ဗေဂျေၚ်၊ ဂျောန် ၂
လ္တူညးဓလိုက်တမ်ရိုဟ်ကြုက်တံ၊ နဲကဲပညာ၊ တင်ဂၞၚ်ဒေတာ ကေုာံ ပရေၚ်ဂီုကၠီုဍုၚ်တံဂှ် သွက်ဂွံထိၚ်ကြာပ်အာ ဗွဲမတေၚ်ဂြတ်မာန် ပ္ဍဲဂိတုဂျောန် ၁ ဂှ် အလဵုအသဳကြုက် ပ္တိတ်လဝ်သၞောဝ်တၟိ ဗွဲမလှဲလးရ။
ကြဴနူဗေဂျေၚ် ကဵုစၞောန်ပ္ညုၚ် ဗဒေါအ်ထောံ အစဳဇန်ကုမ္ပဏဳ Meta သွက်ဂွံရာန်ကေတ် ကမၠောန် AI တၟိ Manus လောန်အာမွဲဂိတုတုဲ သၞောဝ်တံဏံ မံက်တိတ်ကၠုၚ် မဒှ်ရ။
သၞောဝ်တံဏံဂှ် နူကဵုကံၚ်သဳတွဵုရး ဟွံသေၚ်မ္ဂး ဂကောံအလဵုအသဳ ပ္တိတ်လဝ်တုဲ စပ္တံနူဂိတုဂျူလာၚ် ၁ မ္ဂး လမျီုလုပ်အာရောၚ်။
အပ္ဍဲၝောံပိုဒ် ပြာကတ်အိုတ်တံဂှ်မ္ဂး သွက်ဂွံပလံၚ်ပ္တိတ် ကပေါတ်ကြုက်၊ နဲကဲပညာ၊ ပရေၚ်ရေၚ်တၠုၚ် ဟွံသေၚ်မ္ဂး တင်ဂၞၚ်ဒေတာဆေၚ်စပ်တံ သွက်ဂွံပလံၚ်ဗစိုပ်မာန်မ္ဂး ၝောံပိုဒ် ဒးနွံကဵု အခေါၚ်ပလံၚ်ပ္တိတ် မဒှ်ရ။
ပ္ဍဲကဏ္ဍ AI ကေုာံ နဲကဲပညာကြုက် ညိဒုၚ်ဒစေၚ်ဗၠေၚ်ဟွံဂွံ ဒၞာဲဒးစွံသတိတံဂှ် သွက်ပရေၚ်ဓလိုက်တမ်ရိုဟ် ဂၠးကဝ်တံ ယဝ်ရ ဟွံဒေဂတ်ဗက်မ္ဂး အကာဲအရာဘဲနွံမာန်ဂှ် သၞောဝ်တၟိဏံ ထ္ၜးကဵုဒၟံၚ် ထေၚ်ၚ်လဵုလဵုရ။
ပရေၚ်တင်တုပ်စိုတ် Meta-Manus ဂှ် ဒှ်အရာစဵုစးဒၟံၚ် ကုသၞောဝ်စပ်ကဵု ပရေၚ်ဓလိုက် တမ်ရိုဟ်မ္ၚးဍုၚ်ရောၚ် သာ်ဝွံ ညးတာလျိုၚ်ကြုက်တံ ဟီုလဴလဝ်ကဵု နူအခိၚ်ကၠာတေံရောၚ်။
ဣဏံဂှ် ဟွံကလိဂွံလဝ်အခေါၚ် နူအလဵုအသဳကြုက်မ္ဂး သွက်ဂွံဆေဝ်တာအာ ကုမ္ပဏဳအပ္ဍဲဍုၚ်တံ ညံၚ်ဟွံဂွံသၠောဲပအပ်ကဵု သၟာဓလိုက်တမ်ရိုဟ်မ္ၚးဍုၚ်ရောၚ် သာ်ဝွံ ညးမလ္ၚတ်တံ ဟီုရ။
နဲကဲပညာ AI ဂှ် သွက်ပရေၚ်ဂီုကၠီုကောန်ဂကူ ကိစ္စဇၞော်သွက်ဗေဂျေၚ်ဒှ်မံၚ်တုဲ ဒှ်ဒၞာဲကဏ္ဍဒးစွံသတိရောၚ် ညာတ်လဝ်တုဲ ညံၚ်နဲကဲပညာ ကေုာံ အစောံစရာဲတံ ဟွံဂွံစိုပ်အာမ္ၚးဍုၚ်ဂှ် ဂစာန်ထိၚ်ချုက်ဒၟံၚ်ရ။
အတိုၚ်သၞောဝ်တၟိမ္ဂး သွက်ဂွံသၠောဲပြံၚ်ပလံၚ်ဗစိုပ် အစောံစရာဲ အရာကဏ္ဍမဒးစွံသတိတံ ၜက်ပယျဵုဂှ် ဒးအာတ်အခေါၚ်ရောၚ် မဒှ်ရ။
ကိုပ်ကၠာ Meta ဟွံဂွံရာန်ဏီ ကမၠောန် Manus တံ ပြံၚ်ဏာကောန်ကမၠောန် ကေုာံ ဗီုကၠောန်လဝ် ကမၠောန်ညးတံ ဒစးဒုၚ်ပလံၚ်လဝ် ဇရေၚ်သၚ်္ကာပူဂှ် ညံၚ်ဂွံဆေဝ်တာမာန်တုဲ ဗေဂျေၚ် ပ္တိတ်ထောံသၞောဝ်တၟိဏံ ဒှ်မာန်ရောၚ်။
အတိုၚ်သၞောဝ်တၟိမ္ဂး ကပေါတ်ဗၞိက်၊ နဲကဲပညာ၊ ပရေၚ်ရေၚ်တၠုၚ် ကေုာံ တင်ဂၞၚ်ဒေတာ ကၟာတ်လဝ်တံဂှ် သွက်ဂွံပလံၚ်ပ္တိတ်ဍုၚ်မ္ၚး မ္ဂး ၜက်ပယျဵုကြုက်တုဲ အခေါၚ်ပလံၚ်ဗစိုပ် ဟွံမွဲရပုဟ်။
Ref:Asahi