လံၚ်လုၚ်၊ ဂျောန် ၃
အပ္ဍဲကဵုရးတနၚ်သဳ လ္တူဍုၚ်လံၚ်လုၚ် ဂကောံဒပ်ပံၚ်တောဲ မဟာမိတ်ပၠန်ဂတးတအ် လုပ်ဗတိုက်ဏာ ဗ္ဒိုပ်ဒပ်ကဝ်မယှေန်ပၞာန်တအ်နွံရောၚ် နူရဲဍုၚ်တံကဵု ရိုဟ်ကၞက်ပရိုၚ်ပၞာန်တံ ဟီုကဵု ဌာန်ပရိုၚ်သြင်လောန်တိုၚ်မ် ရ။
အပ္ဍဲဂိတုဂျောန် ၁ ၜိုတ်အခိၚ်နူဂယး ၉ နာဍဳဂှ် ဂကောံဒပ်ပၠန်ဂတးတအ် လုပ်ဗတိုက်လဝ် ဒၞာဲဒပ်ကဝ်မယှေန်ပၞာန် ဖျေံလဝ်သ္ဇိုၚ် အပ္ဍဲဗ္ဒိုပ်ဒပ်ဗၠာဲသၟိၚ်ကဵု ရုၚ်လဝက လ္တူဍုၚ်လံၚ်လုၚ်ဂှ်ရောၚ်။ ပေါဲဗတိုက်အကြာၜါလပါ် ဒှ်အာၜိုတ်အခိၚ် ၂ နာဍဳပြၚ်ၚ်နွံတုဲ အကာဲအရာဒးဝပ်ချိုတ်တံဂှ် ဟွံဂွံတီလဝ် ဗွဲတြးဏီရ။
သၟဝ်ကျာပွိုၚ်ဍုၚ်လံၚ်လုၚ် လပါ်ကွာန် ဗွဲမဂၠိုၚ်တံဂှ် ဟိုတ်နူဒပ်ကဝ်မယှေန်ပၞာန် ထပက်မံၚ်ကရောၚ်ပၞာန်နွံတုဲ ဂကောံဒပ်ပၠန်ဂတးတံလေဝ် ဖန်ဇန်ပေါဲဗတိုက် လပါ်လ္တူဍုၚ်ကီုရောၚ် တမ်ရိုဟ်ပရိုၚ်ပၞာန်မွဲတၠ ဟီုရ။
ဟိုတ်နူပေါဲဗတိုက် လ္တူဍုၚ်လံၚ်လုၚ်ဒှ်မံၚ်တုဲ ညးဒေသဗွဲမဂၠိုၚ် ဒးထောံဌာန်ဒၞာဲဝါဲ ဂြိပ်ပါဲဒဴအောပ်မံၚ် ဒၞာဲဂီုကၠီုနွံတံရ။
ကရောၚ်ပၞာန်ဒပ်ကဝ်မယှေန် ဇြဟတ်မၞိဟ်ကၠံပြၚ်တံဂှ် စနူဂိတုမေ ၂၂ တေံတုဲ လပါ်ကွာန်သၟဝ်ကျာလံၚ်လုၚ် ကွာန်သေတ်ပျေဝ်၊ ညှေန်မဝ်၊ ဂံက်အေၚ်၊ ကျက်ယက်တွောန်၊ တပျေယှံၚ် ကေုာံ ဂဒက်ဂျဳတအ်ဂှ် လုပ်မွဲကွာန်တုဲမွဲကွာန် ထပက်မံၚ်ကရောၚ်ပၞာန် မဒှ်ရ။
ဒပ်ကဝ်မယှေန်ပၞာန် ထပက်ကရောၚ်ပၞာန် လုပ်စံၚ်ပလီုထောံသ္ၚိ ကွာန်ဂဒက်ဂျဳ ၆ မနွံရောၚ်ဂှ် အတိုၚ်ရဲဒေသတံဟီုဂှ် သ္ဂောံတီကေတ်ရ။
ဟိုတ်နူ ပရေၚ်ထပက်ကရောၚ်ပၞာန် ဒပ်ကဝ်မယှေန်တံဂှ်ရ ညးဍုၚ်ကွာန် နူကွာန် ၁၀ ကွာန်ပြၚ် လၟိဟ်မၞိဟ်မွဲလက်ပြၚ်ၚ်တံ ထောံဌာန်ဇာတိကွာန်တုဲ ဒၞာဲဗၠးဘဲမာန်ဂှ် ဒးဂြိပ်ပါဲဒဴမံၚ်အိုတ်ရ။
ပရိုၚ် – သြင်လောန်တိုၚ်မ်
Photo – Social Media