အဝ်တာဝါ၊ ဂိတုမေ ၂၉
သွက်ဇၟာပ်ရဲအာတရဴမွဲမွဲတၠ ကၠုၚ်နူဒေသအာဖရိက ဒၞာဲအန္တရာဲယဲဘဲ ဗါၚ်ရာတ်သ်အဳဗိုလာသၠုၚ်အိုတ်တံမ္ဂး အစဳဇန်လၟေၚ်ပရေၚ်အာတရဴ ညံၚ်ဂွံကိတ်ညဳကဵု ပရေၚ်ထတ်ယုက်ညးဍုၚ်ကွာန်တအ်ဂှ် နူအမေရိကာန်၊ မက္ကသဳကို ကေုာံ ကနေဒါတအ် လလောၚ်တြးဏာ ပ္ဍဲဂိတုမေ ၂၉ ရ။
နူကဵုဌာနပရေၚ်ကေၚ်ကာ ဂၠးကဝ်ကနေဒါ ပံၚ်တောဲပ္တိတ်လဝ် အပ္ဍဲလိက်လလောၚ်တြးဂှ်တှ်ေ သွက်ပေါဲဗဝ်ဂၠးကဝ်ဖဳဖာ သၞာံ ၂၀၂၆ ကၠုၚ်စိုပ်ဏအ် ရဲဍုၚ်သအာၚ်တံ၊ သၟာပရေၚ်ထတ်ယုက်တံ၊ ပူရိသာတ်တံ ကေုာံ ကၟုဲဂမၠိုၚ်တံ မၞုံကဵုလၟိဟ်ပြကောတိကိုတ်တအ်သၟးဟွံက ရန်တၟံလဝ် သွက်ဂွံပံၚ်ကောံစဵုဒၞာအာ ကောန်ဍုၚ်တအ်ရောၚ် ချူထ္ၜးလဝ်ရ။
ညးဍုၚ်အမေရိကာန်သၟဝ်ကျာ ၃ ဍုၚ်တအ်ဏံ သွက်ဂွံထိၚ်ဒဝ်အာ ပရေၚ်အာကၠုၚ် ကေုာံ ပရေၚ်မၞိဟ်ကောံ အကြာပ္ဍဲပယျဵုတအ်ဂှ် ဖျေံလဝ် အစဳအဇန်ဏအ်ရောၚ် ချူထ္ၜးလဝ်ရ။
“ဒုၚ်တၠုၚ်အာဂၠးကဝ် နူအမေရိကာန်သၟဝ်ကျာဏံမဒှ်တုဲ ပရေၚ်ထတ်ယုက် ကေုာံ ပရေၚ်ယဲဘဲဗၠးသ္အး ဇၟာပ်မၞိဟ်အပ္ဍဲဒေသဂှ် ဒှ်အရာကိစ္စဇၞော်အိုတ် ကဵုလဝ်ဖျုန် သွက်ပိုဲတအ်ရောၚ်” သာ်ဝွံ အပ္ဍဲလိက်လလောၚ်တြးပံၚ်ကောံ ၃ ဍုၚ်ဂှ် ချူထ္ၜးလဝ်ရ။
ပြဟ်ဟ်ဏံ အပ္ဍဲကဵုကၟိန်ဍုၚ်ပံၚ်ကောံ ဒဳမဝ်ကရိတ်တေတ်ကောန်ဂဝ်ဂှ် အကာဲအရာယဲအဳဗိုလာ ပြးဇးဒၟံၚ် ဗွဲမသကာတ်မြဟ်တုဲ ကောန်ကမၠောန်ပရေၚ်ထတ်ယုက်တအ်လေဝ် ဒးချိုတ်အာလဝ် နွံမံၚ်ကီုရ။
ပ္ဍဲဍုၚ်ဗဒါဲဇိုၚ်ဝုတ်ဒိုဟ် ယူဂန္ဓာ လေဝ် ကာလဆဵုလဝ် ညးကလိဂွံယဲတအ်ဂှ် ပယျဵုညးတအ်ကဵု ကောန်ဂဝ်ဂှ် ကၟာတ်ထောံလဝ်ယျ။
နူကနေဒါ ကၟာတ်လဝ်အခေါၚ်လုပ်ဍုၚ် သွက်ကောန်ဍုၚ်ကောန်ဂဝ်၊ ယူဂန္ဓာ၊ သူဒါန်သၠုၚ်ကျာတအ် ပွိုၚ် ၉၀ တ္ၚဲရ။
ပရေၚ်ကၟာတ်လဝ်ဏအ်ဂှ် စပ္တံလဝ်နူဂိတုမေ ၂၇ မဒှ်တုဲ ညးကၠုၚ်စိုပ်လဝ် နူဍုၚ်တေံမ္ဂး သွက်ဂွံမံၚ်ရံၚ်စၟဳစၟတ်ယဲ ဒးထိၚ်စွံလဝ် ပွိုၚ် ၂၁ တ္ၚဲကၠာ မဒှ်။
ပေါဲဗဝ်ဂၠးကဝ်ဖဳဖာဂှ် နူအမေရိကာန်၊ မက္ကသဳကို ကေုာံ ကနေဒါတအ် စပ္တံနူဂိတုဂျောန် ၁၁ တုဲ နဒဒှ်တၠသ္ၚိပံၚ်တောဲ ကၠောန်ဗဒှ်အာရောၚ်။
Ref:BERNAMA/XINHUA