ဗြဝတဳ၊ ဂျောန် ၄
အပ္ဍဲတွဵုရးကရေၚ် ဗျူဟာဝဝ်လေ နွံလပါ်သၠုၚ်ကျာဍုၚ်ဗြဝတဳ ပယျဵု သေံ – ဗၟာဂှ် ပေါဲဗတိုက်အကြာၜါလပါ် သ္ကာတ်မံၚ်ဗွဲမလောန်ဂှ်ရ ညံၚ်ဗျူဟာပၞာန်ဟွံဂွံစှ်ေအာဂှ် နူလပါ်ကဝ်မယှေန်ပၞာန် ဒုၚ်တဝ်စၞေဟ်မံၚ် နကဵုပၞာန်ကျာဇၞော်ကဵုဇြဟတ်ရောၚ် နူရိုဟ်ကၞက်ပရိုၚ်ဒေသတံ ဟီုကဵုဌာန်ပရိုၚ်သြင်လောန်တိုၚ်မ်ရ။
ဒပ် KNLA မဟာဒပ် ၆ ကဵု ဂကောံပံၚ်တောဲဇြဟတ်ပၠန်ဂတးတံ ကၟာတ်ဆိုအ်ဗတိုက်မံၚ် ဗ္ဒိုပ်ဗျူဟာဝဝ်လေဂှ် ကြပ်ပေၚ်အာ မွဲသၞာံယျတုဲ ဗ္ဒိုပ်ကၚ်ဒၞာလဝ် ရုၚ်ဗျူဟာတံသီုဖအိုတ်ဂှ်တှ်ေ ဂကောံဇြဟတ်ပၠန်ဂတးတံ သီဂွံလဝ်အိုတ်တုဲ သှ်ေမံၚ်ဆၜိုတ် ဗ္ဒိုပ်ဗျူဟာအဓိကမွဲဒၞာဲဓဝ်ရောၚ် ရဲတမ်ရိုဟ်ကၞက်ပရေၚ်ပၞာန်တံ သ္ဂးရ။
ဒပ် KNLA မဟာဒပ် ၆ ကဵု ဂကောံပံၚ်တောဲဇြဟတ်ပၠန်ဂတးတံ သွက်သ္ဂောံကလေၚ်ဗတိုက်အာ ကုန်ဗျူဟာဝဝ်လေဂှ် သၠုၚ်လဝ်အသိၚ်ဂှ်ရ စနူဂိတုဂျောန် ၂ တေံ အသိၚ်ပေါဲဗတိုက် သ္ကာတ်တိုန်ကၠုၚ်တုဲ ညံၚ်ရုၚ်ဗျူဟာဟွံဂွံစှ်ေအာဂှ် နူကဝ်မယှေန်ပၞာန် သုၚ်စောဲအရီုဗၚ်ၜၚ်ကျာတုဲ ကြဳဗုမ်ဗတိုက်မံၚ်ရောၚ် ရဲဒေသတံ သ္ဂးရ။
ဟိုတ်နူၜၚ်ကျာ ကဝ်မယှေန်ပၞာန်တအ် ကြဳဖျေံမံၚ်ဗုမ်တုဲ ညးဍုၚ်ကွာန် ရဲပါဲဘဲပၞာန်ဒေသဝဝ်လေတံဂှ် ဒးပြံၚ်အာလပါ် ဇိုၚ်ပယျဵုသေံတေံဂှ်ကီု ရဲပါဲဘဲပၞာန်ဗ္ဒာဲ ၂၀၀ တၠတံ လုပ်စိုပ်အာလဝ် အပ္ဍဲဍုၚ်သေံတုဲ ညးတာလျိုၚ်ပယျဵုသေံတံ မၚ်ကဵုမံၚ်အရီုဗၚ်နွံရောၚ် လိက်ပရိုၚ်ဍုၚ်သေံတံ ချူထမံက်လဝ်ရ။
ပ္ဍဲဂိတုဂျောန် ၃ အခိၚ်နူဂယးဂှ် ဇရေၚ်ကုန်ဗျူဟာ ဒးဒုၚ်ဗိုၚ်မာတ်ဆိုအ်ဗတိုက်လဝ်ဂှ်တှ်ေ နူကဵုၜၚ်ကျာ ကဝ်မယှေန်ပၞာန်တံ ကၠဟ်ဖျေံကဵုမံၚ်ထိုၚ်ကပေါတ်တံတုဲ ဒပ်ကဝ်မယှေန်ပၞာန်သီုကဵု ကြဳဗုမ်ဗတိုက်မံၚ်ကဵုၜၚ်ကျာ သီုကဵုဒရုၚ်ကြဳဗုမ်ဗတိုက်မံၚ်ကီုရောၚ် ညးဒေသတအ် သ္ဂးရ။
ဗျူဟာဝဝ်လေဏံ စနူဂိတုဂျူလာၚ် သၞာံ ၂၀၂၅ တေံ နူ KNLA မဟာဒပ် ၆ ကေုာံ ဂကောံပံၚ်တောဲ ဇြဟတ်ပၠန်ဂတးတအ် ဗတိုက်ကၠုၚ်လဝ်တုဲ စဵုကဵုစိုပ်ဂိတုဂျောန် သၞာံ ၂၀၂၆ ဏံ ၜိုန်ရသီကေတ် ဗ္ဒိုပ်သီုဖအိုတ်ဟွံမာန်ဏီကီုလေဝ် ကၚ်ဗ္ဒိုပ်ဒၞာ ဗိုၚ်လဝ်ဂှ်တှ်ေ သီဂွံလဝ်တုဲ မဒှ်ရ။
ရုၚ်ဗဒိုပ်ဗျူဟာဝဝ်လေ ညံၚ်ဟွံဂွံစှ်ေအာဂှ် နူကဝ်မယှေန်ပၞာန်တံ ဒးပဓာန်စမံၚ်အရီုဗၚ်ပန်ပလံၚ်ကဵု နူဗလးကျာမွဲဓဝ်တုဲ ဒပ်ဗလးတိတံ သွက်သ္ဂောံပလံၚ်ဗစိုပ်ဏာကဵု ဗျူဟာဝဝ်လေမာန်ဂှ် သ္ပလဝ်သ္ဇိုၚ် နူကဵုဒေသ လေဝ်ကေကဝ် လပါ်သၠုၚ်ကျာဗြဝတဳတုဲ ဒပ်ကဝ်မယှေန်ပၞာန် ထပက်မံၚ်ကရောၚ်ပၞာန် အပ္ဍဲဒေသဖလူ ဇၞော်ကဵုဇြဟတ်ရောၚ်။
သုၚ်စောဲဇြဟတ်ကောန်ပၞာန်တၟိ စှ်ေနူဘာတန်ဗတောန်ယိုက်ဝန်ပၞာန်တံတုဲ အပ္ဍဲပွဳဗွိုၚ်ဒေသဖလူ လပါ်သၠုၚ်ကျာဗြဝတဳမ္ဂး ကဝ်မယှေန်ပၞာန် ထပက်မံၚ်ကရောၚ်ပၞာန်ဇၞော်ကဵုဇြဟတ်ဂှ် ဟိုတ်နူပရေၚ် ဂကောံဇြဟတ်ပၠန်ဂတးတံ ဒုၚ်ဒဝ်ကလေၚ်ဗတိုက်လဝ်ဂှ်ရ လံကၠုၚ်ပွိုၚ် ၈ ဂိတုကီုလေဝ် ဒပ်ကဝ်မယှေန်ပၞာန်တံ ဆက်တိုန်အာဂတ ဟွံမာန်ဏီတုဲ ပရေၚ်ဒးဝပ်၊ ချိုတ်ဂၠိုၚ်ဂၠၚ် နွံမံၚ်ရောၚ် နူကဵုရိုဟ်ကၞက်ပရေၚ်ပၞာန်တံ ဟီုလဴလဝ်ရ။
ပရိုၚ် – သြင်လောန်တိုၚ်မ်
Photo – CJ