မတ်မလီု၊ မေ ၃၀
စနူကဵုဂိတုဂျောန် ၁ ဏအ်တုဲ အခိၚ်ကွဳပၟတ်ဂြိပ် မတ်မလီု – လ္ဂုၚ် ကဵု လ္ဂုၚ် – မတ်မလီုတအ်ဂှ် ပြံၚ်လှာဲထောံအခိၚ်ရောၚ် နူကဵုသၞေဟ်ကွဳပၟတ် မတ်မလီု သၟဝ်တဲဌာနကွဳပၟတ်ဍုၚ်ဗမာ ကဵုသမ္တီလလောၚ်တြးလဝ်ရ။
တရဴအခိၚ်ကွဳပၟတ် လၟေၚ် ၈၂ စှ်ေ မတ်မလီု – လ္ဂုၚ် ကေုာံ တရဴကွဳပၟတ် လၟေၚ် ၈၁ တိုန် လ္ဂုၚ် – မတ်မလီု အခိၚ်တိတ်ဂှ် ပြံၚ်လှာဲထောံ အခိၚ်နူဂယး ၇ နာဍဳကဝက်ရောၚ်။
ကၠာတေံဂှ် အခိၚ်ကွဳပၟတ်တိတ် နူ မတ်မလီု – လ္ဂုၚ် ကေုာံ နူလ္ဂုၚ် – မတ်မလီုဂှ် စၟတ်လဝ် အခိၚ်နူဂယး ၈ နာဍဳကဝက်ကီုလေဝ် လၟုဟ်ဝွံ ကလေၚ်စၟတ်ဏာ သွက်ဂွံတိတ်ဟပြဟ်မွဲနာဍဳ မဒှ်ရ။
ပရေၚ်ပြံၚ်လှာဲလဝ် အခိၚ်ကွဳပၟတ်ဂြိပ်ဏအ်ဂှ် ရန်တၟအ်ကဵု သွက်ညးအာတရဴတအ် အခိၚ်ကွဳပၟတ်စိုပ် ညံၚ်ဂွံပြဟ်တိုန် ကေုာံ ကပေါတ်ဗၞိက်တအ် ဂွံစိုပ်ဂတာပ်အခိၚ်မာန်ရောၚ် သာ်ဝွံ ညးတာလျိုၚ်သၞေဟ်ကွဳပၟတ် မတ်မလီုမွဲတၠ ဟီုလဴကဵု ဌာန်ပရိုင်သြၚ်လောန်တိုၚ်မ်ရ။
ၜိုန်ရပြံၚ်လှာဲလဝ် အခိၚ်ကွဳပၟတ်ဂြိပ်ကီုလေဝ် စၟတ်တဲ ကဆံၚ်တန်လ္တူဂှ် ဒစးဒုၚ်လဝ်ကၠာ ၃ တ္ၚဲ၊ စၟတ်တဲ တန်ဓမ္မတာတအ်ဂှ် ဒစးဒုၚ်ရာန်လဝ်ကၠာ ၁ တ္ၚဲတုဲ နကဵုသၞောတ် ဒစးဒုၚ်ရာန်လဝ် ကၠာကီု ဇၟာပ်တ္ၚဲကၠုၚ်ရာန်ကေတ်မာန်ဒၟံၚ် တ္ၚဲကၟာတ်ဟွံမွဲရောၚ် ကဵုလဝ်သမ္တီကီုရ။
ပရိုၚ် – သြင်လောန်တိုၚ်မ်
Photo – MOI