မတ်မလီု ၊ ဂိတုမေ ၂၃
စၠတ်ထဝ်တွဵုရးမန် အလန်တတိယ အလဵုအသဳပၞာန်သီအဝဵု ကောံဓရီုလၟေၚ်ဍာံ ဒုတိယဝါဂှ် ကလေၚ်ကၠောန်ဗဒှ်အာ ပ္ဍဲဂိတုဂျောန် ၉ ဂတဏံရောၚ် ဂွံတီကေတ် နူညးစၞးစၠတ်ထဝ်တွဵုရးတံရ။
အပ္ဍဲကောံဓရီုဏံ ညးစၞးလ္ၚဵုတံ သွက်ဂွံသၟာန်သၟုက် ပၠုပ်၊ပတိုန်အာဂလာန်ဂမၠိုၚ် နွံမံၚ်ကီုလေဝ် ပရူပရာသာ်လဵု သၟာန်အာ ရောဟီုဂှ် ဟွံတီကေတ်ဏီပုဟ်။
အပ္ဍဲကောံဓရီုစၠတ်ထဝ်ဏံမ္ဂး ပရူဝိုၚ်ဝေၚ်လံၚ်သြန်တံကီု၊ ပရူတံၚ်ပဝ်တာရပ်ချုက် သွက်ဂွံယိုက်ဝန်ပၞာန် ကေုာံ ပရေၚ်အာတ်သြန် ဒၞာဲဂိက်စၟဳစၟတ်တံဂှ် ညံၚ်ဂွံသၟာန်သၟုက်ကဵု ညးဒေသတံ နွံမံၚ်ပၟိက်အိုတ်ရ။
တုဲပၠန် အပ္ဍဲဒေသမ္ဂး စပ်ကဵုပရေၚ်အုပ်လဒမ် သၞောဝ်ဓဝ်ဥပဒေ၊ ၚုဟ်မး ကပေါတ်သၠုၚ်မံၚ်တံကီု၊ ပၟတ်ဓါတ်လလဳကၠုၚ်ဟွံဍာံ၊ ပရေၚ်စလာဘ်ဗဇဴ အဂတိဒဂေတ်လီု ဌာနဆေၚ်စပ်တံဂှ် ညံၚ်ဂွံသၟာန်သၟုက်ကဵု ပရေၚ်အာတ်မိက်မံၚ်တံ နွံရ။
ကောံဓရီုလၟေၚ်ဍာံ ပထမဝါ၊ စၠတ်ထဝ်တွဵုရးမန် အလန်တတိယဂှ် စပ္တံနူဂိတုမာတ် ၂၀ တေံတုဲ ကၠောန်ဗဒှ်ကၠုၚ်လဝ်ပွိုၚ် ၈ တ္ၚဲတုဲ၊ အပ္ဍဲဂိတုဧပြဳ ၁၀ ဂှ် ကောံဓရီုစၠတ်ထဝ် အလန်လက်ကရဴအိုတ် ကၠောန်ဗဒှ် လဝ်ရောၚ်။
အပ္ဍဲကောံဓရီုလၟေၚ်ဍာံ ပထမဝါ၊ စၠတ်ထဝ်တွဵုရးမန် အလန်တတိယ ဂှ်မ္ဂး သ္ပဒတန်ခါန်ကၞက်လဝ် ဝန်ဇၞော်ဇၞော်တွဵုရးမန် ကေုာံ ဝန်ဇၞော်ဂကောံအလဵုအသဳတံကီု၊ ဂဥုပ်နာဲဗ္စာတွဵုရး၊ ဂဥုပ်သၟာဥပဒေတွဵုရး ကေုာံ ဂဥုပ်စၟဳစၟတ်စရၚ်တွဵုရးတံတုဲ ဒက်ပတန်လဝ် ကမ္မတဳပရေၚ်ကေၚ်ကာစၠတ်ထဝ် ၅ ဂကောံနွံရ။
ကောံဓရီုလၟေၚ်ဍာံ ဒုတိယ ဝါ၊ စၠတ်ထဝ်ညးဍုၚ်ကွာန် ကေုာံ စၠတ်ထဝ် ကောန်ဂကူ အလန်တတိယဂှ် အပ္ဍဲဂိတုဂျောန် ၂ ဂတဏံ သွက်ဂွံစကၠောန်ဗဒှ်အာနွံတုဲ ကောံဓရီုစၠတ်ထဝ်ကၟိန်ဍုၚ်ဂှ်လေဝ် အပ္ဍဲဂိတုဂျောန် ၄ ဂှ် ကော်ဘိက်လဝ်ကီုရောၚ် လလောၚ်တြးလဝ်ရ။
ပရိုၚ် – သြင်လောန်တိုၚ်မ်
Photo – MOI