တနၚ်္သာရဳ၊ မေ ၂၈
ဟိုတ်နူပေါဲဗတိုက် ၜါလပါ်ဒှ်လဝ်တုဲ ညးဍုၚ်ကွာန် ရဲပါဲဘဲပၞာန် နူရးတနၚ်သဳဗွဲမဂၠိုၚ် ဂြိပ်ပါဲစိုပ်မံၚ် ဒၞာဲဗၠးဘဲတအ်ဂှ် နွံပၟိက်မံၚ်အရီုဗၚ် ကၟဳဗဒၚ်ကဵု ဂဥုဲဇဗနာနာတံရောၚ် ဂွံတီ နူညးကဵုမံၚ်အရီုဗၚ် ပရေၚ်ကေၚ်ကာ ရဲပါဲဘဲပၞာန်တအ် ရ။
ပ္ဍဲကဵုဂိတုအေဗရာ တုဲကၠုၚ်တေံ အပ္ဍဲရးတနၚ်သဳ ဟိုတ်နူပေါဲဗတိုက်ဒှ်လဝ် အကြာၜါလပါ်ကီု နူဒပ်ကဝ်မယှေန်ပၞာန် ကြဳလဝ်ဗုမ်နူကဵုဗလးကျာကီု သီုဗတိုက်မံၚ်ကဵုဒရုၚ်တံတုဲ ညးဒးထောံဌာန်ဒၞာဲဝါဲ ဂြိပ်ပါဲဒဴမံၚ်တအ် အောန်အိုတ်နွံမံၚ်ၜိုတ်ကရပ် ၈၃၇၀၀ တၠရောၚ်။
ကိုပ်ကၠာတေံ ဟိုတ်နူဒှ်မံၚ်အခိၚ်ကညၚ်တုဲ ရဲပါဲဘဲပၞာန် အပ္ဍဲရးတနၚ်သဳတအ်ဂှ် ပ္ဍဲအကြာဂြိုပ်ဒဵုကဵု ဥဒျာန်ကၠအ်သဝ်တအ်ဂှ် ဂြိပ်ပါဲဓလေတ် ဂွံကီုလေဝ်၊ လၟုဟ်မ္ဂး စိုပ်ကၠုၚ်အခိၚ်ဥတုဗြဲတုဲ ကၟဳဗဒၚ်ယာတ်စဵုဗြဲ တအ်ဂှ် ဒှ်မံၚ် အရာနွံပၟိက်အဓိကရောၚ် ညးရီုဗၚ်မံၚ် ပရေၚ်ကေၚ်ကာရဲပါဲဘဲပၞာန်တအ် သ္ဂးရ။
ဂိတုအေဗရာတေံ အပ္ဍဲကဵုပေါဲဗတိုက်သီဗ္ဒိုပ် ဝေန်ဝ ပွိုၚ်ဍုၚ်တယိတ်ချံၚ်ဂှ် ညးဒေသနူကွာန်ဗွဲမဂၠိုၚ်တအ် ဒးဂြိပ်ပါဲဒဴမံၚ် သီုအလုံမွဲကွာန်မွဲတုဲ၊ပ္ဍဲခရိုၚ်ထဝါဲလေဝ် လၟိဟ်ရဲပါဲဘဲပၞာန် နွံကၠုၚ်ၜိုတ် ကရပ် ၂၆၅၀၀ တၠရ။
အခိၚ်လၟုဟ် စိုပ်ကၠုၚ်မံၚ်အခိၚ်ဥတုဗြဲတုဲ ရဲပါဲဘဲပၞာန်ဗွဲမဂၠိုၚ်တအ်ဂှ် နွံမံၚ်ပၟိက် ကၟဳဗဒၚ်ယာတ်စဵုဗြဲကဵု ဂဥုဲဇဗနာနာတံတုဲ၊ သွက်ယဲမနက် အခိင်ဥတုရာသီဗြဲတအ်ဂှ်လေဝ် နွံမံၚ်ပၟိက်ဂဥုဲဇဗကီုရောၚ် ညးလလောၚ်တြးပရိုၚ် ဂကောံကောန်ဂကူထဝါဲ ကိုဃောနတာန် ဟီုလဴကဵု ဌာန်ပရိုင်သြၚ်လောန်တိုၚ်မ်ရ။
တုဲပၠန် အပ္ဍဲခရိုၚ်ဗိက် ပွိုၚ်ဍုၚ်ဗိက်၊ ပလဝ်၊ တနၚ်သဳကေုာံ ကျောန်သုတအ်ဂှ် ဟိုတ်နူဒပ်ကဝ်မယှေန်ပၞာန် သုၚ်စောဲဒရုၚ် ကြဳဗုမ်ဗတိုက်လဝ်တုဲ ရဲဒးဂြိပ်ပါဲဒဴတအ် နွံကၠုၚ်ၜိုတ်ကရပ် ၅၇၂၀၀ တၠရောၚ် သ္ဂးလဝ်ရ။
မွဲလပါ်ပၠန်ဂှ်လေဝ် အပ္ဍဲကဵုပွိုၚ်ဍုၚ်တယိတ်ချံၚ် ဒၞာဲပွိုၚ်တိုက် တံၚ်ပျံက်၊ ပလဝ်ကေုာံ တနၚ်သဳတအ်ဂှ် ဒပ်ကဝ်မယှေန်ပၞာန် ကၟာတ်ဗဒေါအ်ဒၞာတာလဝ် အခေါၚ်ဖ္ဍိုက်ပလံၚ်ဗစိုပ် ဂဥုဲဇဗနာနာကဵု စၞစဇွောံမတအ်တုဲ သွက်ရဲပါဲဘဲပၞာန်တအ်မ္ဂး နွံမံၚ်ပၟိက်ဂဥုဲဇဗတအ် မဒှ်ရ။
အပ္ဍဲဂိတုမာတ်တုဲကၠုၚ်တေံလေဝ် ဟိုတ်နူပေါဲဗတိုက် အကြာဒပ် ကဝ်မယှေန်ပၞာန် ကဵု ဂကောံဒပ်ပၠန်ဂတးတအ် ၜါလပါ်တုဲ ညးဒးဂြိပ်ပါဲဒဴဘဲပၞာန် နွံမံၚ်ၜိုတ်ကရပ် ၈၉၇၀၀ တၠရောၚ် ဂွံတီလဝ် နူတင်နၚ် ဂကောံသုတေသနဒေသ FE5 Thanintharyi ရ။
ပရိုၚ် – သြင်လောန်တိုၚ်မ်
Photo – CJ