သၚ်္ကာပူ၊ ဂိတုမေ ၃၁
အဳရာန် ဟွံကေတ်တင်တုပ်စိုတ်မ္ဂး မင်လဝ်ဂွန် သွက်ဂွံဒးကလေၚ်ဗတိုက်အာရောၚ် ဝန်ဇၞော်ပရေၚ်စဵုဒၞာအမေရိကာန် ကဵုလဝ်သတိရ။
ယဝ်ရဟွံကလိဂွံ ပရေၚ်တၚ်တုပ်စိုတ်မ္ဂး နူကဵုအမေရိကာန် သွက်ဂွံကလေၚ်စဗတိုက်အဳရာန်ဂှ် မင်လဝ်ဂွန်ရောၚ် သာ်ဝွံ ဝန်ဇၞော် ပဳဟက်သေအ်ခ် ကဵုလဝ်သတိ ပ္ဍဲဂိတုမေ ၃၀ ရ။
သွက်ဂွံသောၚ်ကလး ပရေၚ်လစွံစိုတ် ပါ်ဒကးမံၚ်တံ အဓိကဒှ်မံၚ်ပရေၚ်ဆေဝ်တာ သွက်ဂွံကလိဂွံ ပရေၚ်တၚ်တုပ်စိုတ်မာန် အခိၚ်သ္ကိုပ်ပရေၚ်ပ္ညဳပ္ညပ် နူဝါယှေန်တန် ကဵု တဳဟဳရာန်တံ ရေၚ်တၠုၚ်မံၚ်ဂှ် ဝန်ဇၞော် ပဳဟက်သေအ်ခ် ကဵုလဝ်သတိ သာ်ဏံရောၚ်။
“အစောန်စရာဲပိုဲတံဗတိုက်ဂှ် ယဝ်ရနွံပၟိက်မ္ဂး ပဵုၜက်မံၚ်သၞောတ်ကဵုဗ္ၜတ် ၜိုတ်ကၠောန်မာန်ဂှ်ဏီ” သာ်ဝွံ ဝန်ဇၞော် ပဳဟက်သေအ်ခ် ဟီုလဴလဝ် ပ္ဍဲသၚ်္ကာပူရ။
“ပရေၚ်ပကောံစွံလဝ် လွဟ်မကမ်ကပေါတ်ပၞာန် ပိုဲတံဂှ် သွက်ဂွံဗတိုက်ပ္ဍဲအဳရာန် ကေုာံ အလုံဂၠးကဝ်မွဲဂှ် ၜိုတ်တင်သမ္တီထေက်ဂှ် ဍေံၜက်မံၚ်နူကဵုသၞောတ်ဗ္ၜတ်ဏီတုဲ ပိုဲတံနွံမံၚ် အပ္ဍဲအကာဲအရာ ခိုဟ်တဴဗွဲမလောန်ရ” သာ်ဏံလေဝ် ညးထပ်ဟီုစုတ်လဝ် ကီုရ။
ပ္ဍဲသဘင်ကောံဓရီုသဳကၠဳ ယှာန်ဂရဳလာ မဒှ်သဘၚ်သဳကၠဳ ကလုတ်တမာန် ဝန်ဇၞော် ပရေၚ်စဵုဒၞာ အာယှတံ၊ ညးတာလျိုၚ်ဆေင်စပ်ကဵုပရေၚ်ပၞာန်တံဂှ် ၜိုန်ရအမေရိကာန် ဗတိုက်ဒၟံၚ်ကဵုအဳရာန်ကီုလေဝ် ကုမဟာမိတ်တံ မၞုံပ္ဍဲဒေသ အာယှ-ပသဳဖိတ်ဂှ် ထောအ်ကၠေံလဝ် ဟွံသေၚ်ပုဟ် ဝန်ဇၞော် ပဳဟက်သေအ်ခ် ဟီုရ။
သမ္မတ ဒဝ်နေဝ်ထရ အေၚ်ဒုၚ်ကၠုၚ်လဝ် ညံၚ်အဳရာန် ဟွံဂွံပိုၚ်ပြဳ လွဟ်နျူကလဳယာတုဲ ညံၚ်ဂွံကေတ်အာ ပရေၚ်တၚ်တုပ်စိုတ်ဇၞော်ဇၞော်မွဲဂကူ မိက်ဂွံကလိဂွံဒၟံၚ်ရောၚ် သာ်ဝွံ ညးဇၞော် ပေန်တဂန် ပဳဟက်သေအ်ခ် သ္ဂးရ။
စပ်ကဵုတင်ပ္တိုန်ထ္ၜး ပရေၚ်ပေါဲပၞာန်အဳရာန် ဂွံအိုတ်အးအာဂှ် သွက်ဂွံဖျေံသ္ဂုတ်သွာတ်ကၞောတ်အိုတ်ဂှ် ပ္ဍဲအခန်ဒမၠုက်သ္ၚိဗု (White House) ဂှ် သွက်ဂွံကၠောန်အာ ပေါဲကောံဓရီုနွံရောၚ် သမ္မတ ဒဝ်နေဝ်ထရ ဟီုလဝ်ရ။
ပရေၚ်ဒေါအ်ပန်ပှော် အခိၚ်စဂိတုအေဗရာဂှ် ဆက်ဇမၠိၚ်အာ အာယုက် ၆၀ တ္ၚဲတုဲ သွက်ပေါဲပၞာန် ညံၚ်ဂွံဒေါအ်အာလအိတ်မာန် ဂှ် သွက်သ္ကိုပ်ပရေၚ်ပ္ညဳပ္ညပ်တံ ဂွံကလိဂွံအခိၚ်ဂၠိုၚ်ၚ် ရန်တၟအ်တုဲ စဳဇန်ဇမၠိၚ်အာလဝ်ရောၚ် သ္ဂးရ။
ဟိုတ်နူပေါဲပၞာန် အမေရိကာန် ကဵု အေဿရေတံ စပ္တံလဝ် ပ္ဍဲဂိတုဖေဖဝ်ဝါရဳ ၂၈ ဂှ်တုဲ ပ္ဍဲအဳရာန် ကေုာံ လက်ဗနန် ဂှ် မၞိဟ်လ္ၚီပြၚ် ချိုတ်အာလဝတုဲ နူအဳရာန် ကၟာတ်ဆိုအ်လဝ် ပ္ၚံက်ၜဳ ဟဝ်မုဇ်ဂှ် ပရေၚ်ပိုန်ဒြပ်ဂၠးကဝ် ဒးဇီုကပိုက် ဗွဲမသကာတ်မြဟ် ဂိအာလဝ်ရ။
Ref:Reuters