မေအ်ဇ်၊ ဂိတုဂျောန် ၃
က္ဍိုပ်သ္ကိုပ်ကိုဝ်ရဳယာသၟဝ်ကျာ ကေန်ဂျုၚ်အာန်ဝွံ ဒှ်ပူဂဵုမၞိဟ်တၠအဝဵုမွဲ ဟွံသေၚ်ပုဟ် သမ္မတဗဳလာရုဇ် အလက်သာန်ဒါ လူကာယှာန်ကို ဟီုလဴကဵု ညးတာလျိုၚ်ရတ်ယှာမွဲတၠ ပ္ဍဲဂိတုဂျောန် ၁ ရ။
ပ္ဍဲအစသၞာံဏအ် ကြဴနူအာလဝ်တရဴနိဂီုဍုၚ် စိုပ်ပျုၚ်ယာန်တုဲ သမ္မတလူကာယှာန်ကိုဂှ် အကြာညးကဵု ကေန်ဂျုၚ်အာန်တံ ပရေၚ်ဆက်ဆောံခိုဟ်မံၚ်အိုတ်စောန်ရေၚ် ကြဴဇာ ဟီုလဝ်ရ။
ဂကောံညးစၞးကိုဝ်ရဳယာသၟဝ်ကျာ သွက်သ္ဂောံသဳကၠဳပရေၚ်ပံၚ်တောဲပရေၚ်စၞစဇွောံမ ကေုာံ ပွမစဵုဒၞာမင်မွဲပရေၚ်ထတ်ယုက်တအ်ဂှ် အာလဝ်ဍုၚ်ဗဳလာရုဇ်တုဲ ကြဴနူဂှ် လူကာယှာန်ကို ဟီုပတိတ်ကၠုၚ်သာ်ဏံရေၚ်။
ဍာံဍာံဇေတ်တ်မ္ဂး က္ဍိုပ်သ္ကိုပ်ကိုဝ်ရဳယာသၟဝ်ကျာဂှ် ဒှ်မၞိဟ်တၠအဝဵု ဟွံသေၚ်၊ ဒှ်သၟတ်မနွံကဵုညာဏ်ပညာမွဲရောၚ် လူကာယှာန်ကို ဟီုရ။
ပ္ဍဲအရာဆဵုဂဗလဝ်ကဵု သ္ကိုပ်အုပ်ဓုပ်ဒေသ Primorsky Krai ဍုၚ်ရတ်ယှာ အိုလက် ခိုဇမ်ယာကို ဂှ် ဒေသမဆက်စပ်မံၚ်ကဵုပယျဵု ကိုဝ်ရဳယာသၟဝ်ကျာဂှ် ညံၚ်ဂွံဒှ်အာ ဒေသဗလံၚ်ဗၞိက် အကြာဘဳလာရုသ်ကဵု ကိုဝ်ရဳယာသၟဝ်ကျာဂှ် ကၠောန်ကဵုမာန်ရောၚ် သမ္မတဗဳလာရုဇ် ဟီုရ။
ကြဴနူရတ်ယှာ ၜက်ၜေတ်လုပ်ဗတိုက်ယူခရုၚ်ပေၚ်ၚ်တုဲ ဂကောံမဟာမိတ်ဍုၚ်တၠအဝဵုတအ် ပရေၚ်ပံၚ်တောဲဂၠိုၚ်ကၠုၚ်ဂှ် ပဵုတုဲဆဵုညာတ်ကေတ်မာန်ရ။
အကြာ ကြုက်၊ ရတ်ယှာ၊ ဗဳလာရုဇ်၊ ကိုဝ်ရဳယာသၟဝ်ကျာ ကေုာံ အဳရာန်တအ် ဇြဟတ်ပရေၚ်ပံၚ်တောဲကၠောန်ၜိုတ် ခိုဟ်ကၠုၚ်မံၚ်ဂှ် ဆဵုကေတ်မာန်ရ။
အပ္ဍဲပရေၚ်ဗတိုက်ယူခရုၚ်ဂှ် သွက်သ္ဂောံရီုဗၚ်အာ ရတ်ယှာတုဲ နူကိုဝ်ရဳယာသၟဝ်ကျာလေဝ် ပလံၚ်ဗ္စိုပ်ကဵု ကမ်သၠောဝ်တအ်ကီု ဗလံၚ်ဏာကောန်ပၞာန်လၟိဟ်လ္ၚီပြၚ်တုဲ ကဵုလဝ်ရီုဗၚ်ကီုရ။
နူအဳရာန်လေဝ် ပလံၚ်ဗ္စိုပ်ကဵုမံၚ် သွက်ရတ်ယှာ ကမ်သၠောဝ် ကေုာံ ဒရုၚ်တအ်တုဲ နကဵုပရေၚ်ပိုန်ဒြပ်လေဝ် ဂတးဂတန် ပရေၚ်ရီုဗၚ်ညးသ္ကံ နွံမံၚ်ရ။
ပ္ဍဲဂၠးကဝ် အခိၚ်လၟုဟ်ပြဟ်ဟ်ဏံမ္ဂး သွက်ဂွံဒစဵုဒစးအာ ဂကောံဍုၚ်ပလိုတ် နွံပၟိက်ဒဳမဝ်ကရေဇြဳတံတုဲ ညံၚ်သ္ဂောံတန်တဴအာဂှ် ဍုၚ်တၠအဝဵုတံဍေံကဵုဍေံ ကောံကၠုၚ်ဒက်ပတန်လဝ်ဂကောံ ညံၚ်ရဴဂကောံပၞာန်တအ်ရောၚ် ညးလ္ၚတ်တအ် ဟီုရ။
Ref:NKNews