မတ်မလီု ၊ မေ ၂၂
အပ္ဍဲကဵုတွဵုရးမန် ဟိုတ်နူစရိတ်အိုတ် ပရေၚ်တဵုလွဳသၠုၚ်တိုန်မံၚ် ဟွံတန်အဆ သီုကဵုအခက်အခုဲ သၟာကမၠောန်တံနွံတုဲ ပရေၚ်တဵုသြောံကသီု ယအ်စှ်ေအာမံၚ်ထေၚ်ၚ်လဵုလဵုရောၚ် သၟာဗ္ၚတံ ဟီုလဴကဵု ဌာန်ပရိုင်သြၚ်လောန်တိုၚ်မ်ရ။
သၟာဗ္ၚတဵုသြောံကသီုတံဂှ် ပ္ဍဲအခိၚ်ရာသီတဵုသြောံကသီုသၞာံဏံမ္ဂး ၚုဟ်ကၠေၚ်စက်၊ ဝါဲဓါတ်၊ ကပေါတ်ဒးစကာသုၚ်စောဲတံဂှ် ၚုဟ်မးသၠုၚ်တိုန်မံၚ် ဟွံတန်အဆတုဲ သီုကဵုဒးဇီုကပိုက်မံၚ်ကဵုစရိတ်ဇိက်ဗ္ၚကဵု စရိတ်သၟာကမၠောန်တံ သၠုၚ်မံၚ်ဂှ်ရ။
သွက်ဂွံတဵုသြောံကသီုဂှ် ၜိုန်ရစရိတ်အိုတ်သၠုၚ်တိုန်မံၚ် ဟွံတန်အဆကီုလေဝ် အနှေန်ၚုဟ်သြောံတံမ္ဂး အတိုၚ်ဗီုအခိၚ်ကၠာကၠာတေံ ၚုဟ်မးဟွံမွဲဂှ်ရ သၟာဗ္ၚဗွဲမဂၠိုၚ်စဳဇန်မံၚ် ပရေၚ်တဵုလွဳတံဂှ် သွက်ဂွံယှအ်စှ်ေအာရောၚ်။
အခိၚ်တဵုသြောံကသီုလၟုဟ်ဏံ စရိတ်ဇိက်ဗ္ၚ ဟိုတ်နူသ္ပဟွံမာန်တုဲ ခံက်ဂြာတ်ကေတ်တံသၟးရတဵုအာဂှ်ကီု သွက်ဂွံစ ဆၜိုတ်ရုံဂပ်ဟေၚ်နွံတုဲ သၟာဗ္ၚဟွံတဵုသြောံတံလေဝ် နွံမံၚ်ဗွဲမဂၠိုၚ်ရောၚ် သၟာဗ္ၚမွဲတၠ ဟီုလဴကဵုဌာန်ပရိုင်သြၚ်လောန်တိုၚ်မ်ရ။
“ပ္ဍဲသၞာံဏံမ္ဂး ဟိုတ်နူပရူပြသၞာကၠေၚ်တုဲ ၚုဟ်ကၠေၚ်လေဝ် သ္ပဟွံမာန်၊ စရိတ်ဇိက်ဗ္ၚလေဝ် ဖန်ဟွံမာန်တုဲ စံၚ်လဝ်ပၟတ် ခံက်ဝါဗ္ၚတုဲ ဂြာတ်စုတ်လဝ်မ အတိုၚ်ဂှ်ရ။ လ္ၚဵုတံဂှ်လေဝ် ဗလးထောံလဝ်အတိုၚ်ဂှ်ရ၊ လ္ၚဵုတံဂှ်တှ်ေ ၜိုတ်အရၚ်ဂွံစရုံဟေၚ် ကၠောန်မံၚ်အိုတ်ရ” သာ်ဝွံ သ္ဂးရ။
တုဲပၠန် သၞာံဏံမ္ဂး ၚုဟ်သြောံဟွံခိုဟ်၊ စရိတ်အိုတ် ပရေၚ်တဵုလွဳ သၠုၚ်မံၚ်ဂှ်တုဲ သၟာဗ္ၚဗွဲမဂၠိုၚ်တံ ဗီုအခိၚ်ကၠာကၠာတေံ တဵုအာပေၚ်ၚ် ဟွံမာန်၊ ဟိုတ်နူတဵုသြောံဟရာတ်သၟး တဵုမံၚ်အိုတ်တုဲ လၟိဟ်သြောံတိတ် သွက်သၞာံဏံယအ်စှ်ေအာမာန် တီကၠးရောၚ် ညးဆက်ဟီုရ။
ပရေၚ်တဵုသြောံကသီုဂှ် ကပေါတ်ဒးစကာသုၚ်စောဲ၊ စရိတ်သၟာကမၠောန် ၚုဟ်မးသၠုၚ်မံၚ်ကီုလေဝ် ၚုဟ်သြောံ ဟွံသၠုၚ်တိုန်မ္ဂး ဒးယှအ်တဵုအာရဏောၚ် သၟာဗ္ၚတၞဟ်မွဲတၠပၠန် ဟီုလဴကဵုဌာန်ပရိုင်သြၚ်လောန်တိုၚ်မ်ရ။
“ဝါဲဓါတ်တံ ကပေါတ်ဒးစကာသုၚ်စောဲအာတံဂှ် ၚုဟ်မးတိုန်အာအိုတ်စောန်ရ။ စရိတ်သၟာကမၠောန်တံလေဝ် ၚုဟ်မးသၠုၚ်မံၚ်ကီု။ ကပေါတ်ဒးစကာသုၚ်စောဲတံ ၚုဟ်မးသၠုၚ်ဗွဲမလောန်။ ၚုဟ်သြောံဂှ်တှ်ေ ဟွံသၠုၚ်တိုန်ပုဟ်။ ပ္ဍဲပွဳဗွိုၚ်ဒေသပိုဲတံမ္ဂး သြောံကသီုဏံဂှ် ညးလ္ၚဵုတံ ညိလေဝ်ဟွံတဵုပုဟ်။ လ္ၚဵုတှ်ေလေဝ် ယှအ်ဖျေံဨကတုဲ တဵုမံၚ်နွံ” သာ်ဝွံ သ္ဂးရ။
မွဲလပါ်ပၠန်လေဝ် ၜက်နူပွိုၚ်ဍုၚ်ဇကုတုဲ ဖဍိုက်ပလံၚ်ဏာသြောံသ္ၚုတံမ္ဂး ရဲသၟဝ်တဲဒပ်ပၞာန်တံဂှ် ရပ်သီကေတ်ထောံဂှ်ကီု၊ ပရေၚ်အာတ်သြန် ဟွံတန်ကဵုအဆတံနွံမံၚ်တုဲ ဒၞာဲဝါသၟာဗ္ၚတံနွံမံၚ်ဂှ် ညးကၠုၚ်ရာန်သြောံ အောန်စှ်ေအာတုဲ ၚုဟ်သြောံဟွံခိုဟ်ဒှ်အာရောၚ် သၟာဗ္ၚတံသ္ဂးရ။
ဟိုတ်နူအနှေန်ၚုဟ်သြောံဟွံခိုဟ်တုဲ ပရေၚ်တဵုသြောံကသီုဂှ် သၟာဗ္ၚတံ ယှအ်တဵုမံၚ်အိုတ်တုဲ စိုပ်ကၠုၚ်အခိၚ်သြောံကသီု တိတ်ကၠုၚ် ဏံမ္ဂး အကာဲအရာ လၟိဟ်သြောံတိတ် ယအ်စှ်ေအာထေၚ်ၚ်လဵုလဵု မာန်ရောၚ်။
အပ္ဍဲတွဵုရးမန် ပရေၚ်တဵုသြောံကသီုဂှ် ဇၟာပ်ပ်သၞာံ တဵုမံၚ်ကြပ်ပေၚ် ၇ ကိုတ်ဨက နွံမံၚ်တုဲ သြောံတိတ်မံၚ် ၄၃၀ ကိုတ် နပြၚ်တုဲ သြောံတိတ်ကၠုၚ်မ္ဂး ဗုတ်ပတိတ်သ္ၚုခိုဟ်ဟ်တုဲ ပလံၚ်ဗစိုပ်သွံတြးကဵုအာ အကြာဒေသကီု သီုကဵု ရးကေုာံ တွဵုရးတၞဟ်တံ ကီုရောၚ်။
ပရိုၚ် – သြင်လောန်တိုၚ်မ်
Photo – CJ