မတ်မလီု၊ ဂျောန် ၂
အပ္ဍဲခရိုၚ်သဓီု ဗ္ဒိုပ်ဒပ်ပၞာန်ဖျေံသ္ဇိုၚ် အပ္ဍဲပွိုၚ်ဍုၚ်တအ်ဂှ် နူလပါ် ဒပ်ပၞာန်သီအဝဵု ပလေဝ်ပလေတ်စ ပရေၚ်ပၞာန်ဂၠိုၚ်ကၠုၚ်တုဲ အပ္ဍဲဒေသဂကောံပၠန်ဂတး ထိၚ်ချုက်လဝ်တအ်ဂှ် သုၚ်စောဲ ပရေၚ်ဗတိုက်ပၞာန်ကျာ ဂၠိုၚ်တိုန်ကၠုၚ်ရောၚ် ညးတာလျိုၚ်ဗျူဟာ ၂၇ ဟီုလဴကဵု ဌာန်ပရိုၚ်သြင်လောန်တိုၚ်မ် ရ။
စနူဂိတုအေဗရာ တုဲကၠုၚ်တေံ အပ္ဍဲကဵုဒၞာဲဗွိုၚ် ဗ္ဒိုပ်စးပၞာန် ကေုာံ ဗ္ဒိုပ်မုက်ပၞာန်တအ်မ္ဂး ဒပ်ပၞာန်ဗမာ ကၠောန်လဝ် ပရေၚ်စဵုဒၞာပၞာန်ဒုၚ် တအ် ပလေဝ်ပလေတ်ကၠုၚ် ချိုတ်တ်ပၠိုတ်တ်နွံမံၚ်ရောၚ် သ္ဂးရ။
အတိုင်တင်နၚ်ပရိုၚ် ဂွံလဝ်ဂှ်မ္ဂး ဒပ်ပၞာန်ဗမာတအ်ဂှ် ပလေဝ်ပလေတ်လဝ် ပရေၚ်စဵုဒၞာပၞန်ဒုၚ် ဂၠိုၚ်ကၠုၚ်တုဲ လတူ ပရေၚ်ဗတိုက်ဗလးတိဂှ် သုၚ်စောဲ ပရေၚ်ဗတိုက်ပၞာန်ကျာ ဂၠိုၚ်ကၠုၚ်မံၚ်ဂှ်ကီု၊ နူခမရ ၃ ၜဳကလေၚ် ပါရာမဝ်တာ တိုန်ကၠုၚ်တုဲ ဗက်ကြဳဗုမ် အကြာကွာန် နွံမံၚ်ကီုရောၚ် နူဗျူဟာ ၂၇ သ္ကိုပ်ဗျူဟာ ကိုဧမေန်ထောန် ဟီုလဴရ။
အပ္ဍဲတမ်ဒပ် ခမရ ၃ ဂှ် ပါရာမဝ်တာ ဟွံအောန်နူ ၃ မ နွံမာန်တုဲ ဒဵုကဵု ပွဳဗွိုၚ်ၜဳကလေၚ်၊ ကျာ်ထဝ်၊ သဓီုတအ်ဂှ် ဗက်ကြဳမံၚ်ဗုမ်ကီု၊ သုၚ်စောဲဒရုၚ်၊ ဂျက်ဖိုက်တာ၊ Y 12 တအ် ထံက်မၚ်ကင် ဗလးကျာ တုဲ ကြဳမံၚ်ဗုမ်နွံကီုရောၚ် သ္ဂးရ။
နူဗလးတိ ထပက်ကရောၚ်ပၞာန်တုဲ လုပ်ကၠုၚ်အပ္ဍဲဒၞာဲကွာန် ဂကောံပၠန်ဂတးထိၚ်ချုက်လဝ်တအ် ဟၟဲဏီကီုလေဝ် အကာဲအရာ သွက်ဂွံလုပ်ကၠုၚ်မာန် နွံမံၚ်တုဲ ပရေၚ်ထေက်ကဵု ဒးပလေဝ်စလဝ်တအ်ဂှ် ကၠောန်လဝ်တုဲဒှ်ယျ ဂွံတီကေတ်ရ။
မွဲလပါ်ပၠန်လေဝ် ဟိုတ်နူရပ်လဝ်သၟတ်တံ ဟၟဲကဵုပရေၚ်ဓဝ်ဍာံ ပကောံကေတ်လဝ်ကောန်ပၞာန်တအ်ဂှ် ဇြဟတ်ဂၠိုၚ်တိုန်ကၠုၚ် နူကဵုအခိၚ်ကၠာတေံတုဲ ဍိုက်စကာကဵု ဇြဟတ်ဂၠိုၚ်ၚ် ထပက်ကၠုၚ် ကရောၚ်ပၞာန်မာန်ရောၚ် သ္ဂးရ။
နူလပါ်ဒပ်ပၞာန် ပတေဟ်ကေတ်ဇြဟတ် နူဗလးကျာတုဲ ကြဳမံၚ်ဗုမ် လတူသ္ၚိဌာန် ညးဍုၚ်ကွာန်တံဂှ်ကီု၊ ဘာဗတောန်လိက် ကေုာံ စမြိုၚ်ပရေၚ်ဘာသာတံတုဲ ညးဍုၚ်ကွာန်ကီု သီုကဵုရဲပၠန်ဂတးတံ ဒးစွံသတိတုဲ ထေက်ကဵု ဒးအာကၠုၚ်ချဳဒရာၚ်ရောၚ် ဟီုရ။
ပ္ဍဲအကြာဂိတုအေဗရာကဵု ဂိတုမေ တုဲကၠုၚ်တေံ ပ္ဍဲပေါဲဗတိုက်သီဗ္ဒိုပ် လေကေ၊ ဝေၚ်တာပါန်ဂှ် ဒပ်ပၞာန်ဗမာ သုၚ်စောဲလဝ် ပါရာမဝ်တာ၊ Y12၊ ဂျက်ဖိုက်တာတုဲ ကြဳလဝ်ဗုမ်လၟိဟ်အလန် ဟွံအောန်နူကဵု ၅၀ ဝါ နွံမံၚ်ရောၚ် ဂွံတီကေတ်ရ။
ပရိုၚ် – သြင်လောန်တိုၚ်မ်
Photo – Social Media