မတ်မလီု၊ ဂိတုမေ ၃၁
ပရေၚ်စလာဘ်ဗဇဴ ကေတ်ပရၚ်တဲတံဂှ် ပလီုထောံ ဍာ်ဒကေဝ် သၞောတ်ဗ္ၜတ် ဓရ်အဂတိတံရောၚ် သ္ကိုပ်ဝန်ဇၞော်တွဵုရးမန် သမ္မတသီအဝဵု ခါန်ကၞက် ဥူအံၚ်ဝေန်တာန် ကဵုဏာသတိ ကုသၞာဲဒါ ဌာနဆေၚ်စပ်သၟဝ်တဲတံရ။
အပ္ဍဲဂိတုမေ ၂၉ လောန်ကၠုၚ်ဏံ ဂကောံအလဵုအသဳတွဵုရးမန် ကေုာံ ကမ္မယှေန်ဗတိုက်သအး အဂတိတံ ပံၚ်ကောံကၠောန်ဗဒှ်လဝ် ပေါဲသောၚ်ကလးကဵုပညာ စပ်ကဵုပရေၚ်ဗတိုက်သအး ဓရ်အဂတိ ဒၞာဲကဵုၝောံခန်တွဵုရး ဍုၚ်မတ်မလီုဂှ် ဟီုဂးလဝ်ရောၚ်။
တုဲပၠန် ညးကေတ်လာဘ်ဗဇဴ ပရၚ်တဲတံဂှ် လ္တူပရေၚ်ကမၠောန် ဇကုဒးကေတ်လဝ်တာလျိုၚ် ရေၚ်တၠုၚ်ကဵုဒၟံၚ်တံဂှ် ပရေၚ်ကေတ်လျိုၚ်၊ ဒုၚ်လျိုၚ် ကေုာံ ပရေၚ်သၞောတ်ဗ္ၜတ်ဓရ်အဂတိ ညံၚ်သ္ဂောံအိုတ်အးတံဂှ် သွက်ဂွံလီုလာ်အာသၟးဟွံက အတိုၚ်ပၟိက်စိုတ် ညးကဵုလာဘ်ဗဇဴပရၚ်တဲတံ မိက်ဂွံကဵုဒှ်ဂှ် ဒးဖျေံသ္ဂုတ်သွာတ် ကၠောန်အာရောၚ် သ္ဂးရ။
သၞာဲဒါယိုက်ဝန်ဌာနဆေၚ်စပ်တံဂှ် ဒှ်မၞိဟ်ယိုက်ဂၠေၚ်ဒၟံၚ် ကမၠောန်ပရေၚ်ကေၚ်ကာ ညးဍုၚ်ကွာန်တံတုဲ လာဘ်ဗဇဴ ပရၚ်တဲ ဟီုမ္ဂးဂှ် ဒှ်မံၚ်ဂျိမွဲမွဲဂကူရောၚ် သာ်ဝွံ သ္ကိုပ်ဝန်ဇၞော်တွဵုရးမန် သမ္မတ သီအဝဵုခါန်ကၞက်ဂှ် ဟီုဂးလဝ်ရောၚ်။
ပရေၚ်အဂတိတံ ဂွံနွံဒၟံၚ်ဂှ် ဟိုတ်နူရဲဌာနဆေၚ်စပ်တံ ဟွံရေၚ်တၠုၚ်ကဵု သွက်ညးဍုၚ်ကွာန်တံ ခိုဟ်ဟ်မိုဟ်ဟ်ဂှ်ကီု အပ္ဍဲဒၞာဲယိုက်ဂၠေၚ်ရေၚ်တၠုၚ်တံမ္ဂး ဒၞာဲကၠောန်လောဲလောဲတံဂှ် ညံၚ်ဂွံဝါတ်ကၠောန်မံၚ်ဂှ်ရ ပရေၚ်စလာပ် ကဵုကေတ်လာဘ်တံ ဂွံကၠေံအာဟီုမ္ဂးဂှ် ဗီုလဵုမှလေဝ် ဒှ်အာဟွံမာန်ပုဟ် ညးဒေသမွဲတၠ ဟီုလဴကဵု ဌာန်ပရိုင်သြၚ်လောန်တိုၚ်မ်ရ။
“ကမၠောန်ဌာနအလဵုအသဳတံ ယဝ်ရယိုက်ဂၠေၚ်ရေၚ်တၠုၚ်အာကဵုညးဍုၚ်ကွာန် ချိုတ်တ်ပၠိုတ်တ် ခိုဟ်ဟ်မိုဟ်ဟ်မ္ဂး အဂတိဏံ ဟွံဒှ်ကၠုၚ်ပုဟ်၊ ပရေၚ်အဂတိ ကတဵုဒှ်ကၠုၚ်ဂှ်လေဝ် လၟုဟ်လဝကတံမ္ဂး ကမၠောန်လောဲလောဲဂှ် ညံၚ်ဂွံဝါတ်ကၠောန်မံၚ်၊ ကၠောန်ညံၚ်ဂွံဝါတ်တုဲ ညံၚ်ဂွံဂွံသြန်ဂှ် ဂၠာဲစမံၚ်ဗီုပြၚ်ဂှ် ဒှ်ဒၟံၚ်တုဲ ပရေၚ်စလာပ် ကဵုလာဘ်ဂှ် ဂၠိုၚ်တိုန်ဂၠိုၚ်တိုန်ဒှ်အာရ၊ သွက်ပရေၚ်စလာပ် ကဵုလာဘ် ဂွံကၠေံအာဟီုဂှ် ဗီုလဵုလေဝ် ဒှ်ဟွံမာန်ပုဟ်၊ အတိုၚ်ဏံဟေၚ် ဆက်နွံအာမံၚ်ဏီဏောၚ် ပိုဲညာတ်” သာ်ဝွံ သ္ဂးရ။
တုဲပၠန် ရဲဌာနဆေၚ်စပ်ဗွဲမဂၠိုၚ်တံဂှ် အပ္ဍဲကဵုဒၞာဲယိုက်ဂၠေၚ်ရေၚ်တၠုၚ်ကဵု ညးဍုၚ်ကွာန်တံမ္ဂး ၜိုန်ရတင်နၚ်တံ ဍိုက်ပေၚ်ဒၟံၚ်ကီုလေဝ် အလဵုဇကုဍေံ အာတ်ကေတ်လာဘ်ဗဇဴ ပရၚ်တဲကဵု သြန်တံ နွံဂှ်ကီု ညးလ္ၚဵုတံဂှ် နူကဵုညးစအကြာတံမွဲကဆံၚ်ဂှ် အာတ်ကေတ်ဒၟံၚ်တုဲ ပရေၚ်အဂတိတံဆက်နွံအာမံၚ်ဏီရောၚ် ညးဆက်ဟီုရ။
မွဲလ္ပာ်ဂှ်ပၠန် သ္ကိုပ်ဝန်ဇၞော်တွဵုရးမန်ဂှ် ပရေၚ်အဂတိတံဏံ ပ္ဍဲကဏ္ဍနာနာ နကဵုဗီုပြၚ်နာနာကတဵုဒှ်ဒၟံၚ်တုဲ ဆၜိုတ်ပရေၚ်စလာပ် ကဵုလာဘ်မွဲဓဝ်ဟွံသေၚ် ပရေၚ်ဘပဠ အာတ်ထရတ်သြန် ကေုာံ ပရေၚ်လီဠာန်တံလေဝ် နွံမာန်ရောၚ် ညးသ္ဂးရ။
တုဲပၠန် သြန်ဘဏ္ဍာဍုၚ်ကဵုကပေါတ်တံဂှ် စကာဒၞာဲဗၠေတ်တ် စကာအဝဵု ပရေၚ်ကမၠောန် ဟွံသေၚ်ကဵုဒၞာဲ၊ ဒၞာဲထေက်ကဵု သုၚ်စောဲသြဇာဟွံသေၚ်ဂှ် သုၚ်စောဲအဝဵု၊ ကပေါတ်ညးဍုၚ်ကွာန်တံဂှ် သုၚ်စောဲညံၚ်ကပေါတ်ဇကု၊ ပရေၚ်ဗက်မုက်မတ် ကေုာံ ကၠောန်ပရေၚ်သအး သၠာဲသြန်ဗု ဗၠေတ်သၞောဝ်တံလေဝ် ဒှ်ပရေၚ်ဗက်စ အဂတိကီုရောၚ် ဟီုရ။
ပ္ဍဲတွဵုရးမန်မ္ဂး ပရေၚ်ဗက်စအဂတိဏံဂှ် အပ္ဍဲကဵုဌာနဆေၚ်စပ် သၟဝ်တဲအလဵုအသဳပၞာန်သၟးဟွံက ဂကောံဒပ်မၚ်ကွာန် (ညးဒေသတံကော် ပျူသဝ်ထဳ) ကေုာံ စပ္တံနူ သ္ကိုပ်ပရေၚ်အုပ်ဓုပ် အရာပ်/ကွာန်တံ ကၠောန်စဒၟံၚ်ကီုလေဝ် နတဲဇေတ်တ်ဂှ် ပရေၚ်ကေတ်အရေဝ် ဟွံမွဲပုဟ် သာ်ဝွံ ညးဒေသတံ ဟီုလဴလဝ်အိုတ်ရ။
ပရိုၚ် – သြင်လောန်တိုၚ်မ်