ်ဥပဒေ ကၠေံဗ္ဒန်ကၠုၚ်မံၚ်တုဲ လ္တူပရေၚ်ဂီုကၠီု ညးဒေသတံမ္ဂး ပရေၚ်ဒှ်ဂဝိၚ်စံၚ်တူ သၠုၚ်တိုန်အာ ဗွဲမလောန်ရ။
ဟိုတ်နူပရူပရာ ဂစိုတ်မၞိဟ်ကၠဟ်လဝ်ဇွ ဗီုဗီုတံဏံတုဲ ယဝ်ဒးတိတ်တရဴမ္ဂးတှ်ေလေဝ် ညံၚ်ရဴဟၟဲကဵုပရေၚ်ဂီုကၠီုဒှ်မံၚ်တုဲ ကောံဂစိုတ်မၞိဟ်မွဲတၠ လောဲသွာမံၚ်ဏံဂှ် ဂကောံလဵုမှဒုၚ်တဲဟွံမာန်ပုဟ် ညးဒေသဇြပ်ဗုမွဲတၠ ဟီုလဴကဵု ဌာန်ပရိုင်သြၚ်လောန်တိုၚ်မ်ရ။
“အာတရဴလေဝ် ပရေၚ်ဂီုကၠီုဟၟဲ၊ ညးလဵုမွဲလေဝ် ဟွံဒုၚ်တာလျိုၚ်။ သၟာန်လပါ်ဏံလေဝ် ဟွံတီလပါ်တေံ၊ သၟာန်လပါ်တေံလေဝ် ဍေံတံဟွံသေၚ် ဟီုမံၚ်တှ်ေ ညးလဵုမွဲကၠောန်မံၚ်ရောဂှ် ဟွံတီညာတ်ရ။ ပ္ဍဲအကြာဏံ ညးဍုၚ်ကွာန်ဟၟဲကဵုဒုဟ်တံဂှ် ညံၚ်ရဴ ဂစိုတ်ကောန်စာၚ် ကောန်အဒါတံ ဂစိုတ်မံၚ်ဂှ် ရုပ်ရဴပရေအ်ကွေံကွေံရ။ ပ္ဍဲအရာကိစ္စဏံ ပိုဲတံ ညးလေဝ်ဒုၚ်တဲဟွံမာန်ပုဟ်” သာ်ဝွံ သ္ဂးရ။
တုဲပၠန် ဟိုတ်နူဒှ်အရာကၠောန်လဝ် ပရေၚ်ဟၟဲကဵုဥပဒေတုဲ ညးဒေသတံသၟးဟွံက သီုရဲဆုဲပြံၚ် မၞိဟ်ကၠုၚ်ကၠောန်စတံ ယဝ်ရ တိတ်ဂၠံၚ်မ္ဂး ပရေၚ်ဂီုကၠီုဟၟဲတုဲ သွက်ဂွံအာကမၠောန် စဴကၠုၚ် နူကမၠောန်တံဂှ် ဒးအာကၠုၚ်မံၚ် နကဵုစိုတ်ဂဝိၚ်ရောၚ် ညးဆက်ဟီုရ။
ဟိုတ်နူပရူပရာ ဂစိုတ်မၞိဟ်ကၠဟ်ထောံလဝ်ဇွဏံ ဒှ်မံၚ်မွဲဏှမွဲဏှတုဲ စနူကဵုပရေၚ်အာတရဴတံဂှ် ဒှ်မံၚ်အခက်အခုဲ ဗွဲမလောန်ရောၚ် ညးဒေသဇြပ်ဗု တၞဟ်မွဲတၠပၠန် ဟီုလဴကဵု ဌာန်ပရိုင်သြၚ်လောန်တိုၚ်မ်ရ။
“လပါ်ပိုဲတံမ္ဂး ပရေၚ်တံဏံဂှ် ဒှ်မံၚ်မွဲဏှမွဲဏှရ။ ဒးမိၚ်မံၚ်တွဵုရ။ ဒှ်ကၠုၚ်တှ်ေလေဝ် ဟွံခိုဟ်ပုဟ်။ ဒှ်မံၚ်မွဲဏှမွဲဏှကီုရ။ ပ္ဍဲအရာအာကၠုၚ်ဂှ် ဒှ်မံၚ်ဒဒိုက်ညိညနွံရ၊ ပရေၚ်တိတ်အာတရဴ ဟွံခိုဟ်ပုဟ်” သာ်ဝွံ သ္ဂးရ။
အပ္ဍဲပွိုၚ်ဍုၚ်ဇြပ်ဗု ဒှ်မံၚ်ပရူပရာ ဂစိုတ်မၞိဟ်ကၠဟ်ထောံလဝ်ဇွအဆက်က်တံဂှ် ဂကောံရပ်လွဟ်လဵုမွဲလေဝ် ဟွံဒုၚ်တာလျိုၚ်တုဲ ပရေၚ်ထမံက်ပတိတ် ရပ်စပ်ကေတ်အရေဝ်တံ ဟၟဲဏီပုဟ်။
အပ္ဍဲပွိုၚ်ဍုၚ်ဇြပ်ဗု ဂကောံရပ်လွဟ်နွံမံၚ်တံဂှ်တှ်ေ ဒပ်ပၞာန်သီအဝဵု၊ ဒပ်ဗၠာဲသၟိၚ်၊ ဗော်ဍုၚ်မန်တၟိ (NMSP) ဒေါအ်ပန်ပှော်၊ ဗော်ဍုၚ်မန်တၟိ-ဒစဵုဒစးတၠအဝဵုပၞာန် (NMSP AD)၊ ဒပ်ပၠန်ဂတးဍုၚ်မန် (MSRF)၊ ဒပ်ပၞာန်ဗၠးၜးကောန်ဂကူကရေၚ် (KNLA) တံလေဝ် ချဳဒရာၚ် သွာၚ်ပရေၚ်ပၞာန် နွံမံၚ်ရ။
တုဲပၠန် ဒပ်ဒုၚ်သြဇာသၟဝ်တဲဒပ်ပၞာန် ဒပ်မၚ်ကွာန်ဒေသတံကီု၊ ဒပ်စဵုဒၞာဍုၚ်မန် (MSDF)၊ ဒပ်စဵုဒၞာညးဍုၚ်ကွာန် (PDF)၊ ဒပ်မၚ်ပယျဵုကရေၚ် (BGF) သီုကဵုဒပ်ပၞာန်ကရေၚ် (DKBA) လ္ၚဵုတံလေဝ် ပရေၚ်ချဳဒရာၚ်အာကၠုၚ်နွံမံၚ်ကီုရ။
ပရူပရာကိစ္စတံဏံဂှ် နူကဵုဂကောံရပ်လွဟ်ဆေၚ်စပ်တံ ညံၚ်ဂွံစၟဳစၟတ်ထမံက်ပတိတ်ကဵုတုဲ ပွမဂစိုတ်မံၚ်ညးဍုၚ်ကွာန် ကောန်အရာပ်တံ ဟၟဲကဵုဟိုတ်ပရူပရာဗီုဗီုတံဏံ သွက်ဂွံဒေါအ်ထောံမာန် ညံၚ်ဂွံ ဘိုၚ်ထိၚ်ဒဝ်ကဵုညိဂှ် ညးဒေသတံအာတ်မိက်လဝ်ရ။
ပရိုၚ် – သြင်လောန်တိုၚ်မ်
Photo – CJ