မတ်မလီု၊ ဂျောန် ၄
အပ္ဍဲကောံဓရီုစၠတ်ထဝ် တွဵုရးမန် ကၠောန်ဗဒှ်အာဂတဏအ်မ္ဂး ဝိုၚ်ဝေၚ်ဂွံအိုတ်အးအာဂှ် သွက်သ္ဂောံပတိုန်ဂလာန်နွံမံၚ်ရောၚ်ဂှ် ဂၠိုက်ဂၠာဲဂွံတီကေတ် နူညးကြပ်ကဵုညးစၞးစၠတ်ထဝ် တွဵုရးတအ်ရ။
ဂလာန်သွက်ဂွံပၠုပ်အာ အပ္ဍဲစၠတ်ထဝ်ဂှ် ညးစၞးအမာတ်စၠတ်ထဝ် တွဵုရး ပွိုၚ်ဍုၚ်ကျာ်မြဟ် ဒေသမာဲလၟိဟ် (၂) ဥူတဇြဝ် ပတိုန်ထ္ၜး အာရောၚ် မဒှ်ရ။
ဂလာန်သွက်ဝိုၚ်ဝေၚ် ဂွံအိုတ်အးအာဟီုမ္ဂး အပ္ဍဲတွဵုရး ယၟုပရေံပရေံ ဒယှ်တှ်မံၚ်ကဵုဝိုၚ်ဝေၚ်တံဂှ် ဒးသီကဠက်မာတ်ထောံ ဗွဲလအိတ်ရောၚ် ဂွံတီကေတ်ရ။
ယဝ်ရဂလာန်ဏအ် အံၚ်ဇၞးအာမ္ဂး နူကဵုဂကောံအလဵုအသဳတွဵုရးမန် အလဵုအသဳပၞာန်ဂှ် ဝိုၚ်ဝေၚ်တံ ညံၚ်ဂွံမာတ်အာဂှ် ဗီုလဵုဒှ်ဒှ် ဒးထမံက်အာရုပ်ရဴကမၠောန်ဍာံဍာံရောၚ်။
စပ်ကဵု လတူပရေၚ်ပတိုန်ဂလာန် သွက်ဝိုၚ်ဝေၚ်ညံၚ်ဂွံအိုတ်အာ အပ္ဍဲစၠတ်ထဝ်တွဵုရးမန်တုဲ နူဌာန်ပရိုၚ်သြင်လောန်တိုၚ်မ် ဂွံဆဵုဂဗသၟာန်သၟုက်လဝ် ညးဒေသ ၃ တၠ တအ်ဂှ်လေဝ် ထံက်အာဂလာန် ဒုၚ်တၠုၚ်ပေၚ်ၚ်ရောၚ် သ္ဂးရ။
အပ္ဍဲတွဵုရးမန် ဟိုတ်နူဝိုၚ်ဝေၚ်တံနွံမံၚ်ဂှ်ရ ပရေၚ်ကမၠတ်ဒမၠ ပၠံၚ်ၜးကၠတ်ဂၠံက်တံကီု၊ ပရေၚ်ပိုန်ဒြပ် ကၟိန်သ္ၚိဌာန်လီုလာ်အာကီု သၟတ်အပ္ဍဲဒေသတံ ဒဂေတ်ပဋိပတ်ယောၚ်ယာကၠုၚ်တုဲ အကာဲအရာပရေံအာ ဗွဲမလောန် က္တဵုဒှ်ကၠုၚ်မံၚ်ရောၚ်။
ကောံဓရီုလၟေၚ်ဍာံ အလန်ဒုတိယ စၠတ်ထဝ်တွဵုရးမန် တတိယ ဝါဂှ် ပ္ဍဲဂိတုဂျောန် ၉ ဂတဏအ် စကၠောန်ဗဒှ်အာတုဲ အပ္ဍဲကောံဓရီု ဏအ်မ္ဂး ပရေၚ်သၟာန်သၟုက် ၂၉ တင် ကေုာံ သွက်ဂွံပတိုန်အာဂလာန်၄ တၚ် နွံမံၚ်ရောၚ်။
ပရိုၚ် – သြင်လောန်တိုၚ်မ်
Photo – MOI