ဗေကျေန်၊ မေ ၂၁
အပ္ဍဲသတ္တဟတုဲကၠုၚ်တေံ ကြဴနူသမ္မတအမေရိကာန် ဒဝ်နယ်ထရ ကေုာံ သမ္မတကြုက် ယှဳကျေအ်ဖျေန် တံ ဆဵုဂဗကၠုၚ် ပ္ဍဲဗေကျေန်တုဲ ဍုၚ်ကြုက် သ္ပဒတန် သွက်ဂွံရာန်ကေတ် ၜင်ကျာ ဗိုဝ်ရေၚ် ၂၀၀ မ ရ။
အတိုၚ်ပရေၚ်တင်တုပ်စိုတ်ဂှ်မ္ဂး နူလပါ်အမေရိကာန် သ္ဂောံဒုၚ်ကဵုလျိုၚ် ညံၚ်ဂွံထံက်ပၚ်ကဵုအာ စက်က္ၜၚ်ကျာ ကေုာံ ကပေါတ်ဆက်စပ်တံ ကုဍုၚ်ကြုက်ရောၚ် ဌာနဝန်ဇၞော်ပရေၚ်ပိုန်ဒြပ်ကြုက် ဟီုလဴ ပ္ဍဲဂိတုမေ ၂၀ ရ။
ဍုၚ်သီုၜါလပါ်ဝွံ သွက်ဂွံဆက်အာအာယုက် စပ်ကဵုတင်တုပ်စိုတ်ပရေၚ်အကံက်ခေါန် တုပ်လဝ်စိုတ် အပ္ဍဲဂိတုအံက်တဝ်ဗါတေံဂှ်လေဝ် သွက်ဂွံရေၚ်တၠုၚ်ကၠောန်အာတုဲ သွက်ဂွံယှအ်ဖျေံအကံက်ခေါန်တံ စဵုကဵု ၃၀ ဗဳလဳယာန်ဒဝ်လာရောၚ် ဌာနဝန်ဇၞော်ပရေၚ်ပိုန်ဒြပ်ကြုက် သ္ဂးရ။
ကြဴနူတရဴ ဒဝ်နယ်ထရ တုဲအာ ၜိုတ်မွဲၜါတ္ၚဲ ပ္ဍဲအခိၚ် သမ္မတရတ်ယှာ ဗလာဒဳမာ ပူတေၚ် ကေုာံ ယှဳကျေအ်ဖျေန် တံ ဆဵုဂဗမံၚ်ဂှ် ပရေၚ်လလောၚ်တြးဏံ မံက်တိုန်ကၠုၚ် မဒှ်ရ။
အပ္ဍဲတရဴ ဒဝ်နယ်ထရ အာဍုၚ်ကြုက်ဂှ် သွက်သၟာဗ္ၚအမေရိကာန်တံ ဂွံလုပ်စိုပ်ဗွိုၚ်ဖျာကြုက်တံဂၠိုၚ်တိုန် ကေုာံ ပွမရာန် ၜင်ကျာ ဗိုဝ်ရေၚ်တံကီု သီုကဵု ဂတိဝတ် ဆေၚ်စပ်ကဵုပရေၚ်ကူသာန်ဗၞိက် အကြာဍုၚ်ပရေၚ်ပိုန်ဒြပ် ဇၞော်အိုတ် ပ္ဍဲဂၠးကဝ်ၜါဏံ နွံကၠုၚ်လဝ်ဗွဲမဂၠိုၚ်ရ။
“သီုကဵုက္ၜၚ်ကျာဗိုဝ်ရေၚ်ပိုဲတံ လၟိဟ် ၂၀၀ ပြၚ် ဂွံလဝ် တင်တုပ်စိုတ်ကူသာန်ဗၞိက် ဇၞော်ဇၞော်ဗွဲမဂၠိုၚ်ရ။ သွက်ဂွံထံက်ပၚ်ကဵုအာ က္ၜၚ်ကျာ ၇၅၀ မလေဝ် စွံလဝ် ဂတိဝတ် ကီရ။ အရာဏံဝွံ သ္ဂောံဒှ်တင်တုပ်စိုတ် ဇၞော်အိုတ်မွဲရောၚ်” သာ်ဝွံ ဒဝ်နယ်ထရ ကြဴနူတိတ်ကၠုၚ်နူဍုၚ်ကြုက်တုဲ ပ္ဍဲလ္တူက္ၜၚ်ကျာ Air Force One ဂှ် ဟီုလဴကဵုလဝ် အစာလိက်ပရိုၚ် တံရ။
အပ္ဍဲတရဴ ဒဝ်နယ်ထရ အာဍုၚ်ကြုက်ဏံ မွဲကရောံကဵုဂကောံညးစၞးအမေရိကာန်တံဂှ် ဂဥုပ်သ္ကိုပ်ကုမ္ပဏဳဗိုဝ်ရေၚ် ကယ်လီ အဝ်ဗာတ် လေဝ် ပါလုပ်အာကီုရ။
တရဴပိုဲတံအာလဝ်ဍုၚ်ကြုက်ဂှ် အံၚ်ဇၞော်ဗွဲမလောန်တုဲ သွက်ဂွံကလေၚ်ပံက်ဗွိုဝ်ဖျာကြုက် ဒှ်ရန်တၟံအဓိကပိုဲတံဂှ် အာစိုပ်ဒတုဲယျရောၚ် ပ္ဍဲလလောၚ်တြးကုမ္ပဏဳဗိုဝ်ရေၚ် ချူလဝ် ရ။
ကိုပ်ကၠာ ဒဝ်နယ်ထရ ကေုာံ ယှဳ ဟွံဂွံဆဵုဂဗဏီဂှ် ပ္ဍဲဂိတုအံက်တဝ်ဗါ ၂၀၂၅ ပ္ဍဲဍုၚ်ကိုဝ်ရိယျာသၠုၚ်ကျာဂှ် ညးတာလျိုၚ်ကြုက် ကေုာံ အမေရိကာန်တံ အာကေတ်လဝ်တင်တုပ်စိုတ် အပ္ဍဲဍုၚ်ကွာလာလာမ်ပူ ဍုၚ်မလေယှာရ။
အပ္ဍဲပရေၚ်တင်တုပ်စိုတ်ဂှ်မ္ဂး သွက်ဂွံယှအ်ဖျေံအကံက်ခေါန်အမေရိကာန် လ္တူကပေါတ်ပ္တိတ်နူကြုက်တံ ကေုာံ သွက်ဂွံဒေါအ်ထောံအရာပရေၚ်မာတ်လဝ် တိဝါတ် ကေုာံ ပသဲဗာန် နူကြုက်တံ ပါလုပ်မံၚ်ရ။
Ref:BBC