ဗြဝတဳ၊ ဂျောန် ၃
အပ္ဍဲတွဵုရးကရေၚ် လပါ်သ္ကုတ်သၠုၚ်ကျာ ပွိုၚ်ဍုၚ်ဗြဝတဳဂှ် ဟိုတ်နူပေါဲဗတိုက်ဒှ်မံၚ်တုဲ ကောန်င္ၚာ်ကီု ညးဇၞော်ကီု သီုရဲပါဲဘဲပၞာန် ဗွဲမဂၠိုၚ်တအ် ဒှ်မံၚ်ယဲခၞော်စော်ဂှ်ရ နွံမံၚ်ပၟိက်ကဵု ဍာ်သ္အးဇ္ၚးတံ ဗွဲမပြဟ်ရောၚ် နူဇာဖိုၚ်သၟတ် လေဝ်ကေကဝ် လလောၚ်တြးလဝ်ရ။
ဟိုတ်နူအခက်အခုဲ ပၟိက်ကိစ္စကာမံက်တိုန် နူရဲပါဲဘဲပၞာန်တအ်ပတိုန်ထ္ၜးကၠုၚ်ဂှ်ရ ဆဝ်မ္ၚုဟ်အာတ်ဏာအရီုဗၚ် ကုညးဍုၚ်ကွာန်တအ်ရောၚ် နူဇာဖိုၚ်သၟတ်လေဝ်ကေကဝ် သ္ဂးလဝ်ရ။
အခိၚ်လၟုဟ်ဏံ ဍာ်ကြုၚ်သြၚ်ရေၚ် ကၠိခန်ကၠုၚ်တုဲ ရဲပါဲဘဲပၞာန် နွံဇိုၚ်ကြုၚ်တအ်ဂှ်တှ်ေ သုၚ်စောဲဍာ်ဟွံပြေပြံၚ်ကီု ဟိုတ်နူဍာ်ဟွံသ္အးဇ္ၚးတုဲ ကောန်င္ၚာ်ကဵု ညးဇၞော်ဗွဲမဂၠိုၚ်တအ် စဒှ်ကၠုၚ် ယဲခၞော်စော်တအ်ယျရောၚ် ပ္ဍဲကဵုလိက်လလောၚ်တြး ချူထမံက်လဝ်ရ။
သွက်ရဲပါဲဘဲပၞာန်တအ် ညံၚ်သ္ဂောံဂွံ ဍာ်သ္အးသ္အးဇ္ၚးဇ္ၚးမ္ဂး ပြဟ်ဟ်ဏံ နွံမံၚ်ပၟိက်ပရေၚ်အရီုဗၚ် စက်သ္အးဍာ် ပရေၚ်အထက်ပၚ်ကာမံက်တိုန်ရောၚ် နူဇာဖိုၚ်သၟတ်လေဝ်ကေကဝ် သ္ဂးလဝ်ရ။
ဟိုတ်နူဍာ် ပရေၚ်သ္အးဇ္ၚးဟွံမွဲတုဲ သွက်ဍာ်သုၚ်၊ ဍာ်သုၚ်စောဲကေုာံ ဍာ်တောမ်ပုၚ်တအ်ဂှ်လေဝ် ဒှ်မံၚ်အခက်အခုဲဍာ်ကွေံကွေံရောၚ် နူဇာဖိုၚ်သၟတ် လေဝ်ကေကဝ် နဝ်ဂျက် ဟီုလဴကဵု ဌာန်ပရိုၚ်သြင်လောန်တိုၚ်မ် ရ။
တုဲပၠန် စိုပ်အခိၚ်လၟုဟ်မ္ဂး ဒှ်မံၚ်အခိၚ် ကလေၚ်ပံက်ဘာဗတောန်လိက်ကီုလေဝ် ကောန်င္ၚာ် ရဲပါဲဘဲပၞာန် ၃၀ ပြၚ်တအ်ဂှ် ကပေါတ်ကရိယာ ကွးဘာတံသုၚ်စောဲ ဟွံဍာ်ပေၚ်ဏီတုဲ အခေါၚ်ဗတောန်လိက်တံ ညံၚ်ဟွံဂွံဆောံလေၚ်အာမ္ဂး နွံမံၚ်ပၟိက်ကဵု ထိုၚ်၊ ကၞေဟ်၊ ဗဝ်ပေၚ်န်၊ က္ဍိုၚ်၊ ကထုပ်တံကီုရောၚ် ညးဆက်ဟီုရ။
သွက်ပရေၚ်အနာဂတ်ပညာ ကောန်င္ၚာ်တံကီု သွက်ပရေၚ်ထတ်ယုက် ရဲပါဲဘဲပၞာန်တံကီုဂှ် နကဵုသၞောတ်ဗ္ၜတ်ဇကုတံ ၜိုတ်သ္ပမာန် နကဵုပရေၚ်အရီုဗၚ်ကပေါတ်တံဒှ်ဒှ် ညံၚ်ဂွံဘိုၚ်ပံၚ်တောဲရီုဗၚ်ကဵုအာညိဂှ် နူဇာဖိုၚ်သၟတ်လေဝ်ကေကဝ် အာတ်မိက်လဝ်ရ။
လပါ်သၠုၚ်ကျာ ဍုၚ်ဗြဝတဳ ဒေသဖလူ၊ မေန်လက်ပါန် ကေုာံ ဒေသ ဝဝ်လေတအ်ဂှ် အကြာဒပ်ကဝ်မယှေန်ပၞာန် ကဵု ဂကောံဇြဟတ်ပၠန် ဂတးတအ် ပေါဲဗတိုက်ဆက်ကြံၚ်မ္ၚိုဟ်မံၚ်ဖိုဟ်တုဲ ဟိုတ်နူ ပေါဲဗတိုက်တံဂှ် ညးဍုၚ်ကွာန် ရဲပါဲဘဲပၞာန်တအ်ဂှ် စဵုကဵုအခိၚ်လၟုဟ် ကလေၚ်စိုပ်သ္ၚိဌာန် ကွာန်ဇာတိညးတံ ဟွံမာန်ဏီပုဟ်။
ပရိုၚ် – သြင်လောန်တိုၚ်မ်
Photo – လေးကေကော်လူငယ်ကွန်ရက်