မတ်မလီု ၊ မေ ၂၈
စှ်ေဗလးတိတုဲ သွက်ဂွံဗတိုက်ပလီုအာဝိုၚ်ဝေၚ် အန်လာၚ်တအ်ဂှ် သမ္မတသီအဝဵု ဥူမေန်အံၚ်လှိုၚ် ဟီုမံၚ်ကီုလေဝ် ဝိုၚ်ဝေၚ် ဗလးတိတွဵုရးမန်တအ်ဂှ် မိပ်လဟိၚ်မံၚ် ညံၚ်ရဴ မိပ်ပဝ်မံၚ်လ္တူဗလးကျာရောၚ် ညးဒေသတအ် ဟီုလဴကဵု ဌာန်ပရိုင်သြၚ်လောန်တိုၚ်မ်ရ။
အပ္ဍဲကောံဓရီု ဂကောံအလဵုအသဳပၞာန် ကၠောန်ဗဒှ်လဝ် ပ္ဍဲကဵုနေပျဳဒဝ် ဂိတုမေ ၂၆ တေံဂှ် စှ်ေဗလးတိတုဲ သွက်ဂွံဗတိုက်ပလီုအာ ဝိုၚ်ဝေၚ်အန်လာၚ်တအ်ဂှ် သမ္မတသီအဝဵု ကဵုလဝ်စၞောန်ပ္ညုၚ်ကုသ္ကိုပ်ဝန်ဇၞော် ရးဒေသဇၞော် ကေုာံ သ္ကိုပ်ဝန်ဇၞော် တွဵုရးတအ်ရောၚ်။
သွက်ပရေၚ် ဝိုၚ်ဝေၚ်အန်လာၚ်တအ်ဂှ် နူကဵုညးနွံတာလျိုၚ် အလဵုအသဳ ရးဒေသဇၞော်ကေုာံ တွဵုရးတအ်ဂှ် ဒးပံၚ်တောဲကဵု ဂကောံဆေၚ်စပ်တအ်ကီု စှ်ေဗလးတိတုဲ ကမၠောန်ဗတိုက်ပလီု ဝိုၚ်ဝေၚ်အန်လာၚ်တအ်ဂှ် ဒးကၠောန်အာဗွဲမစိုပ်တရဴရောၚ် သမ္မတသီအဝဵု စၞောန်ပ္ညုၚ်ကၠုၚ်လဝ်ရ။
စှ်ေဗလးတိတုဲ သွက်ဂွံဗတိုက်ပလီုအာ ဝိုၚ်ဝေၚ်အန်လာၚ်ရောၚ် ၜိုန်ရ ဟီုမံၚ်ကီုလေဝ်၊ ပြဟ်ဟ်ဏံ ဝိုၚ်ဝေၚ်နွံမံၚ်တအ်ဏံဂှ် အလဵုဇကု ညးနွံတာလျိုၚ်တအ် ကေတ်လဝ်သြန်အန်လာၚ်ကဵုလဝ်အခေါၚ်ဂှ်ရ အရေဝ်ကဵုလဟီု ဟွံကိတ်ညဳကွေံကွေံပုဟ် ညးဒေသတွဵုရးမန်မွဲတၠမ္ဂး ပါ်ပါဲလဝ်ရ။
“ကၠောန်မံၚ် ဗီုပြၚ်ဟွံစှ်ေနတဲကွေံပုဟ်။ အရေဝ်ဍေံတအ် ဗီုအရေဝ်တိတ်နူပါၚ်ဂှ် ဗက်ဟီုမံၚ်ဏောၚ်။ ဝိုၚ်ဝေၚ် အပ္ဍဲတွဵုရးကဵုရးတအ်မ္ဂး တွဵုရးမန်ပရေအ်အိုတ်ရ။ ပ္ဍဲတွဵုရးမန်ဏံ၊ ဒးကဵုမံၚ်သြန်တွဵု။ ဒးအာကဵုသ္ကိုပ်ဒပ်လဵု၊ ဒးအာကဵုသြန်ညးတာလျိုၚ်ပၞာန်လဵု လၟုဟ်ဒးကဵုမံၚ်ရ။ ပိုဲတအ်ညာတ်လဝ်ကဵု နမတ်ရောၚ်” သာ်ဝွံ သ္ဂးရ။
တုဲပၠန် ဝိုၚ်ဝေၚ်ဗလးတိတအ်ဂှ်လေဝ် ကေတ်လဝ်သြန် ကဵုလဝ်အခေါၚ် ညံၚ်ရဴလုပ်သၞောဝ်တုဲ သွက်ဂွံဗတိုက်ပလီု ဝိုၚ်ဝေၚ်အန်လာၚ်ဟီုဂှ် ဒှ်ဟွံမာန်တုဲ ဆၜိုတ် သွက်မၞိဟ်တံဂွံကလၚ်စခိုဟ်ဓဝ် ဟီုဂးမံၚ်ရောၚ် ညးဆက်ဟီုရ။
စနူသၞာံ ၂၀၂၄ တေံတုဲ အပ္ဍဲတွဵုရးမန်ဂှ် ဂကောံပၞာန်သီအဝဵု ကဵုလဝ်အခေါၚ်ပါမေတ် ပံက်ဝိုၚ်ဝေၚ် ပ္ဍဲကဵုဇၟာပ်ပ်ပွိုၚ်ဍုၚ် ဗွဲမလုပ်သၞောဝ်ရောၚ်။
ဟိုတ်နူ ဝိုၚ်ဝေၚ်တအ်နွံမံၚ်တုဲ အပ္ဍဲအကြာဒေသ ပရေၚ်ပၠံၚ်ၜးကမၠတ်ဒမၠကီု၊ ပရေၚ်ပိုန်ဒြပ် ကၟိန်သ္ၚိဌာန်တအ်လီုလာ်အာနွံတုဲ သၟတ်တအ်လေဝ် ဒဂေတ်ပဋိပတ်လီုလာ်ကၠုၚ်လဝ် ဂၠိုၚ်မံၚ်ရ။
ဟိုတ်နူကဵု ပရေၚ်ဝိုၚ်ဝေၚ်တအ်ဏအ်တုဲ ပရေၚ်ဘဝ ပိုန်ဒြပ်မၞိဟ်တအ် လီုလာ်အာလဝ်ဇၞော်ကဵုဇြဟတ်ကီုလေဝ် ညးတာလျိုၚ်အလဵုအသဳပၞာန် ကဆံၚ်ဆံၚ်တံ ထ္ၜးဟိုတ်ကဵုသွက်ဂွံဂွံသြန်ဂအုံဂးတုဲ ညိလေဝ်ဟွံသ္ပတီ ဆက်သ္ပလဝ် မတ်ဇျှဟ် မဒှ်ရ။
ပရိုၚ် – သြင်လောန်တိုၚ်မ်
Photo – CJ