ပလဝ်၊ မေ ၃၁
ဗ္ဒိုပ်ဒပ်ပၞာန်ဗမာကျံက်လုၚ်ဂျဳ မၞုံမံၚ်အပ္ဍဲပွိုၚ်ဍုၚ်ပလဝ် ရးတနၚ်သဳဂှ် ဒပ်ပံၚ်ကောံ KNLA တအ် လုပ်ဗတိုက်သီကေတ်လဝ်ရောၚ် ဂွံတီ နူကဵုဗော်သွးကောန်ဂကူကရေၚ် KNU ခရိုၚ်ဗိက်-ထဝါဲရ။
အပ္ဍဲဗ္ဒိုပ်ကျံက်လုၚ်ဂျဳဏံ ဇြဟတ်ဒပ်ပၞာန်ဗမာ ၈၀ ပြၚ်နွံမံၚ်ဂှ် စပ္တံနူဂိတုမေ ၁၉ လောန်ကၠုၚ်ဏအ်တုဲ ဒပ်ပၠန်ဂတး KNLA ပၠတရဴတအ် ကၠောန်ဗဒှ် ပေါဲဗတိုက်သီဗ္ဒိုပ်တုဲ ပ္ဍဲဂိတုမေ ၂၉ အခိၚ်သဝ်တ္ၚဲဂှ် သီဂွံဏာ အလုံဗ္ဒိုပ်မွဲရောၚ်။
အပ္ဍဲကဵု ပေါဲဗတိုက်သီလဝ်ဗ္ဒိုပ်ဏံဂှ် ကောန်ဒပ် ကဝ်မယှေန်ပၞာန် သီုဖအိုတ် ထောံလဝ်ဗ္ဒိုပ် ဂြိပ်တိတ်အာအိုတ်တုဲ လွဟ်မကမ်ကပေါတ်ပၞာန် ဗွဲမဂၠိုၚ်သီဂွံလဝ်ရောၚ် ညးတာလျိုၚ်လလောၚ်ပရိုၚ် KNU ခရိုၚ်ဗိက်-ထဝါဲ ဟီုလဴကဵု ဌာန်ပရိုင်သြၚ်လောန်တိုၚ်မ်ရ။
အပ္ဍဲပေါဲဗတိုက် သီဗ္ဒိုပ်ကျံက်လုၚ်ဂျဳဏံ လ္ပာ်ဒပ်ပံၚ်ကောံ ကောန်သ္ဂံၚ် KNLA ၂ တၠ ဒးအာဝပ်တုဲ ပရေၚ် လ္ပာ်ဒပ် ကဝ်မယှေန်ပၞာန်တအ် ဒးဝပ်ချိုတ်အာလဝ်ဂှ် စၟဳစၟတ်ဒၟံၚ်ဖိုဟ်ရောၚ် သ္ဂးရ။
အပ္ဍဲဒေသပရေၚ်အုပ်ဓုပ် KNU ခရိုၚ်ဗိက်-ထဝါဲမ္ဂး ဗ္ဒိုပ်ကျံက်လုၚ်ဂျဳ ဏံဂှ် ဒပ်ကဝ်မယှေန်ပၞာန်တအ် ဖျေံစွံကၠုၚ်လဝ်ဒပ် ပွိုၚ် ၂၀ သၞာံပြၚ် မဒှ်ရ။
ပေါဲဗတိုက်သီ ဗ္ဒိုပ်ကျံက်လုၚ်ဂျဳဂှ် ဒပ်ပၞာန်ဗၠးၜး ကောန်ဂကူကရေၚ် KNLA မဟာဒပ် (၄) ဗျူဟာ (၁)၊ ဒပ်စဵုဒၞာကောန်ဂကူကရေၚ် KNDO တမ်ဒပ် (၇) ကေုာံ ဒပ်ပံၚ်ကောံပၠန်ဂတး မဟာမိတ်တအ် ဗတိုက် သီကေတ်လဝ်ရောၚ်။
ပရိုၚ် – သြင်လောန်တိုၚ်မ်