မတ်မလီု၊ ဂိတုမေ ၂၉
အပ္ဍဲကဵုတွဵုရးမန် ပရေၚ်တံၚ်မံၚ်ပဝ်တာ သွက်ယိုက်ဝန်ပၞာန်ဟၟဲကဵုဥပဒေ ရဲဂကောံသၟဝ်တဲဒပ်ပၞာန်သီအဝဵုတအ် ကၠောန်မံၚ်ဂှ်မ္ဂး ပရေၚ်ထံက်ထ္ၜးပါ်ပါဲ နူကဵုညးစၞးစၠတ်ထဝ်တအ်ဂှ်တှ်ေ ညိလေဝ်ဟွံဂွံဆဵုညာတ်လဝ် ဏီပုဟ်။
သွက်သ္ဂောံပံက်အာ ဘာတန်ဗတောန်ယိုက်ဝန်ပၞာန် ညးဍုၚ်ကွာန်ဇၟာပ်ဂိတုမာန်ဂှ် သၟတ်အပ္ဍဲဒေသတအ် ဒးဒုၚ်တံၚ်မံၚ်ပဝ်တာ ဒးဒုၚ်ရပ်ဏာ ပရေၚ်ဟၟဲကဵုဥပဒေတအ်ဂှ် ရဲဂကောံသၟဝ်တဲဒပ်ပၞာန်တအ် ကၠောန်မံၚ်ဆက်က် မဒှ်ရ။
ဗွဲတၟေၚ် ရဲအာကမၠောန် စဴနူကမၠောန်တအ်ကီု၊ ရဲအာတရဴ၊ ရဲဗတောန်မံၚ်လိက်၊ စနူကဵုသၟတ်မင်မွဲကၠောန်ဗ္စမံၚ် မိမ အာယုက်ဇၞော်တအ်လေဝ် ဒးဒုၚ်ရပ်ဏာမံၚ် ဟၟဲကဵုပရေၚ်သၞောဝ်ဥပဒေဂှ် ဍေံတံကၠောန်မံၚ်ရောၚ်။
သၟတ်ဒးဒုၚ်ရပ်ဏာ သွက်ယိုက်ဝန်ပၞာန်တအ်မ္ဂး အခေါၚ်ဗၠးၜး နူပရေၚ်ယိုက်ဝန်ပၞာန်၊ အခေါၚ်ယှအ်ဖျေံ၊ အခေါၚ်ဆုဲပြံၚ်အခိၚ်တအ်လေဝ် ဟွံဂွံအခေါၚ်ပတိုန်ထ္ၜးတုဲ မွဲအလန်ဓဝ်ပလံၚ်ဗ္စိုပ်ဏာ ဇရေၚ်ဒပ်ပကောံကောန်ပၞာန်တၟိတအ် ဗွဲမပြဟ်ဂှ် နွံမံၚ်ဖဝ်နဖဝ်နံၚ် ဂၠိုၚ်မံၚ် မဒှ်ရ။
အတိုၚ်ဌာန်ပရိုၚ်သြင်လောန်တိုၚ်မ် ဆဵုဂဗသၟာန်သၟုက်လဝ် ညးဒေသမန် ၃ တၠတအ်မ္ဂး ပွမရပ်ဏာ ပရေၚ်ယိုက်ဝန်ပၞာန်ဟၟဲကဵုဥပဒေ ဗီုဗီုတံဏံ အမာတ်စၠတ်ထဝ်တအ် သ္ၚိတ်ဇြမံၚ်ဂှ်တှ်ေ ဒှ်အမာတ်ဒုၚ်ယၟု ရုဲစှ်လဝ်ဒှ်တုဲ ရဲဒးဖေက်မံၚ်ဒပ်ပၞာန်တအ်ရောၚ် ပါ်ပါဲလဝ်ရ။
အတိုၚ်ဥပဒေ ယိုက်ဝန်ပၞာန်ညးဍုၚ်ကွာန် ပတိတ်လဝ် ပ္ဍဲကဵုဂိတု ဖေဖဝ်ဝါရဳ ၁၀၊ သၞာံ ၂၀၂၄ တေံမ္ဂး ဇၟာပ်ကောန်ဍုၚ်တအ် ညးဂမၠိုၚ် ပေၚ်အာယုက် ၁၈ သၞာံ စဵုကဵု ၃၅ သၞာံမ္ဂး အောန်အိုတ် ၂ သၞာံ စဵုကဵု ၅ သၞာံ ညံၚ်ဂွံယိုက်ဂၠေၚ်အာ တာလျိုၚ်ပၞာန်ပေၚ်ၚ်ရောၚ် ချူခၞံလဝ်နွံရ။
အတိုၚ် ဥပဒေယိုက်ဝန်ပၞာန်ညးဍုၚ်ကွာန်ပါလုပ်မံၚ် အခန် ၈ ၊ ၝောံပိုဒ် ၃၃၊ ၝောံပိုဒ်ပါ် ၇၉ တအ်မ္ဂး သၟတ်ပါလုပ်အဝေါၚ် ပရေၚ်ယိုက်ဝန်ပၞာန်တအ် အခေါၚ်ယှအ်ဖျေံကေုာံ အခေါၚ်ပဆုဲပြံၚ် ဏာတအ်ဂှ် ဗွဲလၟေၚ်ဥပဒေ ဂမြၚ်ပတိုန်လိက်မာန်ရ။
အတိုၚ်ဥပဒေ ပရေၚ်ယိုက်ဝန်ပၞာန်ညးဍုၚ်ကွာန် ၝောံပိုဒ် ၁၅ (က) မ္ဂး ရဲဗတောန်မံၚ်လိက်တအ်ကီု၊ ရဲမၚ်မွဲလွဳပရာမံၚ် မိမ အာယုက်ဇၞော်ဇၞော်တအ်ဂှ် နူကဵုတာလျိုၚ်ဒးယိုက်ဝန်ပၞာန်ဂှ် ပဆုဲပြံၚ်ဏာမာန်ရောၚ် ချူခၞံလဝ်နွံရ။
ဆဂး ဂကောံသၟဝ်တဲဒပ်ပၞာန်သီအဝဵုတအ် လုပ်ရပ်ဏာသၟတ်အပ္ဍဲသ္ၚိတအ်ဂှ် ရံၚ်အာအတိုၚ်ပရေၚ်ဥပဒေ ယိုက်ဝန်ပၞာန်မ္ဂး အခေါၚ်အရာဂုဏ်ဖဵု သွက်ဂွံပတိုန်လိက်ဂှ်အခေါၚ်ဟွံမွဲတုဲ ဒးဒုၚ်ပကောံဏာ သွက်ဂွံယိုက်ဝန်ပၞာန် ဟၟဲကဵုပရေၚ်ဥပဒေတံရ။
ပွမရပ်ဏာ ပရေၚ်ယိုက်ဝန်ပၞာန် ဟၟဲကဵုဥပဒေတအ်ဂှ် စိုပ်အပ္ဍဲစၠတ်ထဝ်မ္ဂး အမာတ်မန်တအ်သတ္တိနွံနွံ ညံၚ်သ္ဂောံ သၟာန်သၟုက်အာ ဟွံသေၚ်မ္ဂး ညံၚ်သ္ဂောံပတိုန်အာ ဂလာန်တအ်ကီု ကၠောန်ကဵုညိဂှ် သၟတ်မန်မွဲတၠ အာတ်မိက်လဝ်ရောၚ်။
စပ်ကဵုပရိုၚ်ဏံတုဲ နူကဵုဌာန်ပရိုၚ်သြင်လောန်တိုၚ်မ် ကေတ်အဆက်သၟာန်သၟုက်လဝ် ညးစၞးစၠတ်ထဝ်တွဵုရးမန် ၃ တၠကီုလေဝ် ပရေၚ်ဒုၚ်တဲ သှ်ကလးကဵုလဝ် ဟွံမွဲပုဟ်။
အတိုၚ်တင်နၚ် ဌာန်ပရိုၚ်သြင်လောန်တိုၚ်မ် ပကောံဂွံလဝ်မ္ဂး အပ္ဍဲတွဵုရးမန် ဒပ်ပၞာန်သီအဝဵု ပံက်မံၚ်တန် ဗတောန်ယိုက်ဝန်ပၞာန် ညးဍုၚ်ကွာန်ဇၟာပ်ပ်ဂိတုဂှ် စနူလၟေၚ် ၁ စဵုကဵုလၟေၚ် ၁၅ မ္ဂး သၟတ်အပ္ဍဲဒေသ ဟွံအောန်နူ ၅၂၀၀ တၠ ဒးဒုၚ်ပကောံလဝ် ပရေၚ်ယိုက်ဝန်ပၞာန်တုဲဒှ်အာလဝ်ယျ။
ရဲတိုန်မံၚ်တန်ဗတောန်ယိုက်ဝန်ပၞာန် ညးဍုၚ်ကွာန်ဇၟာပ်ပ်ဂိတုတအ်ဂှ် ဒှ်မံၚ်ညးကၠုၚ်ပအပ်လဝ်စရၚ်ယၟု နကဵု အလဵုဆန္ဒဇကုညးတံရောၚ် လိက်ပရိုၚ်တြးဝါဒ အလဵုအသဳပၞာန် သီအဝဵုတအ် လီဠာန်ချုထ္မံက်လဝ်ရ။
ပရိုၚ် – သြင်လောန်တိုၚ်မ်
Photo – Social Media