ၜဳကလေၚ်၊ ဂျောန် ၁
ဂကောံဒပ်မၚ်ကွာန် အပ္ဍဲပွိုၚ်ဍုၚ်ၜဳကလေၚ်တံဂှ် နူကဵုဒပ်ပၞာန်ဗမာသီအဝဵု ဟိုတ်နူပလံၚ်ဏာမုက်ပၞာန်ဂှ်ရ ညးဂြိပ်တိတ်တံဂၠိုၚ်တိုန်ဒၟံၚ် ရောၚ် ညးဍုၚ်ကွာန်တံ ဟီုလဴရ။
စပ္တံနူဂိတုအေဗရာယ် လောန်ကၠုၚ်ဏံတုဲ ဒပ်ပၞာန်ဗမာ အဟိန်ထပက်လဝ်ကရောၚ်ပၞာန် ကု KNU မဟာဒပ် ၅ ကဵု မဟာဒပ် ၆ တံဂှ် ကော်ဏာဂကောံဒပ်မၚ်ကွာန်တံ မွဲကရောံကဵု ဒပ်သၟဝ်တဲၝောံဒပ် ၄၄ ဂှ်တုဲ ကြဴနူဂှ် ညးချိုတ်အာကီု ဒးဝပ်တံကီု နွံကၠုၚ်လဝ်ရောၚ် သ္ဂးရ။
ဟိုတ်နူပရိုၚ် နူဂကောံဒပ်မၚ်ကွာန် ကောန်ကွာန်မုတေၚ် ၂ တၠတံသၟးဟွံက နူကွာန်တၞဟ်ဟ်လေဝ် ချိုတ်အာ အပ္ဍဲပေါဲဗတိုက် နွံမံၚ်ဂှ်ရ ဂကောံဒပ်မၚ်ကွာန် သှ်ေဇးဒၟံၚ်အပ္ဍဲစးပၞာန်လ္ၚဵုတံ နုက်တိတ်အာဂှ်ကီု ဂြိပ်တိတ်အာတံ နွံကၠုၚ်မံၚ်ရောၚ် ရဲလ္တူဍုၚ် ၜဳကလေၚ်မွဲတၠ ဟီုလဴကဵု ဌာန်ပရိုင်သြၚ်လောန်တိုၚ်မ်ရ။
ကြဴနူပၞာန်သီအဝဵုတုဲ အခိၚ်စဒက်ပ္တန်လဝ် ဂကောံဒပ်မၚ်ကွာန်အလုံပွိုၚ်ဍုၚ်ဂှ် သွက်ပရေၚ်ဂီုကၠီုကွာန်ဟေၚ် ဒးစဵုဒၞာအာရတုဲ ဟွံဒးတိတ်မုက်ပၞာန်ပုဟ် ဂလာန်ညးတာလျိုၚ်ဒပ်ပၞာန်တံ ဟီုလဝ်နွံဂှ်ရ ညးကၠုၚ်လုပ်လဝ် ဒပ်မၚ်ကွာန် အပ္ဍဲပွိုၚ်ဍုၚ်ၜဳကလေၚ်တံ ဂၠိုၚ်မံၚ်ရ။
အကြာသၞာံ ၂၀၂၃ စဵုကဵု ၂၀၂၅ ဂကောံဒပ်မၚ်ကွာန် အပ္ဍဲပွိုၚ်ဍုၚ် ၜဳကလေၚ်တံ ဇြဟတ်ခိုဟ်တိုန်ကၠုၚ် လၟိဟ်ဇြဟ်မၞိဟ် ၂၀၀ ပြၚ် နွံကၠုၚ်ဂှ်ကီု ပံၚ်တောဲကုဒပ်ပၞာန်တုဲ ဗက်ရပ်ညးယိုက်ဝန်ပၞာန်ကီု၊ မင်ကင်ပရေၚ်ဂီုကၠီုဂၠံၚ် မွဲဒမြိပ်လတူဂၠံၚ် လ္ဂုၚ်-မတ်မလီု၊ ပံက်ဂိက် သၞေၚ်ကင်စၟဳစၟတ်တုဲ အာတ်သြန်တံဂှ် ကၠောန်ကၠုၚ်လဝ်ရ။
ကြဴနူဂိတုအေဗရာယ်တုဲ ရဲဂကောံဒပ်မၚ်ကွာန်တံဂှ် နူကဵုဒပ်ပၞာန်ဗမာ ပလံၚ်ဏာဒၞာဲမုက်ပၞာန် သ္ကာတ်မြဟ်ဂၠိုၚ်တေံဂှ်တုဲ ညးဂြိပ်တိတ်ထောံလေဝ် နွံမံၚ်ဗွဲမဂၠိုၚ်ရ။
ဟိုတ်နူညးဂြိပ်တိတ်တံဂၠိုၚ်တုဲ သွက်ဂွံထပက်စုတ်မၞိဟ်အဇာ ဒၞာဲဇြဟတ်မၞိဟ်အောန်စှ်ေအာလဝ်တံဂှ် အကြာကွာန်တံမ္ဂး ဂကောံဒပ်မၚ်ကွာန်တံ ဗက်ရပ်ကေတ်မံၚ် ရဲသုၚ်ဍာ်တၞး ၜါဲကဓံၚ်တံကီု၊ ရဲစကာသုၚ်စောဲ ဂဥုဲၜူမာဲ WY တံတုဲ ကဵုလုပ်ဂကောံ ဒပ်မၚ်ကွာန်ဂှ်ကီု ရဲဟွံမိက်လုပ်တံမ္ဂး နကဵုအမှုဂဥုဲၜူမာဲ ပအပ်ဏာ ဇရေၚ်ဒပ်ဗၠာဲသၟိၚ်တံ ကၠောန်ကၠုၚ်လဝ်ရောၚ် ဂွံတီကေတ်ရ။
ပရိုၚ် – သြင်လောန်တိုၚ်မ်