ကျိုက္ခမဳ၊ ဂျောန် ၂
အပ္ဍဲတွဵုရးမန် ပွိုၚ်ဍုၚ်ဇြပ်ဗု ဍုၚ်ကျိုက္ခမဳ သ္ကိုပ်ပရေၚ်အုပ်ဓုပ်အရာပ် သၟဝ်တဲ အလဵုအသဳပၞာန်သီအဝဵု ပန်စုတ်လဝ်သေနာတ် ညးဒေသ မွဲတၠ နွံမံၚ်ရောၚ် ညးဒေသတအ် ဟီုကဵု ဌာန်ပရိုင်သြၚ်လောန်တိုၚ်မ်ရ။
တုဲကၠုၚ်ဂိတုမေ ၂၃ ၜိုတ်အခိၚ်ဗ္တံ ၁၁ နာဍဳဂှ် သ္ကိုပ်ပရေၚ်အုပ်ဓုပ် မံၚ်အရာပ် ယာန်အံၚ်မျေ ဥူဇြဝ်ဝေန်ထောန်ကဵု ကိုဖျိုဝ်မေန်ခိုၚ် ကောန်အရာပ်မွဲစွံတံ ဒှ်ကယျာန်ထဝါတ်ညးသ္ကံတုဲ ပန်စုတ်ကဵု သေနာတ်ဂှ်ရ သမ္ဘာ ကိုဖျိုဝ်မေန်ခိုၚ် အာစိုပ်တေၚ်လဝ် အမှု ပ္ဍဲဇရေၚ်ဗ္ဒိုပ်ဗၠာဲသၟိၚ်ကျိုက္ခမဳ ပ္ဍဲဂိတုမေ ၃၀ ဂှ်ရောၚ်။
ဟိုတ်နူပရေၚ်ပန်လဝ်ကဵု သေနာတ်ဂှ်ရ မကမ်တေက်ဒးအာလဝ် ခဒအ်ဗြာတ် ကိုဖျိုဝ်မေန်ခိုၚ် လပါ်ပါဲ ၂ ဒၞာဲဒးဝပ်ဂှ်ကီု သီုဒၞာဲ ခဒအ်ဗြာတ် လပါ်ပါဲ မကမ်ဖံက်လုပ် ၁ ဒၞာဲ ဒးလဝ်ဝပ်နွံကီုလေဝ် အကာဲအရာဟွံဒးဂွိၚ် တိုန်စိုပ်လွဳမံၚ် အပ္ဍဲရုၚ်ဂဥုဲပွိုၚ်တိုက် ကျိုက္ခမဳရဂှ် အတိုၚ်သမ္ဘာ ကိုဖျိုဝ်မေန်ခိုၚ် မဖျိုဝ်ဖျိုဝ်သာန် တေၚ်လဝ် သ္ဂောံတီကေတ်ရ။
အပ္ဍဲပရေၚ်ဏံမ္ဂး ကိုဖျိုဝ်မေန်ခိုၚ်ဂှ်လေဝ် နူကဵုဒှ်ကယျာန်ထဝါတ် ညးသ္ကံကဵု သ္ကိုပ်ပရေၚ်အုပ်ဓုပ် အရာပ် ယာန်အံၚ်မျေ ဥူဇြဝ်ဝေန်ထောန်ဂှ် ကလေၚ်ဒုၚ်ဒစဵုဒစးလဝ် သီုကဵုမြနွံကီုတုဲ အပ္ဍဲဗ္ဒိုပ်ဗၠာဲသၟိၚ် ကျိုက္ခမဳဂှ်တှ်ေ သီုၜါလပါ် ညးမွဲကဵုမွဲ ဂတးဂတန် ကလေၚ်ပံက်အမှု တေၚ်လဝ်ညးသ္ကံရောၚ် သ္ဂောံတီကေတ်ရ။
ပြဟ်ဟ်ဏံ ဟိုတ်နူ သ္ကိုပ်ပရေၚ်အုပ်ဓုပ်အရာပ် ယာန်အံၚ်မျေ ဥူဇြဝ်ဝေန်ထောန် ပန်လဝ်ကဵုသေနာတ်ကု ကိုဖျိုဝ်မေန်ခိုၚ်ဂှ်ရ နူဗ္ဒိုပ်ဗၠာဲသၟိၚ်ကျိုက္ခမဳ ပံက်လဝ်အမှု (ပ) ၂၆/၂၀၂၆၊ ရာဇသာဒ်ဇၞော် ၝောံပိုဒ်-၃၂၄ တုဲ ရပ်ထိၚ်စၟဳစၟတ်လဝ်ရောၚ် သ္ဂောံတီကေတ်ရ။
တုဲပၠန် ကိုဖျိုဝ်မေန်ခိုၚ်ဂှ် ကလေၚ်ဒုၚ်ဒစဵုဒစးလဝ် သ္ကိုပ်ပရေၚ်အုပ်ဓုပ် အရာပ် ယာန်အံၚ်မျေ ဥူဇြဝ်ဝေန်ထောန် နကဵုမြဂှ်လေဝ် နူဗ္ဒိုပ်ဗၠာဲသၟိၚ်ကျိုက္ခမဳ ပံက်လဝ်အမှု (ပ) ၁၃/၂၀၂၆၊ ရာဇသာဒ်ဇၞော် ၝောံပိုဒ်-၃၂၆ ပလံၚ်ဏာရုၚ်သၞောဝ်ဓဝ်တုဲ စၟဳစၟတ်မံၚ် ရောၚ် သ္ဂောံတီကေတ်ရ။
ပရိုၚ် – သြင်လောန်တိုၚ်မ်
Photo – Social Media