ၜဳကလေၚ်၊ မေ ၂၉
ပ္ဍဲကဵုတွဵုရးမန်ဂှ် ပွိုၚ်ဍုၚ်ၜဳကလေၚ် လ္တူဂၠံၚ်ကွဳစက် လ္ဂုၚ်-မတ်မလီု ဗ္ဒာဲဘာဗတောန်လိက် ကွာန်ဒံက်ယာတ်ဂှ် သၟတ်ရဲဍုၚ်ၜဳကလေၚ်မွဲတၠ ဟိုတ်နူဒပ်ပၞာန်ဗၟာ ဗိုၚ်ကြာပ်ပန်ဂှ်ရ ချိုတ်အာလဝ်ရောၚ်ဂှ် ညးဒေသတအ် ဟီုလဴကဵု ဌာန်ပရိုၚ်သြင်လောန်တိုၚ်မ် ရ။
ရဲကောန်ဍုၚ်ၜဳကလေၚ် ကိုထောန်ထောန် အာယုက် ၂၅ သၞာံ နူဆေၚ် သွံရာန်ကပေါတ်ကွဳစက် “ထောန်ထောန်” အပ္ဍဲ ဂိတုမေ ၂၇ ၜိုတ်အခိၚ်ဗ္တံ ၁၀ နာဍဳဂှ် အဟိန်ကလေၚ်စဴကၠုၚ်နူဍုၚ်သဓီု စိုပ်ကၠုၚ် ဍုၚ်ၜဳကလေၚ်ဂှ် ဒးဒုၚ်ဗိုၚ်ကြာပ်ပန်တုဲ ချိုတ်အာမဒှ်ရ။
ကိုထောန်ထောန်မွဲတၠဓဝ် အဟိန်ဒဳကၠုၚ်ကွဳစက်ဂှ် ဒပ်ကဝ်မယှေန်ပၞာန် နူဂိက်သၞေဟ်ကင် “မသဝ်”တံ ကညာၚ်ကော်ဗဒေါအ်ကွဳစက်ဂှ် ဟွံမိၚ်တုဲ ဒဳတိတ်အာလဝ်ရောၚ် ရဲလ္တူဍုၚ်တအ် သ္ဂးရ။
တုဲပၠန် နူဂိက်သၞေဟ်ကင်မသဝ်ဏံ ပလံၚ်ဏာပရိုၚ် ဒပ်ပၞာန်နွံမံၚ် ပ္ဍဲတိုဝ်ဂိက်ၜဳကလေၚ်တေံတုဲ ဒပ်ကဝ်မယှေန်ပၞာန် နွံပ္ဍဲတိုဝ်ဂိက်တအ် မၚ်ကြတ်ဒၟံၚ်ဗ္ဒာဲဘာဗတောန်လိက် ကွာန်ဒံက်ယာတ်ဂှ်တုဲ ဗိုၚ်ကြာပ်ပန်ဏာကဵုသေနာတ် ဗွဲမဂၠိုၚ်ဂၠၚ်ရ။
ဟိုတ်နူ ဒးဒုၚ်ဗိုၚ်ကြာပ်ပန်ကဵုသေနာတ်ဂှ်ရ ကိုထောန်ထောန် ဒးဝပ်ဘဲသေနာတ် အပ္ဍဲက္ဍိုပ်၊ သြိုဟ်ကဵု မုက်မတ်တအ် ဗွဲမဂၠိုၚ်တုဲ အပ္ဍဲဒၞာဲဒှ်ပရူဂှ်ရ မွဲအလန်ဓဝ် ချိုတ်အာရောၚ်။
ဇွဒးဒုၚ်ပန်ဂစိုတ်လဝ်ဂှ် နူဒပ်ကဝ်မယှေန်ပၞာန်ကၠဟ်ထောံစွံလဝ် လ္တူဂၠံၚ်အတိုၚ်ဗီုဒှ်လဝ်ဂှ်တုဲ ပ္ဍဲအခိၚ်နူဂယး ဂိတုမေ ၂၈ ဂှ်မှ ဂကောံရီုဗၚ်ဟံၚ်ပြာ်မှာဇန်တအ် ကၠုၚ်ကပှ်ကေတ်ဏာတုဲ ဗလံၚ်ဏာလဝ်ဇရေၚ်ခဒမ်ပါ်သြိုဟ် ရုၚ်ဂဥုဲ ညးဍုၚ်ကွာန်ၜဳကလေၚ်ရ။
နူကဵုဒပ်ပၞာန်ဗၠးၜး ကောန်ဂကူကရေၚ် KNLA ကေုာံ ဒပ်စဵုဒၞာ ညးဍုၚ်ကွာန် PDF တအ် ကၠောန်လဝ် ပရေၚ်ပန်ဂစိုတ်လဝ်ဏံရောၚ် နူကဵုဒပ်ကဝ်မယှေန်ပၞာန် နွံပ္ဍဲတိုဝ်ဂိက်ၜဳကလေၚ်တအ်လီဠာန်တုဲ ပလံၚ်ဏာလဝ် ပရိုၚ်ဇဟရောၚ် ဂွံတီကေတ် နူညးကြပ်ကဵု ဒပ်ပၞာန်တအ်ရ။
ပရိုၚ် – သြင်လောန်တိုၚ်မ်
Photo – CJ