တယိတ်ချံၚ် ၊ မေ ၂၃
အပ္ဍဲရးတနၚ်္သာရဳ ပွိုၚ်ဍုၚ်တယိတ်ချံၚ် ကွာန်ဥတ္တူဂှ် ဟိုတ်နူ ဒပ်ကဝ်မယှေန်ပၞာန် ကြဳဗုမ်နကဵုပါရာမဝ်တာတုဲ ကောန်င္ၚာ်ကဵု ညးဍုၚ်ကွာန် ၃ တၠ ချိုတ်အာလဝ်နွံ နူရိုဟ်ကၞက်ပရိုၚ်အပ္ဍဲဒေသတံ ဟီုလဴကဵု ဌာန်ပရိုင်သြၚ်လောန်တိုၚ်မ်ရ။
အပ္ဍဲဂိတုမေ ၂၁ ၜိုတ်အခိၚ်တ္ၚဲစေၚ် ၂ နာဍဳဂှ် ပါရာမဝ်တာ ၃ မ တိုန်ကၠုၚ် နူဒပ်ပၞာန်ကျာဗိက်တုဲ ကြဳဏာဗုမ် လ္တူကွာန်ဥတ္တူ မဒှ်ရ။
ဟိုတ်နူ ဒပ်ကဝ်မယှေန်ပၞာန် ကြဳဏာဗုမ်တုဲ ညးနွံမံၚ်အပ္ဍဲကွာန်ဥတ္တူ ကောန်င္ၚာ်ဗြဴအာယုက် ၁၀ သၞာံမွဲတၠကီု အပံၚ်သီုဖအိုတ် ၃ တၠ ချိုတ်အာ နွံတုဲ ၄ တၠဂှ် ဒးအာလဝ်ဘဲဝပ်ကီုရ။
အပ္ဍဲပရေၚ်ကြဳဗုမ်ဏံမ္ဂး သ္ၚိဌာန်ပ္ဍဲကွာန်ဥတ္တူ ၂ မ ဒးဗုမ်လီုလာ်အာ လဝ်နွံတုဲ ညးဒေသလ္ၚဵုတံ ဒးဂြိပ်ပါဲမံၚ် ယာယဳမွဲခဏကီုရောၚ် သ္ဂးရ။
အပ္ဍဲဂိတုမေ ၂၀ တုဲကၠုၚ်တေံလေဝ် ပ္ဍဲကွာန်ကဒါ ပွိုၚ်ဍုၚ်ပလဝ် ရးတနၚ်္သာရဳဂှ် ဟိုတ်နူဒပ်ကဝ်မယှေန်ပၞာန် ကြဳဏာဗုမ် နကဵုပါရာမဝ်တာတုဲ မၞိဟ်တြုံအာယုက်ဇၞော်မွဲတၠ ချိုတ်အာလဝ် နွံကီုရ။
အပ္ဍဲရးတနၚ်္သာရဳ အပ္ဍဲဂိတုဏံမ္ဂး ဒပ်ကဝ်မယှေန်ပၞာန် သုၚ်စောဲကၠုၚ် နဲကဲဗတိုက်ကြဳဗုမ် နကဵုပါရာမဝ်တာတံ ဂၠိုၚ်တိုန်ကၠုၚ်မံၚ်ရောၚ် ဂွံတီကေတ် နူကဵုဂကောံသုတေသန အပ္ဍဲဒေသတံရ။
ပရိုၚ် – သြင်လောန်တိုၚ်မ်
Photo – CJ