ရေဝ်၊ မေ ၂၇
သီုကဵုသၞောတ်တၠအဝဵုပၞာန်မွဲစွံကီု ပရေၚ်ဗတိုက်ပလီု သ္ဇိုၚ်သၞောဝ်ဥပဒေ ၂၀၀၈ စဵုဒၞာကဵုမံၚ်ဍေံတံဂှ် ဒှ်ကမၠောန် ကဵုလဝ်ဖျုန်ပထမကိုပ်ကၠာအိုတ်ရောၚ် ဥက္ကဌ ဗော်ဍုၚ်မန်တၟိ ဗ္တိုက်သရိုဟ်တၠအဝဵုပၞာန် (NMSP AD) နာဲဇဲယ ဟီုလဝ်ရ။
ပ္ဍဲသဘၚ်အခန်ကၞာ ဒက်ပတန်လဝ် ဒပ်မန်ရာမည (RMA) ပေၚ်ကၠောံအာပွိုၚ်မွဲသၞာံ အပ္ဍဲဂိတုမေ ၂၄ ဂှ် ဥက္ကဌ ဗော်ဍုၚ်မန်တၟိ ဗ္တိုက်သရိုဟ်တၠအဝဵုပၞာန် NMSP AD နာဲဇဲယ ဟီုဂလာန်အတိုၚ်ဏံ မဒှ်ရ။
သၞောတ်တၠအဝဵုပၞာန် အိုတ်အးအာမှလေဝ် ဍုၚ်မန်နွံကဵုအခေါၚ်ဖန်ဗဒှ် ပရေၚ်ကံကုသိုလ်ဇကုဇကု မံက်တိုန်မာန်တုဲ ဒပ်မန်ရာမည ဇြဟတ်ညံၚ်ဂွံဇၞော်တိုန်အာဂှ် ပၟိက်ဇၞော်မံၚ်ကွေံကွေံရောၚ် ဥက္ကဌ နာဲဇဲယ သ္ဂးရ။
အပ္ဍဲအကြာပွိုၚ်မွဲသၞာံဏံ ဒက်ပတန်ဂွံလဝ် ဒပ်မန်ရာမညဂှ် ၜိုန်ရဂွံကၠုၚ်သွဟ် ပရေၚ်အံၚ်ဇၞးတံကီုလေဝ် အခက်အခုဲကေုာံ ပရေၚ်ကော်ဆောဂၠိုၚ်ၚ်တံဂှ် ဆက်ဇီုကပိုက်မံၚ်ကီုလေဝ် သွက်ဂွံဒှ်ကၠုၚ်ဒပ်ပၞာန်ဍုၚ်မန် အပ္ဍဲအနာဂတ်တေံဂှ် ဂစာန်ဒက်ပတန်မံၚ်ရောၚ် ဥက္ကဌ နာဲဇဲယ ဟီုရ။
ဒပ်ပၠန်ဂတးမန်တံ ပံၚ်ကောံကၠုၚ်မာန်ဂှ် သွက်ပၠန်ဂတးမန် ဇြဟတ်ခိုဟ်ကၠုၚ်တုဲ လ္တူတၠအဝဵုပၞာန် သၞတံဂှ်လေဝ် ဗွဲမစိုပ်တရဴဗတိုက်မာန်ကၠုၚ်ဂှ်ရ ဒပ်မန်တၞဟ်ဟ်တံ ညံၚ်သ္ဂောံပံၚ်ကောံကၠုၚ်မာန်ဂှ် ဆက်ဂစာန်အာရောၚ် ပ္ဍဲအခန်ကၞာဂှ် နာဲဇဲယ ဟီုလဝ်ရ။
ဒပ်မန်ရာမည RMA ဂှ် နကဵုဒပ်ပၞာန်ဗၠးၜးကောန်ဂကူမန် MNLA AD၊ ဒပ်ပၞာန်ဗၠးၜးဍုၚ်မည် MLA ကေုာံ ဒပ်ပၞာန်ဗၠးၜးမန် MLF တံ ပံၚ်ကောံတုဲ ဒက်ပတန်လဝ် အပ္ဍဲဂိတုမေ ၂၄ သၞာံ ၂၀၂၅ တေံ မဒှ်ရ။
အပ္ဍဲပွိုၚ်မွဲသၞာံ စဒက်ပတန်လဝ် ဒပ်မန်ရာမည RMA ဏံဂှ် ပံၚ်တောဲကဵု ဂကောံဒပ်ပၠန်ဂတးတံတုဲ လုပ်ဗတိုက်လဝ် တမ်ဒပ်ကဝ်မယှေန်ပၞာန်၊ ဗ္ဒိုပ်ပၞာန် ကေုာံ ဂိက်သၞေဟ်ကၚ်နာနာတံ နွံကၠုၚ်လဝ်ရ။
ပရိုၚ် – သြင်လောန်တိုၚ်မ်
Photo – NMSP-AD