ရေဝ်၊ မေ ၂၈
အပ္ဍဲတွဵုရးမန် ဂကောံဒပ်ပၠန်ဂတးဖျေံသ္ဇိုၚ် ပွိုၚ်ဍုၚ်ရေဝ် ဒၞာဲဗ္ဒိုပ်ဌာန်ဂဥုပ် ဂကောံလကိုတ်ရေဝ်နွံမံၚ်ဂှ် နူကဵုဒပ် အလဵုအသဳပၞာန်သီအဝဵု ကြဳလဝ်ဗုမ်နကဵုၜၚ်ကျာ ဇၞော်ကဵုဇြဟတ်ရောၚ် နူတမ်ရိုဟ်ကၞက်ပရိုၚ်ပၞာန် အပ္ဍဲဒေသတအ် ဟီုလဴကဵု ဌာန်ပရိုင်သြၚ်လောန်တိုၚ်မ်ရ။
အပ္ဍဲဂိတုမေ ၂၇ အခိၚ်ဂယးပြဟ် ၁ နာဍဳဂှ် ဒပ်ပၞာန်သီအဝဵု သုၚ်စောဲ ၜၚ်ကျာဂျက်ဖိုက်တာ Y 12 တုဲ ကြဳလဝ်ဗုမ် ဒၞာဲကဵုဗ္ဒိုပ် ဌာန်ဂဥုပ် ဂကောံလကိုတ်ရေဝ် ၄ လန် မဒှ်ရ။
ဟိုတ်နူဒးဒုၚ်ကြဳဗုမ်ၜၚ်ကျာဂှ်ရ ကောန်ပၞာန်လကိုတ်ရေဝ် ချိုတ်အာကြပ် ၁၀ တၠ ဟွံအောန်နူကဵု ၂၀ တၠဒးဝပ်နွံတုဲ စမြိုၚ်ဒၞာဲဗ္ဒိုပ် ဗွဲမဂၠိုၚ်လေဝ် လီုလာ်အာကီု သ္ဂးရ။
အပ္ဍဲကရောံပရေၚ်ကြဳဗုမ်ဏံဂှ် က္ဍိုပ်သ္ကိုပ်ဂကောံလကိုတ်ရေဝ် ချိုတ်အာလဝ်ကီုရောၚ် ရဲလဝ်ဗဳဒပ်ပၞာန်တံ တြးဝါဒ ချူထမံက်လဝ် ရ။
သွက်ပရေၚ်လဝေၚ်ပၞာန်မွဲဒၞာဲ က္ဍိုပ်သ္ကိုပ်ဂကောံလကိုတ်ရေဝ် အဃာအာစိုပ်မံၚ်မုက်ပၞာန်ဂှ်ရ ပ္ဍဲအရာကြဳဗုမ်ဏံ ဗၠးတိတ်အာလဝ်ရောၚ် နူရိုဟ်ကၞက်ပရိုၚ်ပၞာန်ဒေသတအ် သ္ဂးရ။
ပ္ဍဲဂိတုမေ ၁၁ တုဲကၠုၚ်တေံလေဝ် ပ္ဍဲဍုၚ်လၟိုၚ် ပွိုၚ်ဍုၚ်ရေဝ်ဂှ် နူတမ်ဒပ်အလဵုအသဳပၞာန် ခလရ ၁၀၆ ဒုသ္ကိုပ်တမ်ဒပ် သ္ကိုပ်ဗိုလ် ထောန်ယာကျဝ်ဂှ် ဂကောံလကိုတ်ရေဝ် ပန်ဂစိုတ်လဝ်နွံရ။
အပ္ဍဲကာလသီလဝ်အဝဵုဏံ ဂကောံလကိုတ်ရေဝ် အာလုပ်ဗတိုက်လဝ် ဗ္ဒိုပ်ပၞာန်တအ်ကီု၊ ပန်ဂစိုတ်လဝ် ညးတာလျိုၚ်ပၞာန်ကဵု ဗၠာဲသၟိၚ်တအ်ကီုနွံတုဲ နဲလဵုဂွံဂွံ ညံၚ်ဂွံပန်သလိပ်ထောံ ကုက္ဍိုပ်သ္ကိုပ် ဂကောံလကိုတ်ရေဝ်ဂှ် ရဲလဝ်ဗဳဒပ်ပၞာန်တအ် ဗတိုက်ဖအောဝ် ဆဝ်မ္ၚုဟ်မံၚ်လၟိုန် မဒှ်ရ။
ဂကောံလကိုတ်ရေဝ်ဂှ် ဒှ်တမ်ဒပ် သၟဝ်ဒပ်စဵုဒၞာညးဍုၚ်ကွာန် PDF မွဲတုဲ အဓိက ချဳဒရာၚ်မံၚ်ပရေၚ်ပၞာန် အပ္ဍဲကဵုပွိုၚ်ဍုၚ်ရေဝ် တွဵုရးမန် မဒှ်ရ။
ပရိုၚ် – သြင်လောန်တိုၚ်မ်
Photo – ဂကောံလကိုတ်ရေဝ်