သိုလ်၊ မေ ၂၈
သွက်နဲကဲပညာ လွဟ်ဂတာပ်ခေတ် ကိုဝ်ရဳယာသၟဝ်ကျာဂှ် စမ်ၜတ် ပန်ပတိတ်လဝ် ကမ်သၠောဝ်ထိၚ်သၞေဝ် ပန်တာဇမၠိ ၊ လွဟ်ဇၞော် ကေုာံ ကမ်သၠောဝ် ခရုဇ် ပံၚ်နှဴလဝ် ဗီုကဵုနဲကဲဗျူဟာ ထိၚ်လဝ်နကဵု AI တအ်ဂှ် ဌာန်ပရိုၚ်အလဵုအသဳ KCNA လလောၚ်တြးလဝ် အပ္ဍဲဂိတုမေ ၂၇ ရ။
ပရေၚ်ပန်စမ်ၜတ်လွဟ်တအ်ဏံဂှ် နကဵုအလဵုဇကု က္ဍိုပ်သ္ကိုပ် ကိုဝ်ရဳယာသၟဝ်ကျာ ကေန်ဂျုၚ်အာန် မင်ကောပ်ကာဲထိၚ်ကြာပ် အာလဝ်ရောၚ်။
ကမ်သၠောဝ်အဆံၚ်သၠုၚ် ပန်တာဇမၠိၚ်သ္ၚောဲတံ အစောန်စရာဲ ပိုၚ်ပြဳလဝ် လွဟ်နျူကလဳယျာ ၜိုန်ရနွံမံၚ်ကီုလေဝ် ကိုဝ်ရဳယာသၟဝ်ကျာ သွက်ဂွံသၠုၚ်ပတိုန်အာအဆံၚ် တိုက်စွံလွဟ်မကမ် လၟေၚ်ဓမ္မတာ ဗီုကဵုနဲကဲဗျူဟာ တအ် ကၠောန်မံၚ် ဆက်က်တုဲ သွက်ဂွံဖျေံစွံအာ ဗ္ဒာဲပယျဵု ကိုဝ်ရဳယာသၠုၚ်ကျာရောၚ် ကြဴဇာမံၚ်ရ။
ပရေၚ်စမ်ၜတ်တအ်ဏံဂှ်မ္ဂး သွက်ဂွံလ္ၚတ်အာ ဇြဟတ်က္ဍိုပ်မကမ်လွဟ်တၟေၚ် ဗီုကဵုနဲကဲဗျူဟာ ဗ္ဂပ်စွံလဝ်ကမ်သၠောဝ်တအ်၊ သွက်ဂွံ စမ်ၜတ်ပရေၚ်ဂွံပတေဟ်စ နကဵုသၞောတ်လွဟ်ဇၞော် ပန်တာဇမၠိၚ်သ္ၚောဲ ကေုာံ ပရေၚ်ချိုတ်ပၠိုတ် နကဵုကမ်သၠောဝ်ခရုဇ် ထိၚ်နကဵု AI တအ်ရောၚ် KCNA ချူထမံက်ထ္ၜး လဝ်ရောၚ်။
အတိုၚ်ပရေၚ်စမ်ၜတ်ဏံမ္ဂး လွဟ်တအ်ဏံ ကေုာံ သၞောတ် ပရေၚ်ပန်ပတိတ်ကေတ်အာ အလဵုအလဵုတအ်ဂှ် သွက်ပေါဲပၞာန်ခေတ်တၟိမ္ဂး သၞောတ်ဗ္ၜတ်အဆံၚ်ကိတ်ညံၚ်ဂွံကိတ်ညဳ သၠုၚ်ပတိုန်လဝ်တုဲရောၚ် ကေန်ဂျုၚ်အာန် ဟီုရ။
ကမ်သၠောဝ်ထိၚ်နကဵု AI တအ်ဂှ် ပွန်နွံဇမ္ၚောဲဒဵုကဵု ၆၂ တိုၚ်ဂှ် ပန်မာန်ချိုတ်ပၠိုတ်ရောၚ် ကေန်ဂျုၚ်အာန် ဟီုရ။
ဍုၚ်သိုလ် ဒှ်ဍုၚ်ဇၞော် ကိုဝ်ရဳယာသၠုၚ်ကျာ ဒၞာဲမၞိဟ်မံၚ်တီုကၠီုဂၠိုၚ်မံၚ်တအ်ဂှ် နွံမံၚ်အပ္ဍဲဗွိုၚ် ကမ်သၠောဝ်တအ်ဏံ စိုပ်မာန်ရောၚ်။
ကိုဝ်ရဳယာသၟဝ်ကျာ ဖန်ဗ္ဒျ်ကၠောန်လဝ် ဒရုၚ်သုၚ်စောဲနဲကဲ AI တအ်လေဝ် နွံမံၚ်တုဲ သၞောတ်သမ္တီကေတ် ဒၞာဲပွန်အလဵုလဵုတံလေဝ် ပါလုပ်ကီုရ။
ကိုဝ်ရဳယာသၟဝ်ကျာ ဟိုတ်နူထံက်ပၚ်ကဵုလဝ်ကမ်သၠောဝ် ကုရတ်ယှာတုဲ သွက်နဲကဲပညာပၞာန်ညးတအ်ဂှ် ညံၚ်ရဴဗီုကဵု ဂွံလဝ်တင်နၚ်ပရိုၚ် နွံကဵုၚုဟ်မးတအ်ရောၚ် ညးလ္ၚတ်တအ် ဟီုရ။
Ref:Reuters