မတ်မလီု၊ မေ ၃၀
အပ္ဍဲတွဵုရးမန် လ္တူဍုၚ်မတ်မလီု ယဝ်ရကွဳစက်ဟမိက် ဟွံကၠုၚ် ၂ တ္ၚဲပြၚ်အာမ္ဂး နူကဵုသ္ကိုပ်ပရေၚ်အုပ်ဓုပ် အရာပ်တအ်မွဲအဆံၚ် ပလံၚ်နၚ်ပရိုၚ်မာန်ရောၚ် သာ်ဝွံ ဂကောံပရေၚ်ဗဂဵုလဟဵုတအ် ဟီုလဝ်ဂှ်တှ်ေ ဟွံစှ်ေဗီုပြၚ်ကွေံပုဟ် ညးလ္တူဍုၚ်တအ် ပါ်ပါဲဟီုဂးမံၚ်အိုတ်ရ။ အပ္ဍဲဂိတုမေ ၂၇ လောန်ကၠုၚ်ဏအ် ပ္ဍဲကဵုအရာပ်မျာၚ်သာယာ ဍုၚ်မတ်မလီု ကၠောန်ဗဒှ် ပေါဲဝိုင်တက်ကျာသဳကၠဳ ညးဍုၚ်ကွာန် သွက်ပွဳပွူ ဂွံသ္အးဇ္ၚးကျေဝ်ဂေါဝ်ဂှ် စပ်ကဵုကိစ္စကွဳစက်ဟမိက်တုဲ ညးတာလျိုၚ် ဂကောံပရေၚ်ဗဂဵုလဟဵု ပွိုၚ်ဍုၚ်မတ်မလီု ဥူတဇြေၚ်ညိၚ် ဟီုလဴလဝ် မဒှ်ရ။
ကွဳစက်ဟမိက်တအ်ဂှ် အပ္ဍဲပွိုၚ်မွဲသတ္တဟမ္ဂး ကၠုၚ်ဆမွဲတ္ၚဲဓဝ်တုဲ တ္ၚဲဟွံကၠုၚ်တအ်လေဝ်နွံမံၚ်တုဲ ဟိုတ်နူဒးကဵုပရိုၚ်ကဵု သ္ကိုပ်ပရေၚ်အုပ်ဓုပ်တအ်ဟီုဂှ် ဒှ်ဂလာန် သွက်မၞိဟ်တအ် ဂွံမိၚ်ခိုဟ်ရောၚ် ကောန်ဍုၚ်မတ်မလီုမွဲတၠ ပါ်ပါဲလဝ်ရောၚ်။
“ပ္ဍဲမွဲသတ္တဟမ္ဂး ကၠုၚ်ဆမွဲတ္ၚဲဟေၚ်။ မွဲတ္ၚဲဂှ်လေဝ် လဆောဝ်မ္ဂး ဟွံစိုပ်ပုဟ်။ ကာလအာလဴပရိုၚ်မ္ဂး နူကဵုမၞးတအ်လေဝ် ဒှ်စညိည စနူပရေၚ်အိက်တံ ဟယာအာတံ ဒးအာဟီုလဴကဵု သ္ကိုပ်ပရေၚ်အုပ်ဓုပ်ကီုဟာ သာ်ဝွံ ဒးဒုၚ်ဗျိထညက်ထညောန်ဏီရ။ ညးတအ်ဂှ် ဆၜိုတ်ဟီုမံၚ်ရ။ လၟုဟ်လေဝ် ညံၚ်မၞိဟ်တအ်ဂွံမိၚ်စခိုဟ်ဓဝ် ဟီုမံၚ်ရ။ အတိုၚ်ညးတအ်ဟီုဂှ် မွဲလေဝ် ဟွံထမံက်ရုပ်ရဴဏီပုဟ်” သာ်ဝွံ သ္ဂးရ။
တုဲပၠန် ကွဳစက်ဟမိက်ဂကောံဗဂဵုလဟဵု ကၠုၚ်မွဲသတ္တဟမွဲအလန်တအ်ဂှ်လေဝ် ဟမိက်ရဲကဵုသြန်ဂၠိုၚ်တအ်သၟးရ သီကေတ်ဏာတုဲ ညးတၞဟ်တအ်ဂှ်တှ်ေ ဟမိက်ပေၚ်အာယျ ထ္ၜးဟိုတ်သာ်ဏအ်တုဲ သီကေတ်ကဵုဏာဟွံမွဲပုဟ်ဂှ် ညးဆက်ဟီုလဴကဵု ဌာန်ပရိုင်သြၚ်လောန်တိုၚ်မ်ရ။
ကမၠောန်သီဂိုၚ်ဟမိက်ဂှ် နကဵုကွဳစက်ဟမိက် ၂၂ မ၊ ကောန်ကမၠောန် သီကပှ်ဟမိက် ၁၅၁ တၠတအ် ကၠောန်ဒၟံၚ်တုဲ ကွဳစက်ဟမိက် ၆ မဂှ် လီုဒၟံၚ်ရောၚ် ညးတာလျိုၚ် ဂကောံပရေၚ်ဗဂဵုလဟဵု ပွိုၚ်ဍုၚ်မတ်မလီု ဥူတဇြေၚ်ညိၚ် ဟီုရ။
ဟိုတ်နူကွဳစက်ဟမိက်တအ် လီုဒၟံၚ်တုဲ အရာပ်မွဲမွဲဂှ် ၂ တ္ၚဲမွဲအလန် ကွဳစက်ဟမိက် ၂ မဏံ သီဂိုၚ်ကၠောန်ကဵုဒၟံၚ်ရောၚ် ဟီုကီုလေဝ် ပ္ဍဲဗလးတိဇေတ်တ်မ္ဂး ချိၚ်ကဵုလဝ်တ္ၚဲဟွံမွဲတုဲ အခိၚ်မိက်ဂွံကၠုၚ်တှ်ေ ကၠုၚ်မံၚ်ရောၚ် ညးဒေသတအ် ဟီုရ။
အတိုၚ်စရင်လၟိဟ်မၞိဟ် သၞာံ ၂၀၂၄ ဂှ်မ္ဂး ပ္ဍဲဍုၚ်မတ်မလီု မၞိဟ်မၞုံမံၚ် ပွဳပွူအကြာ ၃ ကိုတ်ဂှ် ယဝ်ရၜတ်ကၞာတ်အာကဵု လၟိဟ်ကောန်ကမၠောန် အုဲဟမိက်တံမ္ဂး ကောန်ကမၠောန် အုဲဟမိက်မွဲတၠဂှ် ဒးသီဂိုၚ်မံၚ်ဟမိက် သွက်မၞိဟ် ၂၀၀၀ ပြၚ် မဒှ်ရ။
နူကဵုဂကောံပရေၚ်ဗဂဵုလဟဵု ဂွံလဝ် အကံက်အခေါန်ဂၠိုၚ်အိုတ်ဂှ် သွက်ဍုၚ်မတ်မလီု ဟွံထပ်ခါန်ကၞက်ကဵု ကောန်ကမၠောန် အုဲဟမိက်တအ်ဂှ်ကီု၊ ကွဳစက်ဟမိက်တအ် ဟွံထပ်ရာန်ဗပေၚ်စုတ်တုဲ လ္တူကမၠောန် ပရေၚ်ဗဂဵုလဟဵုသာယာ ကၠောန်မံၚ်တံဂှ်တုဲ ညးဒေသတအ်ဂှ် ဟီုဂးပါ်ပါဲမံၚ်ဇၞော်ကဵုဇြဟတ်ရ။
အပ္ဍဲဂၠးကဝ် ကေုာံ နိဂီုဍုၚ်အပ္ဍဲဒေသတအ်ဂှ်မ္ဂး ကောန်ကမၠောန် အုဲဂိုၚ်ဟမိက်မွဲတၠ ကေုာံ ညးရီုဗၚ်မွဲတၠတံဂှ် ဇၟာပ်ပ်တ္ၚဲ ဒးအုဲသီဂိုၚ်ဒၟံၚ် ဟမိက် သွက်မၞိဟ် ၁၀၀၀ တၠနွံမံၚ်ရောၚ် အတိုၚ်တင်နၚ် ဂကောံသုတေသနတအ် ချူလဝ်ဂှ် ဂွံတီကေတ်ရ။
သတၚ် – သြင်လောန်တိုၚ်မ်
Photo – Social Media