ၜၚ်ကံက်၊ ဂျောန် ၄
အတိုင်ဧကရာဇ် ကဵုအခေါၚ်ဗၠးဒုဟ်ဒဏ် သ္ကိုပ်ဝန်ဇၞော်တြေံဍုၚ်သေံ တက်သေန် ယှေန်နာဝပ်ထရာဝွံ နူကဵုဒုဟ်ထံၚ် သှ်ေမံၚ်တံဂှ် ဂွံအခေါၚ်ဗၠးရောၚ် ဂိတုဂျောန် ၃ ဂှ် ဝန်ဇၞော်ပရေၚ်သၞောဝ်ဓဝ်ဍုၚ်သေံ ဟီုကဵုအစာလိက်ပရိုၚ်တံရ။
ဒုဟ်လဝ်ထံၚ် ၈ ဂိတုတုဲအာတုဲ ကြဴနူဂွံဗၠးကၠုၚ်နကဵုဒုၚ်လျိုၚ် ဂိတုတုဲကၠုၚ်ဂှ် လတူဒုဟ်ထံၚ် ၁ သၞာံ ဖျေံလဝ် လ္တူတက်သေန်ဂှ် သှ်ေမံၚ်ဆ ၃ ဂိတုရ။ ဒုဟ်ဒဏ်ဂှ်လေဝ် ဂိတုသေပ်တေမ်ဗါဂှ်တှ်ေ အာယုက်အိုတ်အာရောၚ်။
ဂိတုဂျောန် ၃ တ္ၚဲသ္ပသမ္တီတ္ၚဲဒှ်မၞိဟ် ဂၞကျာ် သူဒဳတာဂှ် ဧကရာဇ် မဟာ ဗာဂျဳရာလံၚ်ကောန် ရုဲစှ်ကောန်ထံၚ်တံတုဲ ကဵုလဝ်အခေါၚ်ဗၠးဒုဟ်ဒဏ်ရောၚ် ပ္ဍဲလိက်ပရိုၚ်လလောၚ်ပၟိၚ် ဗွိုၚ်နန်ထဝ်ဂှ် ဗွဲမလုပ်သၞောဝ်ချူပတိတ်လဝ် ပ္ဍဲသဝ်တ္ၚဲဂျောန် ၂ ဂှ်ရောၚ်။
အကြာညး ဂွံအခေါၚ်ဗၠးဒုဟ်ဒဏ်တံဏံဂှ် တက်သေန် ပါလုပ်မံၚ်ကီုဟာ သာ်ဝွံ ကာလသၟာန်ဏာဂှ် ညးပါမံၚ်ကီုရောၚ် ဝန်ဇၞော်ပရေၚ်သၞောဝ်ဓဝ် ရူသာပွန် နာအိုဝါရတ် ဟီုကဵု အစာပရိုၚ်တံရ။
ဆဂး ကၠာဟွံဗလးပတိတ်ဏာပေၚ်ၚ်ဏီမ္ဂး ကမၠောန်လၟေၚ်နဲကဲရုၚ်အလဵုအသဳတံ သှ်ေမံၚ်ညိညနွံတုဲ ကြဴနူကမၠောန်တုဲဒှ်မ္ဂး ကပေါတ်ကရိယာအဳလက်ထရဝ်နေတ်မၚ်ရံၚ် ဗာန်လဝ်ဇိုၚ်ညးဂှ် ဒးပတိတ်ကဵုရရောၚ် ဝန်ဇၞော် ရူသာပွန် ဟီုရ။
လတူတၚ်သ္ဂုတ်သွာတ်ဏံဂှ် နကဵုအလဵုဇကု သ္ပဒတန်ဟွံမာန်ဏီပုဟ် သၟာဥပဒေ တက်သေန် ဝင်ယက် ချာမွန်ထရဳ ကလေၚ်ဟီုလဝ်ရ။
အာယုက် ၇၆ သၞာံ သေဌဳဇၞော်တၠပရေၚ်ပိုန်ဒြပ်ဗဳလဳယာန်ဏံ ကြဴနူ ဂြိပ်ပါဲအောပ်မံၚ် ပ္ဍဲဍုၚ်သအာၚ်ပွိုၚ် ၁၅ သၞာံတုဲ ပ္ဍဲဂိတုအဝ်ဂတ် သၞာံ ၂၀၂၃ တေံဂှ် ကလေၚ်စိုပ်ကၠုၚ်ဍုၚ်သေံရ။
ညးဝွံ ပ္ဍဲအကြာသၞာံ ၂၀၀၁ စဵုကဵု ၂၀၀၆ ကာလယိုက်ဂၠေၚ်လဝ် တာလျိုၚ်သ္ကိုပ်ဝန်ဇၞော်တေံဂှ် ဟိုတ်နူပဋိပက္ခဂုဏ်ဖဵုပရေၚ်ပိုန်ဒြပ်တံ၊ စကာသုၚ်စောဲအဝဵု ဒၞာဲဗၠေတ်တံတုဲ ဒးဒုၚ်ဖျေံလဝ်ထံၚ် ၈ သၞာံ မဒှ်ရ။
ပ္ဍဲတ္ၚဲဗော်မဟာမိတ်ညးတံ ဂွံလၟိဟ်အမာတ်စၠတ်ထဝ် သွက်သ္ဂောံဒက်ပတန်အာ အလဵုအသဳမာန်တုဲ တက်သေန် ကလေၚ်စဴလုပ်စိုပ်ကၠုၚ်နိဂီုဍုၚ် မဒှ်ရ။
ဆဂး တက်သေန် ကြဴနူလုပ်စိုပ်ကၠုၚ်ထံၚ် ၜိုတ်မွဲၜါနာဍဳဟေၚ် ဟိုတ်နူသြိုဟ် ကေုာံ ကောန်တၟအ် ဟွံခိုဟ် ထ္ၜးဟိုတ်တုဲ ပြံၚ်အာမံၚ်ဒၞာဲ ခဒမ်တၟေၚ် ရုၚ်ဂဥုဲဒပ်ဗၠာဲသၟိၚ်ရ။
ဒုဟ်ဒဏ် ဖျေံလဝ်လတူညးဂှ် ကြဴနူဂှ် နူနန်ထဝ် ဆာန်ဍူဗ္စာရဏာတုဲ ယှအ်ဖျေံကဵုလဝ်စဵုကဵု ၁ သၞာံရ။ ညးဝွံ ကိုပ်ကၠာဟွံဂွံတၚ်ဒုၚ်လျိုၚ်ဏီဂှ် ဒးအာမံၚ်လဝ် ပ္ဍဲရုၚ်ဂဥုဲပွိုၚ် ၆ ဂိတုရ။
နူရုၚ်သၞောဝ်ဓဝ် အမိၚ်ဖျေံကဵု တက်သေန် ဒးကလေၚ်ဒုၚ်ဒုဟ်ထံၚ် ၁ သၞာံတုဲ ညးကလေၚ်လုပ်စိုပ်ထံၚ်ပၠန်ရ။
တက်သေန် ဝွံ ပ္ဍဲဗွိုၚ်ပရေၚ်ဍုၚ်ကွာန်သေံမ္ဂး ဇြဟတ်သြဇာဇၞော်ကၠုၚ်လဝ် လံလဗွဲမလောန်တုဲ ကၟိန်သ္ၚိဌာန်ယှေန်နာဝပ်ထရာညးတံဂှ် ဂွံလဝ်ပရေၚ်ထံက်ဂလာန် နူကဵုရဲကွာန်ရးတံ ဗွဲမခိုၚ်ကၠိုက်ရောၚ်။
Ref:Reuters