ဘာပန် ၊ ဂိတုမေ ၂၃
အပ္ဍဲခရိုၚ်ဘာပန် တွဵုရးကရေၚ် ဗ္ဒိုပ်ပၞာန်ဒးဗလးကၠုၚ်လဝ်တဲဂှ် သွက်ဂွံ ကလေၚ်သီကေတ်မာန် ဒပ်ပၞာန်ဗၟာသီအဝဵု ပလံၚ်ဏာ ဒပ်အရီုဗၚ် ဇြဟတ်ကောန်ပၞာန် ၂၀၀၀ ပြၚ်တံဂှ် စိုပ်အာ ဇရေၚ်ဍုၚ်ကမမံၚ်တေံယျ နူရိုဟ်ကၞက်ပရိုၚ်ဒေသတံ ဟီုလဴကဵု ဌာန်ပရိုင်သြၚ်လောန်တိုၚ်မ်ရ။
သွက်ဂွံကလေၚ်သီအာ သ္ကုတ်ဂၠံၚ် ကမမံၚ်-ဘာပန် ကေုာံ သွက်ဂွံပလံၚ်ဏာ ကောန်ပၞာန်အရီုဗၚ် သွက်ရုၚ်ဗျူဟာပၞာန် ဘာပန်ဂှ် စနူဂိတုမေ ၅ တေံတုဲ ဒပ်ပၞာန်ဗၟာသီအဝဵု ပလံၚ်ဏာလဝ် ဇြဟတ်ကောန်ပၞာန် စိုပ်မံၚ်ဇရေၚ်ဍုၚ်ကမမံၚ် ဗွဲမဂၠိုၚ်ရ။
ဒပ်ကဝ်မယှေန်ပၞာန်တံဂှ် နူကဵုဒေသတၟေၚ် မျာၚ်ကျဳၚူ ပွိုၚ်ဍုၚ်လိုၚ်ဗၠဲဂှ် တတ်ကၠောံအာၜဳသြၚ်လောန်တုဲ စိုပ်အာဍုၚ်ကမမံၚ် ပွိုၚ်ဍုၚ်ဖာပန်ဂှ်တှ်ေ ကၠုၚ်ထပ်ဗပေၚ်စုတ်လဝ်ဇြဟတ်ပၞာန်ဗွဲမဂၠိုၚ် ဇၟာပ်ပ်တ္ၚဲကီု နူဍုၚ်ကမမံၚ်ဂှ်ပၠန် ကရောၚ်ပၞာန်ဇက်တိတ်အာ ပတဝ်ဏာကဵု လပါ်ကွာန်ကတိုၚ်တိ ၃ ကရောၚ်ပၞာန်တုဲ ဂေတ်ဂေၚ် ချဳဒရာၚ်မံၚ် ပရေၚ်ပၞာန်ဂမၠိုၚ်ရောၚ်။
ဒပ်ကဝ်မယှေန်ပၞာန် ကေတ်အရီုဗၚ်နူဗလးကျာကီု ပန်မံၚ်ကဵု လွဟ်ဇၞော်၊ ဒရုၚ် ပတဝ်အာလပါ်ကွာန်ကတိုၚ်တိတုဲ ချဳဒရာၚ်မံၚ် ပရေၚ်ပၞာန်ဂှ်ရ ဒှ်မံၚ်ပေါဲဗတိုက်ကဵု ဂကောံဇြဟတ်ပၠန်ဂတး ဒပ်ပၞာန်ဗၠးၜး ကောန်ဂကူကရေၚ် KNLA မဟာဒပ် ၅ တံ မဒှ်ရ။
အပ္ဍဲပေါဲဗတိုက်တံဂှ်မ္ဂး ဒပ်ကဝ်မယှေန်ပၞာန် ဒးလဝ်ဘဲဝပ်ဂိ ဂၠိုၚ်လောန်တုဲ ကရောၚ်ပၞာန်ဒပ်ကဝ်မယှေန်တံဂှ် ကၠာဟွံစိုပ် ကတိုၚ်တိ စိုပ်အာပွဳဗွိုၚ်ကွာန်မဝ်လဝ်ကလိုနွံမံၚ်ရောၚ် နူရိုဟ်ကၞက်ပရိုၚ်ပၞာန် အပ္ဍဲဒေသတံ သ္ဂးရ။
အပ္ဍဲပရေၚ်လဝေၚ်ပၞာန် ဘာပန်ဏံမ္ဂး ဒပ်ကဝ်မယှေန်ပၞာန်တံ သုၚ်စောဲမံၚ် လွဟ်ဇၞော်၊ ဒရုၚ်တံကဵု ပရေၚ်ပန်ရီုဗၚ်နူကဵုဗလးကျာတံ ဇၞော်ကဵုဇြဟတ်နွံမံၚ်တုဲ အကြာတရဴဂၠံၚ်ဍာန် ကရောၚ်ပၞာန်ဂမၠိုၚ် တတ်လုပ်အာလဝ်တံဂှ်မ္ဂး ကွာန်ဗွဲမဂၠိုၚ်ဂှ် သ္ၚိဌာန်တံကီု လီုလာ်အာ အလုံကွာန်မွဲကီု နွံမံၚ်တုဲ ကွာန်လ္ၚဵုတံဂှ် ဒးဒုၚ်စံၚ်ပလီုထောံလဝ် ရောၚ် ညးဒေသတံ ဟီုရ။
အပ္ဍဲဒေသခရိုၚ်ဘာပန် မဟာဒပ် ၅ KNU မ္ဂး ပ္ဍဲဂိတုမာတ် ကဵု ဧပြဳ တုဲကၠုၚ်တေံ ဂကောံဇြဟတ်ပၠန်ဂတးတံ ပံၚ်တောဲကဵု မဟာဒပ် ၅ တုဲ သီကေတ်လဝ်ဗ္ဒိုပ် ဒၞာဲဒပ်ကဝ်မယှေန်ပၞာန် ကဗဝ်တူ၊ ထေဝ်နေဝ်ကျိုဝ် ကေုာံ ကဝ်တွိုဲကျိုဝ် ၃ ဗ္ဒိုပ်နွံရောၚ် ဂွံတီရ။
သ္ကိုပ်ပၞာန်တြေံလေဝ်ဒှ် ညးကေတ်လဝ်အဆံၚ်သမ္မတ ဥူမေန်အံၚ်လှိုၚ် ဂှ် အပ္ဍဲပွိုၚ် ၁၀၀ တ္ၚဲဏံ သွက်ဂွံဆဵုဂဗသဳကၠဳအာ ပရေၚ်ၜိုဟ်လလမ်ကု ဂကောံရပ်လွဟ်ကောန်ဍုၚ်အရၚ်တံရောၚ် ပ္ဍဲဂိတုဧပြဳ ၂၀ တေံ ကော်ဘိက်လဝ်ကီုလေဝ် ဂကောံရပ်လွဟ် ကောန်ဍုၚ်အရၚ်တံဂှ်တှ်ေ ကလေၚ်ဟီုခၠေဝ်လဝ် ပရေၚ်ကော်ဘိက် ၜိုဟ်လလမ်အလီ ဒပ်ကဝ်မယှေန်တံဂှ် ညိဒုၚ်တဲဟွံမာန်ပုဟ် သ္ဂးရ။
နူအခိၚ်ဒပ်ကဝ်မယှေန်တံ ကော်ဘိက်မံၚ် သွက်ဂွံဆဵုဂဗသဳကၠဳအာ ပရေၚ်ၜိုဟ်လလမ်ဂှ်ရ အပ္ဍဲဒေသ KNU ထိၚ်ချုက်လဝ်ဂှ်ကီု ဒေသဂကောံ ရပ်လွဟ်ကောန်ဍုၚ်အရၚ်တၞဟ်တံ ထိၚ်ချုက်လဝ် တံဂှ်ကီု ဒပ်ကဝ်မယှေန် ထပက်မံၚ်ကရောၚ်ပၞာန် ဇၞော်ကဵုဇြဟတ် နွံမံၚ်တုဲ ပရေၚ်ပၞာန်အပ္ဍဲဂိတုဏံမ္ဂး ပေါဲဗတိုက် ဒှ်မံၚ်သ္ကာတ်မြဟ် အိုတ်စောန်ရ။
ပရိုၚ် – သြင်လောန်တိုၚ်မ်
Photo – Social Media