နယူးဒေလီ၊ ဂျောန် ၃
ဍုၚ်ဗမာက္ဍိုက်ပ်တုဲ လွဳပရာဂစာန်ပတိတ်မံၚ်ဇြဟတ် သွက်ပရေၚ် ၜိုဟ်လလမ်၊ ပရေၚ်ညိၚ်ဝပ်၊ ပရေၚ်ညဳသၟဟ်ဂကူ ကေုာံ ပရေၚ်ဖောအ်ဗြဳတောတက် ပိုန်ဒြပ်မၞိဟ်တံဂှ် နူဍုၚ်အိန္ဒိယ ထံက်ဂလာန်ရောၚ် သ္ကိုပ်ဝန်ဇၞော် မဝ်ဒဳ ဟီုရ။
ပ္ဍဲကဵုဒၞာဲ Hyderabad House ဍုၚ်နယူးဒေလီဂှ် သမ္မတသီအဝဵု ဥူမေန်အံၚ်လှိုၚ် ကဵု သ္ကိုပ်ဝန်ဇၞော်အိန္ဒိယတအ် ဆဵုဂဗသဳကၠဳလဝ် ဂိတုဂျောန် ၁ ဂှ်တုဲ အပ္ဍဲလိက်လလောၚ်တြး ပံၚ်တောဲၜါဍုၚ်ဂှ် ချူထမံက်လဝ်ရ။
အကြာၜါဍုၚ် နကဵုဍုၚ်မိတ်သဟာဲ ပရေၚ်ဓရ်ပတေဟ်နွံနွံ ခိုၚ်ၚ်ကၠိုက်က် သွက်ဂွံပံၚ်တောဲရေၚ်တၠုၚ်အာ ပရေၚ်ဂီုကၠီုတံ ညံၚ်ဂွံ ဇြိုဟ်နက်တိုန် သွက်ဍုၚ်ဗၟာဂှ် နူကဵုဍုၚ်အိန္ဒိယ ဆက်ကၠောန်အာ ရောၚ် သ္ကိုပ်ဝန်ဇၞော် မဝ်ဒဳ သ္ဂးရ။
တုဲပၠန် ဒုၚ်သ္ဇိုၚ်ကဵု ပရေၚ်ရှ်ေသှ်ေအဲပရဲ ဆာန်ကၟိန်အကြာၜါဍုၚ် ညးသ္ကံတံတုဲ ပရေၚ်အရီုဗၚ်ကေုာံ ပရေၚ်ပံၚ်တောဲ ကၠောန်ၜိုတ်အာ တအ်ဂှ် ဆက်ကဵုအာရောၚ် ညးဟီုလဝ်ကဵုသမ္မတသီအဝဵုရောၚ်။
ပ္ဍဲအရာသဳကၠဳလဝ် ၜါလပါ်တံမ္ဂး ပရေၚ်ကူသာန်ဗၞိက် ကေုာံ ပရေၚ်ဆက်ဆောံ နကဵုပိုန်ဒြပ်၊ ပရေၚ်စဵုဒၞာကဵု ဂီုကၠီု၊ ပရေၚ်ထိၚ်ဒဝ် ဒေသပယျဵု၊ အရီုဗၚ်ပရေၚ်ဖောအ်ဗြဳတံ၊ ပရေၚ်သၠာဲဂတးယေန်သၞာၚ် ကေုာံ ပရေၚ်ပံၚ်တောဲအကြာၜါဍုၚ် ညံၚ်ဇြဟတ်သ္ဂောံ ဗိုန်ဗတ် ခိုၚ်ကၠိုက်ကၠုၚ်တံလေဝ် ပါလုပ်ကီုရ။
တုဲပၠန် ကိုန်အစဳဇန်ပလံၚ်ဗ္စိုပ် ကြုၚ်ဂလာတာန် ကေုာံ ဂၠံၚ်ဇၞော် အကြာပိဍုၚ် အိန္ဒိယ-ဗၟာ-သေံ တအ် သ္ဂောံတုဲဒှ်အာ ညံၚ်ဂွံပံၚ်တောဲရေၚ်တၠုၚ်ကၠောန်အာကြပ်ပ်ဂှ် သဳကၠဳလဝ်ညးသ္ကံရောၚ်။
လတူဍုၚ်ဗမာ အဝဵုပိုၚ်ပြဳကဵု ပရေၚ်တိဍာ်တန်ကြန်မံၚ်တံဂှ် နူဍုၚ်အိန္ဒိယထံက်ဂလာန်အာရောၚ် မဝ်ဒဳ ဟီုလဝ်တုဲ မွဲလပါ်ပၠန်ဂှ်လေဝ် အပ္ဍဲတိဍာ်ဍုၚ်ဗၟာ ညံၚ်ပရေၚ်ဂီုကၠီုဍုၚ်အိန္ဒိယ ဂွံယုတ်ဒေက်အာဂှ် ကဵုအခေါၚ်ဟွံသေၚ်ရောၚ် ဥူမေန်အံၚ်လှိုၚ် သ္ဂးလဝ်ရ။
လ္တူအကာဲအရာ အိန္ဒိယပ္ညဳအာမံၚ် လတာ်သၠဒကေဝ် လတူဇြဟတ်ကြုက် လုပ်စိုပ်ကၠုၚ်မံၚ် စဵုကဵုလပါ်ပလိုတ်ဍုၚ်ဗၟာဂှ် သွက်ဂကောံပၞာန်တံမ္ဂး ပရဲပရေၚ်ဍုၚ်ကွာန်ကဵု ပရေၚ်ပၞာန်တိတ်မံၚ်ယျ ဗိုလ်ဇၞော် CDM ဇြေန်ယဝ် သ္ၚဳဂၠိပ်ရ။
“အဓိကမ္ဂးတှ်ေ တၠုၚ်လအာဇြဟတ်ကြုက်တံ လုပ်စိုပ်ကၠုၚ်လပါ်ပလိုတ်ဍုၚ်ဗၟာ ၜဳဗၚ်ဂလာတအ်ဂှ် ညးတံပညဳအာမံၚ် ဗီုပြၚ်လတာ်သၠဒကေဝ်ကီုရ။ ဟိုတ်ဂှ်ရ အပ္ဍဲအကာဲအရာဏအ်မ္ဂး သွက်ရဲလပါ်ဒပ်ပၠန်ဂတးပိုဲတအ် ပရေၚ်ပိုၚ်ခြာ ကေုာံ ပရေၚ်ဍဵုဍိုက်တအ် ဂၠိုၚ်ကၠုၚ်မာန်ဏောၚ်။ သွက်ဂကောံပၞာန်တံမ္ဂး ဂွံအာပရဲယျ။ သီုပရေၚ်ဍုၚ်ကွာန် သီုပရေၚ်ပၞာန် တုဲတှ်ေ သီုကဵုပရေၚ်ပိုန်ဒြပ်တအ် သွက်ဂွံဒှ်အာပရဲမာန် ဒှ်တရဴမွဲရောၚ် ဒးဟီုရ” သာ်ဝွံ သ္ဂးရ။
နကဵုအိန္ဒိယမ္ဂး သွက်ဒေသတိဍာ်ပယျဵု ဂွံညိၚ်ဝပ်တန်ကြန်အာမာန် နကဵုပရေၚ်ဂီုကၠီု ပံၚ်တောဲအာကဵုအလဵုအသဳပၞာန်တုဲ လပါ်ဒေသ ပယျဵု ပလိုတ်ဍုၚ်ဗၟာမ္ဂး သွက်ဒပ်ပၞာန်တံ ချဳဒရာၚ်ပရေၚ်ပၞာန် ဗလးတိကဵုဗလးကျာတံဂှ် ဗီုပြၚ်ဒးကၠောန်အာ ပဵုဂၠိုၚ်တိုန်ရောၚ် ညးထံက်ထ္ၜးရ။
မွဲလပါ်ပၠန် စပ်ကဵု ပရေၚ်အံၚ်သာန်သုကျဳတုဲ သ္ကိုပ်ဝန်ဇၞော် မဝ်ဒဳ သၟာန်သဳကၠဳလဝ်ကဵု ဥူမေန်အံၚ်လှိုၚ်ကီုရောၚ် ကြဴနူဆဵုဂဗလဝ် အပ္ဍဲပေါဲသောၚ်ကလးလိက်ပရိုၚ် ဂိတုဂျောန် ၁ ဂှ် ဝန်ဇၞော် ပရေၚ်ဍုၚ်သအာၚ် အိန္ဒိယ ဟီုလဴလဝ်နွံရ။
ပရေၚ်တင်ဒတူလိုၚ် ဍုၚ်အိန္ဒိယမ္ဂး အပ္ဍဲဍုၚ်ဗၟာ သွက်သ္ဂောံဂွံအာ ပရေၚ်ၜိုဟ်လလမ် ဍာ်ဇမၠိၚ်ကီု ပေါဲသဳကၠဳ ညးဆေၚ်စပ်တံသီုဖအိုတ် ပါလုပ်မာန် ညံၚ်ဂွံဒှ်အာဂှ် ထံက်ဂလာန်ကဵုမံၚ်လၟိုန်ရောၚ် သ္ဂးရ။
အပ္ဍဲလိက်လလောၚ်တြး ပရေၚ်ပံၚ်တောဲၜါဍုၚ် နူလပါ်အလဵုအသဳပၞာန်သီအဝဵုတအ် ပတိတ်လဝ်ဂှ်မ္ဂး ပရေၚ်ကိစ္စ ဒဝ်အံၚ်သာန်သုကျဳကီု ပရူပရာပရေၚ်သဳကၠဳ အလုံညးဖအိုတ်တံ ညံၚ်ဂွံပါအာဂှ် ချူထမံက်ထ္ၜးစုတ်လဝ်ဂှ် ဟွံဆဵုလဝ်ပုဟ်။
နူကဵုပရေၚ်သီအဝဵု ဒုၚ်သ္ဇိုၚ်ကဵုပေါဲရုဲမာဲဂှ် ဒက်ပ္တန်ကၠုၚ်လဝ် အလဵုအသဳပြံၚ်လဝ်ဗီုပြၚ် ညးဍုၚ်ကွာန်တုဲ အခိၚ်ပွဳဗွိုၚ်ဂၠးကဝ်တအ် ဝေၚ်ပါဲမံၚ်ဂှ် အပ္ဍဲဂၠးကဝ် နူကဵုဍုၚ်ဇြဟတ် ဒဳမဝ်ကရေဇြဳဇၞော်ဇၞော် အိန္ဒိယဂှ် စဆက်ဆောံကၠုၚ်အလဵုအသဳပၞာန် ဗွဲမလုပ်သၞောဝ်ရောၚ်။
က္ဍိုပ်သ္ကိုပ်တြေံပရေၚ်သီအဝဵု ဟွံဒးလုပ်ပြိုၚ်ပေါဲရုဲမာဲ ဥူမေန်အံၚ်လှိုၚ် ဒှ်ကၠုၚ်သမ္မတတုဲ နူကဵု သ္ကိုပ်ဝန်ဇၞော်အိန္ဒိယ ဘိက်ပၟိၚ်တုဲ ပ္ဍဲဂိတုမေ ၃၀ တေံ စိုပ်အာလဝ်ဍုၚ်အိန္ဒိယဂှ် ဒှ်တရဴ ညးအာဍုၚ်သအာၚ် ကိုပ်ကၠာအိုတ်ရောၚ်။
သတင်း – သံလွင်တိုင်းမ်
Photo – AP