ဘာအၚ်၊ ဂိတုဂျောန် ၂
အပ္ဍဲတွဵုရးကရေၚ် သွက်သ္ဂောံကလေၚ်ထိၚ်ချုက် ဂၠံၚ်ဖာပန်-ကမမံၚ် မာန်ဂှ်ကီု သွက်သ္ဂောံဗလံၚ်ဏာဒပ်အရီုဗၚ် ကုဗျူဟာပၞာန်ဖာပန်တုဲ ကရောၚ်ပၞာန်ဒပ်ပၞာန်ဗၟာ ထပက်ကရောၚ်ပၞာန် လုပ်ကၠုၚ်တအ်ဂှ် ဂကောံဇြဟတ်ပၠန်ဂတး KNLA မဟာဒပ် ၅ က္ဍိုက်ပ်တံ ဍိုက်ဗတိုက်မံၚ်ဂှ်ရ ပေါဲဗတိုက် ၜါလပါ် ဆက်သ္ကာတ်မြဟ်မံၚ်ရောၚ် သ္ဂောံတီကေတ် နူရိုဟ်ကၞက်ပရိုၚ်အပ္ဍဲဒေသတံရ။
အပ္ဍဲတွဵုရးကရေၚ် ဒၞာဲဒေသ KNU မဟာဒပ် ၅ ခရိုၚ်ဖာပန် ထိၚ်ချုက်လဝ် ဂၠံၚ်ဖာပန်-ကမမံၚ်ဂှ် တုဲကၠုၚ် ကၞောတ်ဂိတု အေဗရာကဵု ဂိတုမေ စမံက်တေံ နူကဝ်မယှေန်ပၞာန်ကဵု ဒပ်မၚ်ပယျဵု ကရေၚ် BGF တအ် ဇြဟတ်မၞိဟ် ၂ လ္ၚီပြၚ် ထပက်ကရောၚ်ပၞာန် ချဳဒရာၚ်ကၠုၚ်ပရေၚ်ပၞာန်တုဲ ပေါဲဗတိုက် သ္ကာတ်ကၠုၚ်လဝ်ရ။
နူကွာန်ဝါဒူ ဂၠံၚ်ဖာပန်-ကမမံၚ်ဂှ်မွဲအဆံၚ် ဒပ်ပၞာန်ဗၟာကဵု ဒပ်ပံၚ်တောဲ BGF တအ် ပါ်ကရောၚ်ပၞာန်နာနာသာ်တုဲ ထပက်ကရောၚ်ပၞာန် ချဳဒရာၚ်ကၠုၚ်ပရေၚ်ပၞာန်ဂှ်ရ ပေါဲဗတိုက်ဒှ်လဝ်ကဵု ဂကောံဇြဟတ် ပၠန်ဂတး KNLA မဟာဒပ် ၅ က္ဍိုက်ပ်တံ ဇၟာပ်ပ်တ္ၚဲ နွံမံၚ်ရောၚ်။
ကရောၚ်ပၞာန်ဒပ်ပံၚ်တောဲ ကဝ်မယှေန်ပၞာန် ကေုာံ BGF တိုန်ကၠုၚ် နူဍုၚ်ကမမံၚ် တံဂှ် ကၠာဟွံစိုပ်ဒေသကတိုင်တိဂှ် စိုပ်မံၚ်လပါ် လ္တူကွာန် မဝ်လိုကလိုဝ်တုဲ ဟိုတ်နူ KNLA မဟာဒပ် ၅ ကေုာံ ဂကောံဇြဟတ်ပၠန်ဂတးတအ် ကၟာတ်ဆိုအ်ဗတိုက်လဝ်တုဲ နူကဝ်မယှေန်ပၞာန် ချိုတ်ကီု ဒးဝပ်ဘဲဒဏ်ကီု ဂၠိုၚ်မံၚ်ရောၚ် အတိုၚ်ရဲဒေသတအ် ဟီုလဴနင် သ္ဂောံတီကေတ်ရ။
နူလပါ်ဒပ်ပၞာန်ဗၟာ ကၠုၚ်ဗလံၚ်မံၚ် ရဲဒးလဝ်ဝပ်တံဂှ် ဂွံဆဵုညာတ်မံၚ်တုဲ ဟိုတ်နူပေါဲဗတိုက် ဒှ်မံၚ်ဇၟာပ်ပ်တ္ၚဲဂှ်တှ်ေ နူ BGF တအ် ဒးဗက်ဗလံၚ်ကဵုမံၚ် ဒပ်ပၞာန်ဗၟာရောၚ် ညးဒေသမွဲတၠ ဟီုလဴကဵု ဌာန်ပရိုၚ်သြင်လောန်တိုၚ်မ် ရ။
ဒပ်အလဵုအသဳပၞာန်သီအဝဵုတအ် ပ္ဍဲဍုၚ်ကမမံၚ်ဂှ် အကြာတ္ၚဲတဏံ ထပ်ဗပေၚ်မံၚ်ဇြဟတ်တုဲ ဇြဟတ်ပၞာန်ဗပေၚ်လဝ်တံဂှ် သွက်သ္ဂောံဗလံၚ်ဏာ အတိုၚ်ဂၠံၚ် ဖာပန်-ကမမံၚ်နွံရောၚ် သ္ဂောံတီကေတ်ရ။
ဒပ်ပၞာန်ဗၟာ သွက်သ္ဂောံသဳကၠဳ ပရေၚ်ၜိုဟ်လလမ်ဂးတုဲ မွဲလပါ်ဂှ်မ္ဂး ၜိုန်ရ ကော်ဘိက်မံၚ် ဗော်သွးကောန်ဂကူကရေၚ် KNU ကဵု ဂကောံဇြဟတ်ပၠန်ဂတးတအ်ကီုလေဝ် မွဲအခိၚ်ဓဝ်ဂှ် နကဵုဇြဟတ်ပၞာန် ဗွဲမဂၠိုၚ် ထပက်ကရောၚ်ပၞာန် ဗတိုက်မံၚ် အပ္ဍဲဒေသ KNU ထိၚ်ချုက်လဝ်ဂှ်ရောၚ်။
နူကဵု ဒေသမဟာဒပ် ၅ ခရိုၚ်ဖာပန်ထိၚ်ချုက်လဝ် ဂၠံၚ်ဖာပန်-ကမမံၚ် ကေုာံ ဒေသမဟာဒပ် ၆ ထိၚ်ချုက်လဝ် ခရိုၚ်ဗြဝတဳ ဒေသ မေန်လက်ပါန်၊ ဖလူတံဂှ် ဒပ်ပၞာန်ဗၟာ ကေတ်အရီုဗၚ် နူၜၚ်ကျာပၞာန် ပန်ပလံၚ်မံၚ်ကဵုလွဟ်ဇၞော်၊ ဒရုၚ်တံကီု ကောန်ပၞာန်တၟိ စှ်ေကၠုၚ် နူဘာတန်ဗတောန် ယိုက်ဝန်ပၞာန်တံဂှ် ပလံၚ်ဏာမုက်ပၞာန်တုဲ ကဵုဗတိုက်မံၚ်ရောၚ်။
ပရိုၚ် – သြင်လောန်တိုၚ်မ်
Photo – Social Media