ရေဝ်၊ ဂျောန် ၄
အပ္ဍဲတွဵုရးမန် ပွိုၚ်ဍုၚ်ရေဝ် ဒေသကၞောတ်ၜဳရေဝ်ဂှ် ဒပ်ကဝ်မယှေန်ပၞာန် ထပ်ကြဳဏာဗုမ်နူဗလးကျာတုဲ ညးဍုၚ်ကွာန်တံ ချိုတ်လဝ်နွံမံၚ်ရောၚ် တမ်ရိုဟ်ကၞက်ပရိုၚ်ဒေသတံ ဟီုကဵု ဌာန်ပရိုၚ်သြင်လောန်တိုၚ်မ်ရ။
ပ္ဍဲဂိတုဂျောန် ၃ အခိၚ်နူဂယး ၁ နာဍဳဂှ် ၜၚ်ကျာဂျက်ဖိုက်တာ ကဝ်မယှေန်ပၞာန် ၂ မ ကၠုၚ်ကြဳဖျေံဗုမ် လျိုၚ် ၅၀၀ ပံၚ် လၟိဟ် ၄ မ နွံရောၚ်။
ဟိုတ်နူ ဒးဒုၚ်ကြဳဗုမ်နူဗလးကျာတုဲ ညးမံၚ်ဒၟံၚ်အပ္ဍဲဒေသကၞောတ်ၜဳရေဝ် ရဲကၠအ်ညးတြုံ အာယုက် ၄၀ ပြၚ် ၁ တၠ ဒးဗုမ် ချိုတ်အာတုဲ သ္ၚိဌာန်လီုလာ်လဝ်လေဝ် နွံမံၚ်ရောၚ် သ္ဂးရ။
ဒေသကၞောတ်ၜဳရေဝ် ဒးဒုၚ်ကြဳဗုမ်လၟုဟ်ဏအ်ဂှ် အခိၚ်ကၠာဒပ်ပၞာန်ဟွံဂွံသီအဝဵုဏီဂှ်မ္ဂး ဒှ်မံၚ်ဒေသဗော်ဍုၚ်မန်တၟိ NMSP ထိၚ်ချုက်လဝ်တုဲ ကြဴနူသီအဝဵုဂှ်တှ်ေ ဂကောံဒပ်ပၠန်ဂတးတအ်လေဝ် ဖျေံသ္ဇိုၚ်ချဳဒရာၚ်မံၚ် မဒှ်ကီုရ။
အတိုင်ရိုဟ်ကၞက်ပရိုၚ်ဒေသတအ်ဟီုမ္ဂး ပရေၚ်ကြဳဗုမ်ဏအ်ဂှ် ဒၞာဲဗ္ဒိုပ်ဂကောံလကိုတ်ရေဝ် နွံမာန်တအ်ဂှ် နူကဵုဒပ်ပၞာန် ကၠောန်အာပရေၚ်ဗတိုက်ဗလးကျာ အလန်ဒုတိယရောၚ် ဟီုဂးမံၚ်အိုတ်ရ။
ဗ္ဒိုပ်ဂကောံလကိုတ်ရေဝ်ဂှ် နူကဵုဒပ်ပၞာန်ဗၟာ ထပ်ဗတိုက်ဏာ နူဗလးကျာအလန်ဒုတိယတုဲ ကောန်ဒပ်လကိုတ်ရေဝ်တံဗွဲမဂၠိုၚ် ချိုတ်အာလဝ်ရောၚ်ဂှ် ရဲလဝ်ဗဳဒပ်ပၞာန်တံ တြးဝါဒနွံမံၚ်ရ။
ပရေၚ်ကမၠောန် ဒပ်ပၞာန်ကြဳမံၚ်ဗုမ် လတူကောန်ညးဍုၚ်ကွာန် ဟၟဲကဵုဒုဟ်ဂှ် ဂၠးကဝ်ညာတ်မံၚ်ကီုဟာ သာ်ဝွံ ပ္ဍဲမုက်လိက်မှာဇန် က္ဍိုပ်ဂကောံလကိုတ်ရေဝ်ဂှ် ဟီုဂးပါ်ပါဲချူလဝ်ရ။
တုဲကၠုၚ်ဂိတုမေ ၂၇ တေံ အခိၚ်ပယျာံဂယး ၁ နာဍဳဂှ် ကဝ်မယှေန်ပၞာန် နူကဵုဗလးကျာကြဳဖျေံဏာဗုမ် လတူဗ္ဒိုပ်ဌာန်ဂဥုပ် ဂကောံလကိုတ်ရေဝ် နွံမံၚ်ဒေသကၞောတ်ၜဳရေဝ်ဂှ် ကောန်ပၞာန် လကိုတ်ရေဝ် ၁၀ တၠ ချိုတ်တုဲ ၂၀ ပြၚ် ဒးလဝ်ဝပ်ဘဲဒဏ်တံနွံရ။
ပရိုၚ် – သြင်လောန်တိုၚ်မ်
Photo – ဂကောံလကိုတ်ရေဝ်