မတ်မလီု ၊ မေ ၂၇
နူကဵုပေါဲရုဲမာဲသ္ကုတ်ကဵုသ္ကုတ်တံဂှ် အလဵုအသဳကေုာံ စၠတ်ထဝ်တံ ၜိုန်ရမံက်တိုန်ကၠုၚ်ကီုလေဝ် နူကဵုပွဳဗွိုၚ်ဂၠးကဝ်တံကဵု သီုကဵုအာသဳယာန်တံ ဟွံသ္ပလဝ်စၟတ်သမ္တီ ပရေၚ်ဍုၚ်ကွာန် လုပ်ဗဗွဲသၞောဝ်ဏီတုဲ သွက်ဂွံဂွံပရေၚ်ထံက်ဂလာန် နူကဵုညးဍုၚ်ကွာန်တံဂှ် အလဵုအသဳပၞာန်သီအဝဵု ဂါံကၠုၚ်မံၚ်ဇိုၚ်ရ။
အခိၚ်စယိုက်ဂၠေၚ် ကေတ်လဝ်တာလျိုၚ်နိဂီုဍုၚ်ဂှ် အလဵုအသဳပြံၚ်လဝ်ဗီုပြၚ် ဂစာန်ပြံၚ်သၠာဲမံၚ် လညာတ်ညးဍုၚ်ကွာန်ကေုာံ ဂၠးကဝ်တံတုဲ ပရေၚ်လ္ၚဵုလ္ၚဵုတံ ယှအ်ဖျေံကၠုၚ်လဝ်နွံကီုလေဝ် ပရေၚ်ကၟာတ်ဆိုအ် နူကဵုဍုၚ်လ္ၚဵုတံဂှ်တှ်ေ တဝ်စၞေဟ်ကၠုၚ်ဟွံမာန် ဏီပုဟ်။
မွဲလပါ်ပၠန်လေဝ် ကမ္မတဳညးစၞးစၠတ်ထဝ်ကၟိန်ဍုၚ် CRPH ဂှ် နူဂကောံပါလဳမာန်ဂၠးကဝ် IPU ဒှ်မံၚ် မိတ်သဟာဲသဳကၠဳအဓိကဂှ် ဆက်သ္ပအာကဵုစၟတ်သမ္တီရောၚ် ပ္ဍဲသဘၚ်သဳကၠဳဂိတုအေဗရာ တုဲကၠုၚ်တေံ ဖျေံလဝ်သ္ဂုတ်သွာတ်ရ။
အပ္ဍဲအကာဲအရာဏံ ဥူခေန်ယဳ ဒှ်ဥက္ကဌစၠတ်ထဝ်ညးဍုၚ်ကွာန်ကဵု ဗော်ပျဳခိုၚ်ဖျိုဝ် ဒပ်ပၞာန်ထ္ၜထံက်လဝ်ကဵုဗွဲကြဴ ဟီုလဝ်ဂှ်တှ်ေ အခိၚ်ကၟိန်ဍုၚ်ဒးဒုၚ်ဗတိုက်ပါ်ပါဲမံၚ် နူအပ္ဍဲဍုၚ်၊ မ္ၚးဍုၚ်ဏံမ္ဂး ပရေၚ်အရီုဗၚ် နူကဵုစၠတ်ထဝ်ဂှ် ဒှ်အရာခိုဟ်အိုတ်ရောၚ် သ္ဂးရ။
သွက်ဂွံစန်ဒက်အာ ညးဍုၚ်ကွာန်တံဂှ် ဒှ်တာလျိုၚ် ဗော် ကေုာံ ညးစၞးစၠတ်ထဝ်တံတုဲ ပရေၚ်စန်ဒက်တံဏံဂှ် သွက်ဂွံဒှ်အထံက်ပၚ် အလဵုအသဳရောၚ် အပ္ဍဲကောံဓရီုကေၚ်ကာဗဟဵုဗော် ကၠောန်လဝ်ပ္ဍဲဂိတုမေ ၂၁ တေံဂှ် ဟီုလဝ်ရောၚ်။
လ္တူပရေၚ်ဏံ နူလပါ်အလဵုအသဳပၞာန် ယဝ်ရ ဂွံပရေၚ်ထံက်ဂလာန်ညးဍုၚ်ကွာန် ပဵုဂၠိုၚ်တိုန်မ္ဂး သွက်ဂွံဂွံဓဝ်ပတေဟ်ပရေၚ်ဍုၚ်ကွာန်ဂှ် ဒှ်တရဴဂၠံၚ်ဍာန်မွဲရောၚ် ကသပ်ဍေံတံချပ်လဝ်ဒှ်မာန် ညးလလောၚ်တြးပရိုၚ် ဇြဟတ်ရာမညဖိတ်ဒရေဝ်ခေတ်တၟိ (NRFF) နာဲပဳတာ သ္ၚဳဂၠိပ်လဝ်ရ။
“မွဲလပါ်ပၠန် ဍေံတံနွံမံၚ်ပၟိက်ဂှ် ပရေၚ်ထံက်ဂလာန်ညးဍုၚ်ကွာန် ရ။ ဟိုတ်ဂှ်ရ ယဝ်ရဂွံ ပရေၚ်ထံက်ဂလာန်ညးဍုၚ်ကွာန် ဂၠိုၚ်နူဏံမ္ဂး သွက်ဂွံဂွံဓဝ်ပတေဟ်ပရေၚ်ဍုၚ်ကွာန်ဂှ် ဒှ်လၟေၚ်တရဴဂၠံၚ်မွဲရောၚ် ဍေံတံချပ်လဝ်ဒှ်မာန်။ ဟိုတ်ဂှ်ရ ခေန်ယဳ ဟီုကဵုညးစၞးစၠတ်ထဝ်တံဂှ် ညံၚ်ဂွံစန်ဒက်အာ ညးဍုၚ်ကွာန်တံရ၊ စန်ဒက်တုဲမ္ဂး သွက်ဂွံထံက်ပၚ်အလဵုအသဳဂှ် ဒးစန်ဒက်ရောၚ် ဟီုလဝ်ရ” သာ်ဝွံ သ္ဂးရ။
ညးစၞးစၠတ်ထဝ်တံဂှ် သွက်ဂွံဒှ်အထံက်ပၚ် အလဵုအသဳသၟးဟွံသေၚ်၊ အဓိက ပရေၚ်ညးဍုၚ်ကွာန်တံနွံမံၚ်ပၟိက် ကေုာံ ပရေၚ်သ္ပစၞးရမျှာၚ်ညးဍုၚ်ကွာန်တံဂှ် ဒးပတိုန်ထ္ၜးအာ အပ္ဍဲစၠတ်ထဝ်တုဲ ဒးကဵုဇြဟတ်ဟရိုဟ် အလဵုအသဳတံ သွက်ဂွံထမံက်ရုပ်ရဴကမၠောန်ရောၚ် ညးထံက်ထ္ၜးရ။
စၠတ်ထဝ်ဂှ် ဒှ်ဒဒန်ပရေၚ်ဆက်စၠောံ အကြာအလဵုအသဳကဵု ညးဍုၚ်ကွာန်တံတုဲ သွက်ဂွံထမံက်အာရုပ်ရဴ ဆန္ဒညးဍုၚ်ကွာန်တံမာန်ဂှ် ညံၚ်ဂွံအာပံက် ရုၚ်ညးစၞးအမာတ်စၠတ်ထဝ်တံညိ ဥူခေန်ယဳ ဟီုလဝ်ကဵုကောန်ဗော်တံရောၚ်။
တုဲပၠန် ညးတာလျိုၚ်ဗော်တံလေဝ် ဆဵုဂဗအာကဵုညးဍုၚ်ကွာန်ကီု ဆန္ဒပၟိက်ညးဍုၚ်ကွာန်တံဂှ် ဒးပလံၚ်ဗ္စိုပ်ကဵု ရုၚ်ညးစၞးအမာတ်စၠတ်ထဝ်တုဲ ညံၚ်ဂွံထမံက်အာရုပ်ရဴကမၠောန်ညိဂှ် ညးကဵုလဝ်စၞောန်ပ္ညုၚ် မဒှ်ရ။
ပြဟ်ဟ်ဏံမ္ဂး ဗော်ဗော်ပျဳခိုၚ်ဖျိုဝ်ကေုာံ ဗော်ဇၞးလဝ်ပေါဲရုဲမာဲတံဂှ် သွက်ဂွံဘိုၚ်သောၚ်ကလးအာအခက်အခုဲ ကေုာံ ပၟိက်ဆန္ဒညးဍုၚ်တံမာန်ဂးတုဲ ဗက်ပြိုၚ်အာပံက်မံၚ် ရုၚ်ညးစၞးအမာတ်စၠတ်ထဝ်တံရ။
အပ္ဍဲအစဂိတုဂျောန်ဂတဏံမ္ဂး ကလေၚ်ကော်လဝ် ကောံဓရီုလၟေၚ်ဍာံဒုတိယဝါ စၠတ်ထဝ်အလန်တတိယနွံမံၚ်တုဲ ပ္ဍဲကောံဓရီုဂှ် သွက်ဂွံသၟာန်သၟုက် ကေုာံ ပတိုန်ဂလာန်တံနွံမံၚ်ရောၚ် ညးစၞးလ္ၚဵုတံ ဟီုပတိတ်လဝ်ရ။
သွက်ဂုဏ်ဖဵုညးဍုၚ်ကွာန် သ္ပလဝ်စၞးတုဲ ညးလုပ်စိုပ်အာလဝ် အပ္ဍဲစၠတ်ထဝ်တံဂှ် ညိလေဝ်ညံၚ်ကဵုကြပ်ဟၟဲတုဲ သွက်ညးဍုၚ်ကွာန်တံမ္ဂး မုလေဝ်တင်သွက်ဂွံစၟဳစဟၟဲပုဟ် နာဲပဳတာ ဟီုလဝ်လညာတ်ညးရ။
“ကွေံကွေံဇေတ်တ်မ္ဂး သ္ပစၞးညးဍုၚ်ကွာန်တုဲ သွက်ဂုဏ်ဖဵုညးဍုၚ်ကွာန် ညးလုပ်စိုပ်အာလဝ် အပ္ဍဲစၠတ်ထဝ်တံဂှ် ကြပ်ဟၟဲပုဟ်ထေၚ်ရ။ ဟိုတ်ဂှ်ရ ပ္ဍဲစၠတ်ထဝ်ဏံလေဝ် ရဲရာဇဝတ်ပၞာန်တံ နွံမံၚ်။ တုဲတှ်ေ ရဲဆက်စပ်ကဵု ပရေၚ်ဂုဏ်ဖဵုပိုန်ဒြပ် တံလေဝ် နွံမံၚ်။ မၞိဟ်တံဏံ သ္ဂောံသ္ပစၞးကောန်ဍုၚ်ကွာန်တံတုဲ သ္ဂောံချူဥပဒေဟီုဂှ်တှ်ေ သွက်ဂွံစၟဳစညိလေဝ်ဟၟဲလးလး” သာ်ဝွံ သ္ဂးရ။
နဒဒှ်ပၞော်တိတ်ပရေၚ်ဍုၚ်ကွာန် ဒပ်ပၞာန်သီအဝဵု ဂစာန်ကၠုၚ်ကၠုၚ်ပေါဲရုဲမာဲတုဲ ဗွဲမဂၠိုၚ် ဥက္ကဌစၠတ်ထဝ်ကဵု ဥက္ကဌကမ္မတဳနာနာ မံက်တိုန်လဝ်တံဂှ် ဒှ်မံၚ်သ္ကိုပ်ပၞာန်တြေံ ရဲဗော်ဗော်ပျဳခိုၚ်ဖျိုဝ်တံသၟး အုပ်လဝ်ဂတာတဲရောၚ်။
အပ္ဍဲစၠတ်ထဝ်ညးဍုၚ်ကွာန်ကဵု စၠတ်ထဝ်ကောန်ဂကူတံဂှ် ကမ္မတဳကေၚ်ကာ ၄- ၄ ဂကောံဂှ်ကီု အပ္ဍဲစၠတ်ထဝ်ကၟိန်ဍုၚ်ဂှ် နကဵုကမ္မတဳပံၚ်တောဲ ၃ ဂကောံ ဒက်ပတန်လဝ်နွံတုဲ အကြာဥက္ကဌ ၁၁ ဒၞာဲဂှ် ၇ ဒၞာဲဂှ်တှ်ေ မၞိဟ်ပတေဟ် ဥူမေန်အံၚ်လှိုၚ်တံသၟး ကေတ်လဝ်ဒၞာဲ မဒှ်ရ။
ညံၚ်ရဴသာ်ဏံ အကြာဒၞာဲဥက္ကဌကမ္မတဳစၠတ်ထဝ်တံဂှ်မ္ဂး မၞိဟ်ပတေဟ် ဥူမေန်အံၚ်လှိုၚ် တံ ဂွံလဝ်ဒၞာဲဟီုဂှ် သွက်ဂွံထိၚ်ချုက်စၠတ်ထဝ်မာန် ပလေဝ်စလဝ်ဂှ် ဒှ်သက်သဳမွဲ ထေၚ်ၚ်လဵုလဵု မံက်ကတဝ်မံၚ်ရောၚ် ISP-Myanmar ကဵုသမ္တီ လလောၚ်တြးလဝ်ရ။
ပရိုၚ် – သြင်လောန်တိုၚ်မ်
Photo – MOI