မတ်မလီု ၊ မေ ၂၂
အတိုၚ်တင်နၚ် ပရေၚ်ပူဂဵုမၞိဟ် အလဵုအသဳပၞာန်နွံမံၚ်ပၟိက်တံဂှ် စုတ်လဝ် ပ္ဍဲသၞောတ် PSMS တုဲ မၚ်ရံၚ်အာဒၞာဲဇိုၚ် ဍံၚ်ဗက်မံၚ်လက်ကရဴ ကၠောန်မံၚ်ရောၚ် “ဂကောံရမျှာၚ်” လလောၚ်တြး ပတိတ်လဝ် ပ္ဍဲဂိတုမေ ၂၀ ဂှ်ရ။
တုဲကၠုၚ်ပ္ဍဲဂိတုအေဗရာတေံ ဒက်ပတန်လဝ် အလဵုအသဳတၟိ ဒုၚ်သ္ဇိုၚ်ကဵုသွဟ်ပေါဲရုဲမာဲအလီ လ္တူဒပ်ပၞာန်ကၠောန်လဝ်တုဲ နူဂိတုစကော်ကၠုၚ်လဝ် ကောံဓရီုစၠတ်ထဝ်ဂှ် စပ်ကဵုအကာဲအရာ ပရေၚ်အခေါၚ်ဟီုဂးဗၠးၜးတံဂှ် ဂကောံရမျှာၚ် လ္ၚတ်ခါတ်လဝ် အကာဲနွံရောၚ်။
အတိုၚ်တင်နၚ် လိက်လလောၚ်တြး Spring Revolution Database SRD မ္ဂး ပ္ဍဲအခိၚ်လၟုဟ် ဒပ်ပၞာန်စသုၚ်စောဲမံၚ် PSMS Application Version 1.2 တုဲ တင်နၚ်ပရေၚ်ပူဂဵု ပူဂဵုမၞိဟ်ဍေံတံ နွံမံၚ်ပၟိက် ပွဳပွူၜိုတ် ၅၀,၀၀၀ တံဂှ် စုတ်လဝ်ရောၚ် သ္ဂးရ။
ညးဗၠးတိတ်ကၠုၚ် နကဵုအခေါၚ်သၠးဒုဟ်ဒဏ်တံ ကေုာံ ကောန်ဇာတ်ကၟိန်သ္ၚိဌာန် ရဲသဟာဲတံဂှ် နကဵုနဲကဲပညာ မၚ်ရံၚ်မံၚ်လၟိန် အဆက်က် တုဲ သီုကဵုစၟဳစၟတ်ကရေပ် ပူဂဵုမၞိဟ် ကေုာံ နကဵုသၞောတ် မၚ်ရံၚ်ထံၚ်အာပရိုၚ် PSMS မၚ်ရံၚ်ဒၞာဲဇိုၚ် ဍံၚ်ဗက်မံၚ်လက်ကရဴကြပ်ပ်တံဂှ် ကၠောန်မံၚ်ရောၚ်။
ဟိုတ်နူကဵု ဒးဒုၚ်မၚ်ရံၚ်မံၚ် နကဵုနဲကဲပညာခေတ်တၟိတံတုဲ သွက်ရဲဗၠးတိတ်ကၠုၚ်လဝ်နူထံၚ်တံ ညံၚ်သ္ဂောံလုပ်စိုပ်အာ အကြာပွဳပွူ ဗွိုၚ်မၞိဟ် သၠဲလးသၠးပွးအာမာန်ဂှ် ဒှ်မံၚ်အခက်အခုဲတုဲ ဍေံတံ ဆက်ဂစာန်ဆေဝ်ဒဝ်လဝ် ဂလာန်ပတေဟ်ပရေၚ်ဍုၚ်ကွာန်ကဵု ပွမဟီုဂးထမံက်ထၜးနာနာတံရောၚ် ဂကောံရမျှာၚ် သ္ဂးရ။
ကြဴနူဒပ်ပၞာန်သီအဝဵု ဒက်ပတန်အလဵုအသဳ ပြံၚ်လဝ်ဗီုပြၚ်တုဲ ၜိုန်ရ ကဵုလဝ်အခေါၚ်သၠးဗၠးဒုဟ်ဒဏ် ၜါဝါ ကု ကောန်ထံၚ် ၄၃၀၀ ပြၚ်ကီုလေဝ် နူကဵုထံၚ်အလုံမွဲဍုၚ်ဂှ် ကောန်ထံၚ် သီုဖအိုတ် ၃၁၀၀ ပြၚ်ဓဝ် ဂွံဗၠးတိတ်ကၠုၚ်လဝ်ရောၚ် နူဇာဖိုၚ်ကောန်ထံၚ် ပရေၚ်ဍုၚ်ကွာန် ကဵုလဝ်သမ္တီရောၚ်။
အကြာမၞိဟ်ဗၠးတိတ်ကၠုၚ်တံမ္ဂး ကောန်ထံၚ်ပရေၚ်ဍုၚ်ကွာန် သီုဖအိုတ် နွံၜိုတ် ၃၀၀ တုဲ ပရေၚ်ကဵုလဝ်အခေါၚ် သၠးဗၠးဒုဟ်ဒဏ်ကု ကောန်ထံၚ်ပရေၚ်ဍုၚ်ကွာန် ယၟုဒယှ် သမ္မတ ဥူဝေန်မျေအ်ဂှ် နကဵုအလဵုအသဳပၞာန် ဂစာန်မံၚ် ညံၚ်ဂွံဂွံပရေၚ်ဓဝ်ပတေဟ် ကေုာံ သွက်ပွဳဗွိုၚ်ဂၠးကဝ်တံ ဂွံဒုၚ်တဲရောၚ် ဗ္စာတော်ရံၚ် ညာတ်ကေတ်မာန်ရ။
တုဲပၠန် ကောန်ထံၚ်ပရေၚ်ဍုၚ်ကွာန်ဗွဲမဂၠိုၚ် နွံမံၚ်အပ္ဍဲထံၚ်တံဏီတုဲ အတိုၚ်စရၚ် ဂကောံရီုဗၚ်မၚ်မွဲရံၚ်စံၚ် ကောန်ထံၚ်ပရေၚ်ဍုၚ်ကွာန် AAPP မ္ဂး ကောန်ထံၚ်ပရေၚ်ဍုၚ်ကွာန် ၂၀၀၀၀ ပြၚ် သှ်ေမံၚ်အပ္ဍဲထံၚ်ဏီရောၚ် ဂကောံရမျှာၚ် ထံက်ထ္ၜးလဝ်ရ။
မွဲလပါ်ပၠန်လေဝ် လိုၚ်သေၚ်ပရေၚ်ကမၠောန် ဌာန်ပရိုၚ် ၆ ဂကောံဂှ် ထ္ၜးဟိုတ်ကဵုပရေၚ်ဂီုကၠီုနိဂီုဍုၚ်တုဲ အလဵုအသဳပၞာန်ကၟာတ်သီထောံလဝ် ကီုရ။
လိုၚ်သေၚ်ကမၠောန် Chin World ၊ KHONUMTHUNG MEDIA GROUP ၊ မျက်မှံက်ခေတ်၊ မျေလာတ်အတာန်၊ Red News Agency ကေုာံ Asia Citizens တံမ္ဂး စနူဂိတုအေဗရာတုဲကၠုၚ်တေံဂှ် ကၟာတ်သီထောံလဝ်ရ။ ပရေၚ်ဏံဂှ် ကြဴနူသီအဝဵု ၂၀၂၁ တုဲ ကလေၚ်ကၟာတ်သီထောံ လိုၚ်သေၚ်ကမၠောန်မဳဒဳယာပရိုၚ်တံ ဒှ်အလန်ကၠာအိုတ်တုဲ စနူသၞာံ ၂၀၂၁ စဵုကဵုဂိတုအေဗရာသၞာံဏံမ္ဂး ဌာန်ပရိုၚ်ဒးဒုၚ်ကၟာတ်သီထောံ လိုၚ်သေၚ် နွံမံၚ်ၜိုတ် ၁၈ ဂကောံရ။
အတိုၚ်တင်နၚ် ဂကောံရမျှာၚ် ပကောံလဝ်မ္ဂး စပ်ကဵုအခေါၚ်အရာ ဟီုဂးဗၠးၜးတုဲ ပ္ဍဲဂိတုအေဗရာတုဲကၠုၚ်တေံဂှ် ပွိုၚ်ဍုၚ် ဒးဒုၚ်ကုတ်ထပိုတ်လဝ်လိုၚ်ဖုၚ်ကဵု အေန်တာနိတ်တံ နွံမံၚ် ၁၃၇ ပွိုၚ်ဍုၚ် ရောၚ် လလောၚ်တြး ကဵုလဝ်သမ္တီကီုရ။
ပရိုၚ် – သြင်လောန်တိုၚ်မ်
Photo – Social Media