ကျာ်ဍုၚ်၊ မေ ၂၇
ပ္ဍဲတွဵုရးကရေၚ် ပွိုၚ်ဍုၚ်လှာဒကှ် ဒၞာဲဍုၚ်ကျာ်ဍုၚ် ဒှ်ဒေသဗော်သွးကောန်ဂကူကရေၚ် KNU ထိၚ်ချုက်လဝ်ဂှ် ဒပ်ပၞာန်ဗၟာ ကြဳဏာဗုမ်နူၜၚ်ကျာတုဲ ညးဗြဴ ၃ တၠ ချိုတ်အာလဝ်ရောၚ် နူဗဟဵု KNU ပတိတ်လဝ် လိက်လလောၚ်တြး ပ္ဍဲဂိတုမေ ၂၆ ရ။
အပ္ဍဲဂိတုမေ ၂၄ တုဲကၠုၚ်တေံ အခိၚ်ဒေါဝ်တ္ၚဲ ၁၂ နာဍဳကဝက်ဂှ် နူကဵုဒပ်ပၞာန်အလဵုအသဳသီအဝဵုတံ ကြဳလဝ်ဗုမ်နူၜၚ်ကျာ လ္တူဂိက်သၞေဟ်ကၚ်စၟဳစၟတ် KNU နွံမံၚ်အပ္ဍဲပါၚ် လုပ်ဍုၚ်ကျာ်ဍုၚ်တုဲ ဗုမ်ဒတုံခတိုဟ်အာ လ္တူသ္ၚိဌာန်ညးဍုၚ်ကွာန်တံရောၚ်။
ဟိုတ်နူပရေၚ်ကြဳဗုမ်နူဗလးကျာတုဲ ညးဗြဴ ၃ တၠ ချိုတ်အာလဝ် သီုကဵုကောန်င္ၚာ်ဗြဴအာယုက် ၁၆ သၞာံမွဲတၠကီု ညးဍုၚ်ကွာန် ၂ တၠ ဒးအာဘဲဝပ်တုဲ သ္ၚိ ၂ မကဵု ကွဳစက် ၁ မ ဒးဒုၚ်လီုလာ်အာရ။
အပ္ဍဲအကြာညးဗြဴချိုတ်အာဏံဂှ် ကလောမသ သမ္ဘာ သ္ကိုပ်ဌာန်ပၞာန်ရးအဂၞဲ ဖျေံလဝ်သ္ဇိုၚ်မတ်မလီု သ္ကိုပ်ပၞာန် သူရဇြဝ်လွေၚ်သိုဝ် ပါလုပ်မံၚ်မွဲတၠကီုရောၚ် ညးကြပ်မံၚ်ကဵုဒပ်ပၞာန်တံ ဟီုလဴကဵုဌာန်ပရိုင်သြၚ်လောန်တိုၚ်မ်ရ။
ပရေၚ်ကြဳဗုမ်ဏံဂှ် ပေါဲဗတိုက်ဟွံဒှ်မွဲသာ် ဗွဲဟွံထေၚ်ခယျ ဒပ်ပၞာန်ဗမာလုပ်ကြဳဗုမ် လ္တူဂိက်သၞေဟ်ကၚ် KNU တုဲ ကောန်ညးဍုၚ်ကွာန်တံ ဒးဘဲဝပ်ချိုတ်အာလဝ်ရောၚ် ညးဒေသတံ သ္ဂးရ။
နူကဵုဂိတုမာတ် သၞာံ ၂၀၂၄ တေံဂှ် ဒပ်ပၞာန်ဗၠးၜးကောန်ဂကူကရေၚ် KNLA က္ဍိုက်ပ် ဂကောံမဟာမိတ်ပၠန်ဂတး ဒပ်ပံၚ်ကောံတံ ဗတိုက်သီကေတ်လဝ် ဍုၚ်ကျာ်ဍုၚ်ရ။
ဍုၚ်ကျာ်ဍုၚ် ဒၞာဲ KNU ထိၚ်ချုက်လဝ်ဂှ် ဒပ်ကဝ်မယှေန်ပၞာန်တံ လဆောဝ်လဆောဝ် သုၚ်စောဲလွဟ်ဇၞော် ဗတိုက်မံၚ်နူဗလးကျာတုဲ ညးဒေသတံ ဒးမံၚ်တန်တဴအာမံၚ် နကဵုဓဝ်ဂဝိၚ် စိုတ်ဖေက်တံရောၚ် ဂွံတီကေတ်ရ။
ပရိုၚ် – သြင်လောန်တိုၚ်မ်
Photo – KNU